19
Yoab Dawi lyis Yobos Huon
Ma nyangh lyis hwankti ka Absalom xiklyis kukxi ngaus nyeis ge cho Yoab lyis taiq kyoh los. Hwankti ka nyah lo xiklyis svsoh kukxi cho jesphung jens xauhgyo lyis, hauh nyeih dah ung cho gvng mas gauslaus cho ka svsoh nhaiqngis cho bweh loh. Jeszan khyomp masyah phang gvng mas xoq dah jeslo jens teh, hauh nyeih lyis nyamoq gas wus khau mha tsoek yah gauh wvng los. Nghuot laus eq hwankti ka nyah nyoqnho nghop las, Ngah lo Absalom eh, Absalom eh, ngah lo, ngah lo ge kaiq ngaus.
Hauh uhlyis Yoab gas hwankti yvp mha wvng las nyang lyis taiq zis gas, Ngamoq nah kang, nah loloeu lonyi jens kang, nah yhensain nyhiq jens dah kang yahge nah nyinhungh jens dah kang kyoeu goeus. Nghuot laus eq nvng heisoeh kuot zis gas ngamoq dvja kuot shuot yhangteh ngamoq lyis xoqphuh nhang goeus, ge. Nvng gas nvng lyis hoeng bang lyis jyet teh, nvng lyis jyet bang lyis hoeng teh nghuot. Ngamoq gas nah xiklyis cha vjyuk ma bos cho khvnyhik nvng dede chixoeuq goeus. Absalom dwis nyeis las ngamoq dvnganh shei lhyi ka nvng nhaiqdoeus das. Gvshih nvng moqphung jyank thuq loh las jesphung jens lyis ung cho xiklyis gauslaus nhang aq, nvng ma thuq loh lyis gas khvnyens heimha dvyuk eq ma nyeis lo das oen Yhensain mha ngos maukhi. Housoeh nvng mas bweh ku cho dvnganh mas zes xungh cho nvng bweh das, ge. Housoeh las hwankti ka thuq loh las wus khomh mas tsung toh. Nyang houmha tsung toh ge dah loeus dvwus gonh dyos loh las yuk khanghmuh nyah jyank tsain los.
Dawi Yerusalem pheh
Hauh uhlyis Absalom lyis pangh dah Israel jens gas nyamoq nyang yhen pheh phang loh goeus. Israel vkoq jens dvnganh mas xamgoh cho, phyen-goh cho nyoshoq bweh nyeis. Dius jens taiq goh nyeis zis gas, Hwankti ka yang lyis yah jeswus Philisti loq masyah khyuot yoeus, nghuot laus eq Absalom gas nyang lyis mau masyah khat tyamp. 10 Yang coeu juot las yang lyis guon das dah Absalom gas gvshih shei goeus. Yang Dawi lyis, doms los las yah hwankti kuot aq, oen sang goh, ge. 11 Hauh thang lhyi hwankti Dawi phudyei Zadok yahge Abiatha lyis Yuda uhshe bang lyis taiq nhang zis gas, Hwankti lhyi nyah yhen mha doms shwih los das cho namoq chamus thang gyoh nyeis goh? Israel dvnganh gas cicont nghuot goeus, namoq kyingh sheq nyeis zis lyis ngos xauhgyo goeus, ge. 12 Namoq gas ngah boekyis, ngah vkoq, ngah suih, ngah shoh nghuot nyeis laus eq, ngos lyis doms zes das xiklyis namoq gas chamus thang thank bang nghuot nyeis goh lah? 13 Lholha Dawi gas Amasa lyis taiq aq ge nyah zomh lyis taiq kyoh, "Nvng ngah buisnoms nghuot nyeis las ngos nvng lyis Yoab gungsthaiq ngah jesphung dah zau zains ma kuot nhang lhyi ka Mangso ngos lyis shei shoq joeng bas jungh, ge. 14 Houlhyi Amasa ka Yuda uhshe bang dvnganh lyis seqgyo los shoq kanghjyoeng kat las nyamoq eq dvyih dvyot xamxonh. Nyamoq hwankti lhyi dang tying zis gas, Ngamoq jyank tauh los aq. Nvng yah nghuot bang lyis eq shwih tauh los aq, ge.
