21
Saulo Vnyau vshih jens
1 Dawi zaih lyis somh zvn top phanghkhauq gyoh. Housoeh las Dawi gas Yhensain lhyi nyei yoeuh lyis Yhensain taiq zis gas, Gibeon dius jens lyis sat dah Saulo yahge nyah yhenbang dah dius suih huot yaunos gvng mas nghuot, ge.
2 Housoeh las hwankti ka Gibeon jens lyis khi tsainh. Gibeon jens gas, Israel jens ma nghuot, Amori jens masyah nyet joq bang nghuot: Israel jens gas nyamoq lyis ma sat das ge maukhi toh. Nghuot laus eq Saulo ka svsoh mes dah ehnyet yah Yuda yahge Israel jens dah vkyuh xiklyis nyamoq lyis sat tomh das zis yomkat.Ref 21.2: Yosh 9.3-15
3 Dawi Gibeon jens lyis nyei zis gas, Ngos namoq nhaiqdainh das xiklyis cha yoh kuot dyei das lah? Taiq aq, housoeh lyis Yhensain ka nyah dius jens lyis shvmanh doms dyei das, ge.
4 Gibeon jens toeuh zis gas, Nghuot goeus, ngwis yah ma yoh kuot. Ngamoq lvto phuk khyvlyis Israel jens sat xauh zis lyis ma mes nyvng, ge. Dawi gas, Houlhyi ngos cha yoh kuot das lah? Ngos lyis dvtaiq aq, ngos namoq xiklyis kuot dyei das, ge nyei.
5 Hauh uhlyis nyamoq phuk taiq zis gas, Israel mau gonh mas khamha eq ma yoh nyeis lo shoq ngamoq lyis mhont das zis sont soeu ka Saulo nghuot.
6 Housoeh lyis ngamoq lyis Saulo dah vnyau mas yukgis nyhet yuk kyauh aq, lholhyi Yhensain khyen toh hwankti Saulo dah wus, Gibeon Yhensain dah xikkhonh mas, ngamoq gas nyamoq lyis sat das, ge.
Hwankti ka, Gis goeus! Ngos nyamoq lyis kyauh das, ge.
7 Dawi gas nyang yahge Yonathan, Yhensain xikkhonh mas toh dah dangthoengh gvng mas, Saulo dah nyeilo, Yonathan dah lo Mephiboshet lyis nhaiqnyen cho chixoeuq.Ref 21.7: 1Sa 20.15-17; 2Sa 9.1-7
8 Nghuot laus eq nyang gas nyamoq lyis Saulo dah lo tang Armoni yahge Mephiboshet lyis kyauh. Nyah zomh dah ungwes gas Aia lonyi Rizpa nghuot. Nyang gas Meholat mas nyeis Barzilai dah lo Adriel dah yhensain nyhiq Saulo dah lonyi Merab dah loloeu oeng yuk lyis eq nyamoq lyis kyauh.Ref 21.8: 1Sa 18.19
9 Gibeon jens gas nyamoq lyis boms thoq Yhensain xikkhonh mas sat. Housoeh hau nyhet yuk gonh gas Bali yhomh xi loh yoq lyis dvnyeih dvm lyis shei tyamp.
10 Housoeh hauh vbusbih nyhet yuk mas aiq yuk dah ungwes Rizpa ka lukthe thoq mas yanghthung zvngdyvm kuot las jyo yhomh nyos dvyoq gonh houmha nyeis. Nyang gas mvng mas nyeih lyis langda ma chweh, nyenh lyis yewus ma zo shoq khat nyeis.
11 Dawi gas Saulo dah nyinhungh Aia lonyi Rizpa kuot dah cho seq lyis,
12 Dawi gas Yabesh Gilead bang jyank loh las Saulo yahge Yonathan dah shohyau loh sang. (Gilboa boms mas Philisti jens Saulo lyis sat dah nyeihyo nyamoq gas Saulo yahge Yonathan phvtang dah mvng lyis Betshan wugungs vkhau dius nyoshoq zain dah joqyos mas lhangh toh. Hauh lhangh toh mvng lyis Yabesh Gilead bang gas loh khauh yoeus toh.)
13 Housoeh Dawi gas Saulo yahge Yonathan phvtang dah shohyau, Gibeon dius jens sat dah vbusbih jens dah shohyau lyis eq yoeus los.
14 Nyang gas hau shohyau dvnganh lyis Benyamin mau, Zela wus Saulo dah uwus Kish dah lop mas tsain nyhop. Hauh thang lhyi, Mangso ka Israel mau mas phanghkhauq khyoq zis lyis no tyamp.
Philisti Dam jens Monh Loh
(1Ss 20:4-8)
15 Philisti jens gas Israel jens lyis jes dvlhain doms zan los. Dawi yahge nyah dius jens gas jeszan xungh dah joqyos mas nghuot lyis Dawi gas daus las yomnhuk los.
16 Ishbi Benob gas Dam dius nyau nghuot; nyang gas thunk lham nyhet paung lyei zis dvkhat yahge sham saiq dvchamh wons toh. Nyang Dawi lyis yoh lhaink toh las sat bah ge.
17 Nghuot laus eq Zeruia lo Abishai gas Dawi lyis los bos pangh zan las Philisti dam lyis sat. Houmha zis Dawi dah dius jens gas, Nvng Israel nyibung lyis ma sat bas jungh, thang pheh khanhamp eq ngamoq yah jeszan yvmas yoh loh das zis ma nghuot ge maukhi toh.Ref 21.17: 1Hw 11.36; Chd 132.17
18 Hauh thang lhyi Gob mas Philisti jens yah moeng doms zan-goh. Nyamoq zan-goh yvmas Hushat dius Sibekhai ka Dam dius Sap lyis sat.
19 Tsai, Gob mas Philisti yah zan-goh. Hauh uhlyis Betlehem mas dah Yare Oregim dah lo Ehanan gas, gankhomh iq kuh dah lham chi dah Gat dius Goliat lyis yoh sat.
20 Tsai, Gat mas jes doms zan las gungs khyank nyhang lha loq dvshot khyuk nyhauh, khyei dvshot khyuk nyhauh dvnganh lyis aiqci nyei nyhauh dap dah dam dius dvyuk bos.
21 Hauh soeu Israel jens lyis whahkhoeuh lyis Dawi dah vmang Shimea dah lo Yonathan gas nyang lyis sat.
22 Hauh dius nyei yuk gonh gas Gat wus mas nyeis Dam dius dvyuk dah lo jens tsain nghuot. Nyamoq dvnganh gas Dawi yahge nyah jes thoeuqzoe jens loq mas shei.