15 Housoeh hwankti ka Yerusalem pheh tauh loh. Nyang Yodan lvng mas jweh los lyis Yuda jens eq hwankti lhyi zes das zis yahge Yodan lvng shwih goeu das xiklyis Giga wus pheh loh. 16 Hauh uhlyis Benyamin vnyau Bahurim mas dah Gera dah lo Shimei gas Yuda jens yah dvgeh hwankti Dawi lyis zes das ge lvnyap chank los.Ref 19.16: 2Sa 16.5-13 17 Nyang yah dvgeh Benyamin vnyau dvkhyoengh, Saulo dah yhenbang dah jyeidwis Ziba yah dvgeh nyah lo jens dvci oeng yuk, jyeidwis aiqci eq los. Nyamoq gas Yodan lvng mas hwankti dah xik pheh jweh das xiklyis lvnyap gyoh loh. 18 Nyamoq dvnganhmoq goeu khanh cho yah goeu loh las hwankti yhenbang lyis chont yah yomkat koeuh. Nyamoq gas hwankti yhenbang lyis nyamoq yoh gis pangh cho khat khanghmuh yah pangh.
Dawi Shimei lyis Nhaiqnyen
Hwankti Yodan lvng goeu bah ge lyis, Gera lo Shimei gas hwankti lhyi los dupaiq. 19 Nyang hwankti lyis shangphu zis gas, Ngah yhensain hwankti eh, ngos lyis yobos jenh khyuot dyei aq. Nvng Yerusalem masyah thuq nyeih lyis ngos cu dah yobos lyis vjenh comh toh dyei. 20 Ngos kha iq cu yvlyis ngos seq. Hauh gvng mas khvnyhik ngos ngah yhensain hwankti lhyi zes das xiklyis Israel dius jens dvnganh dah xik mas los, ge.
21 Zeruia dah lo Abishai phuk taiq zis gas, Shimei gas Yhensain dah coeu juot kham soeu lhyi nhoengh yvmvyah, shei nyang shei chah, ge.
22 Dawi taiq zis gas, Namoq, Zeruia lo jens yah khasoeh kuot das lah? Khvnyhik gas dius sat das nyeih ma nghuot, pwe kuot nyeih dvnghuot! Ngos gas Israel dah hwankti dvlhain doms duot goeus, ge. 23 Housoeh Dawi Shimei jyank pheh xoeu lha maukhi zis gas, Nah kang luiq das, ge.
Dawi yahge Mephiboshet
24 Saulo dah nyeilo Mephiboshet gas hwankti yah xauhgoh das xiklyis Yerusalem masyah jweh los. Nyang gas hwankti Yerusalem masyah thuq khoq nyeih masyah khyei ma cheih, nhuotmi ma yuk, dyimis ma cheih nyeis.Ref 19.24: 2Sa 9.1-13, 16.1-4 25 Hwankti nyang lyis nyei zis gas, Mephiboshet eh, nvng ngos yah chamus ma loh, ge.
26 Nyang phuk taiq zis gas, Ngah yhensain hwankti eh! Ngah jyeidwis Ziba gas ngos lyis mhuih jyomh goeus. Nvng seq zis yah dvyhangteh ngos khyei ma gis yvmvyah, ngos nyang lyis taiq zis gas, mauhlyihzoe ji las hwankti jyank mas los das zis mauhlyihzoe lyis anhzoe kih aq, oen taiq. 27 Ziba gas ngos nah thang ma mes chank, ge nvng lyis khyangh taiq goeus. Nghuot laus eq nvng yhensain hwankti ka Mangso dah loeuswons soeu teh nghuot. Housoeh las nah nyoqjeih mas gis khyvlyis kuot aq. 28 Ngah buisnoms dvnganh yahge ngos gas nvng ngah yhensain hwankti xikkhonh mas shei bang teh kyingh nghuot joq laus eq, nah kihgus mas zo shuk bang yah dvgeh nvng ngos lyis joqyos dyei. Housoeh las ngos khasoeh gis lop das lah, ge.
29 Dawi phuk zis gas, Gis goeus, nah maunyeis lyis nvng yahge Ziba vgungs dvyih yoeus geh, oen ngos taiq thyet, ge.
30 Mephiboshet taiq zis gas, Ngos gas nvng ngah yhensain hwankti ka nyah yhen mha nyenstap zis yah tauh jweh los goeus las nhaiq tap goeus. Maunyeis dvnganh nyang lyis dyei aq, ge.
Barzilai lyis Jyehjuh Kuot
31 Gilead dius Barzilai gas Rogelim masyah gyoh los las hwankti lyis Yodan lvng mas zungh koeuh das zis Yodan lvng mas nyang yah dvgeh goeu loh.Ref 19.31: 2Sa 17.27-29 32 Barzilai gas nyenhkyi xetci zvn bos goeus. Nyang gas svsoh dis soeu nghuot yvmvyah, hwankti Mahanaim mas nyeis gyo lyis nyang lyis zo shuk das zis dyei. 33 Hwankti Barzilai lyis taiq, Ngos yah dvgeh Yerusalem pheh loh goh. Ngos nvng lyis nyhoeu das, ge.
34 Ngos svsoh mang goeus. 35 Khvnyhik ngah nyenhkyi xetci zvn bos goeus. Ngos cha lhyi yoh gis pyo ngon lo das lah? Zonoms yahge zvbiq eq ma nghamh lo. Chunghthwe lyis eq ngos ma yoh gis gyo lo. Ngos gas ngah yhensain hwankti lhyi lhoq yau cho duot das. 36 Ngos nvng hwankti lhyi Yodan lvng thyitvp pheh dvthungh loh xauh pauq kat zis gas ngah xiklyis nyoqnho ngelang nghuot goeus. 37 Lholhyi ngos ngvnyang wus mas shei lha ngah ungwes uwus dah lop nvm mas xauh nyhop bas jungh, jenh tauh loh nhang aq. Nghuot laus eq haih soeu ka ngah lo Kimham nghuot. Nyang lyis nvng yah dvgeh loh nhang lha nvng dyei mes dah gis cho cha nghuot laus eq nyang lhom yoeus bas jung, ge Barzilai toeuh.
38 Gis goeus! Kimham ngos yah loh das. Ngos nvng lyis kuot dyei das zis dvnganh, nyang lyis kuot das, ge hwankti xihhonh. 39 Hauh thang lhyi dius dvnganh gas hwankti yah dvgeh Yodan lvng tsain goeu. Hwankti ka nyang lyis bvlot tanh las shvmanh dyei thang lyis Barzilai gas nyah mau pheh tauh loh.
Hwankti Cho Nyingh Nyo goh
40 Hwankti ka Giga pheh loh. Kimham eq nyang yah loh. Yuda thoenkgus jesdvp dvnganh, Israel thoenkgus jesdvp dvgohyih gas hwankti jeislvng goeu yvmas pangh. 41 Nghuot laus eq Israel dius jens gas hwankti Yodan lvng goeu yvmas Yuda jens nyothyang pangh goeus ge hwankti lhyi e lop.
42 Yuda jens gas, Chamus ngamoq ma pangh vvng lah? Hwankti ka ngamoq dah vkoq nghuot. Hauh gvng mas chamus namoq nhaiqyo goh lah? Ngamoq nyang lyis phauh ma sang. Nyang ngamoq lyis ma tsoh, jyungshuk yangh ma dyei, ge toeuh.
43 Israel jens Yuda jens lyis phuk taiq zis gas, Nghuot laus eq Israel mha 10 koq nghuot. Housoeh las namoq kuot teh ngamoq eq hwankti lyis shwih cho mha toeuh dvci huon bos. Chamus namoq gas ngamoq lyis housoeh teh dius ma suon cho kuot lah? Nyang lyis ngamoq dah hwankti los doms duot aq oen ngamoq shih sang zis lyis soh geh, ge.
Dvyuk dvphuk tsoq las phyen-goh nyeis yvmas Yuda jens dah dang gas svsoh than.