18
Absalom Somh, Shei
1 Gvshih Dawi gas nyah jesphung lhyi uhshe das xiklyis dvkhyoengh guon, dvxo guon dah zau jens toeuq toh.
2 Dawi gas dius somh boms dvboms lyis Yoab loq mas, somh boms dvboms lyis Yoab dah vnoeuh Zeruia dah lo Abishai loq mas, somh boms dvboms lyis Giti dius Itai loq mas toeuq kat. Hwankti nyah jesphung lhyi taiq zis gas, Ngvnyang eq bos loh das, ge.
3 Nghuot laus eq nyah dius jens nyang lyis gvgis tomp. Nyamoq taiq kyingh zis gas, Nvng vloh, ngamoq phang lhyi nyamoq chaxwe ma nhang, ngamoq dvgohyih shei lhyi eq nyamoq chaxwe ma nhang. Gvshih nvng gas ngamoq dvmons mon. Housoeh las nvng gas wus khau mha nyeis aq, ngamoq pangh cho chah lyis nvng huon kat dyei aq, ge.
4 Hwankti ka thang thank lyis xihhonh, Ngos namoq gis thank ge khyvlyis kuot das, ge. Housoeh las nyang gas nyah jesphung dvnganh dye thuq loh shoq wus khomh mas yap joq.
5 Gvshih Yoab, Abishai, Itai moq lyis hwankti taiq kat zis gas, Ngah nyoqnho lhyi yoeuh las loyvm phoq Absalom lyis nyens nyens kuot geh, ge. Hwankti ka zau jens dvnganh lyis Absalom yah sen cho vmingh dyei yvlyis jesphung dvnganh xauhgyo.
6 Housoeh las Ephraim jyom mha jeszan pwe xi lha,
7 Israel jesphung ka Dawi dah dius jens yah zan zis xauh. Houmha sat cho zainsmuh bweh las, hauh nyeih lyis dius aiqmons dah kang gyoh tyamp.
8 Hau jeszan zis gas hauh jyom dvjyom gonh yah tsoeu nyenh loh las sham yah sat las shei bang thoq lyis jyom gvng mas shei bang zes nyo.
9 Jeszan pwe gyo lyis, Absalom gas Dawi dah dius jens dvyhamh yah thungh xauhgoh. Nyang gas nyah luzoe ji las yomkat phang, nghuot laus eq nyang vkoq svsoh nyo dah wons saiqmuh zains khyei chank ji loh lyis nyah uhloms loh nyih. Nyah luzoe gas tsoq loh nyeis, nyang lyis gas lyeis mas lhangh toh khoq.
10 Hauh bweh cho nyvng soeu Dawi dah dius dvyuk gas Yoab lyis loh taiq kyoh zis gas, Absalom saiqzains mas nyih lhangh toh zis ngos nyvng, ge.
11 Yoab sang zis gas, Cha gah? Nvng nyang lyis houmha nyvng las ma sat lhyeh? Ngos nvng lyis ngwis dvci shekel yahge thoeuqzoe dyichih dvkhvt dyei das zis, ge.
12 Hauh soeu toeuh zis gas, Ngos ngwis kyap dvkhyoengh xauh yoeus das laus eq ngos nyang lyis loq ma yings das. Yang dvnganh xauhgyo zis yah dvyhangteh, hwankti ka, nvng, Abishai, Itai lyis, Hank eq hau loyvm phoq Absalom lyis zangh das zis zaih geh, ge taiq toh.
13 Ngos hwankti dah lo lyis sat las hwankti lhyi phanhlyen lyis, hwankti ka hauh zis hank kuot zis jyoengh nyang xo nyvng das zis nghuot - nvng nyang ngos lyis cangxeih tyamp das soeu nghuot das, ge.
14 Yoab taiq, Ngos nvng yah shishenh ma lhoeu thank lo das, ge. Nyang lham somh khvt yoeus chi lha, wonszains lvt mas lhangh toh, dwis nyeis shih dah Absalom dah nhaiqlom lyis thauh kyank dyei.
15 Yoab dah jeszis chi loyvm jens dvci yuk whom los las Absalom lyis shei shoq sat.
16 Hauh thang lhyi Yoab lvbuh muot kat, nyah dius jens gas Israel thoenkgus jesdvp lyis chank khat nyeis masyah tauh los.
17 Absalom lyis mhanhdyvp dwang muh mas yoeus khyoq las hauh thoq mas lukboms zainsmuh zungs toh. Israel thoenkgus jesdvp eq nyamoq dah yhen pheh phang loh.
18 Absalom gas nyang dwis nyeis yoq lyis Hwankti Langhkhau mha nyah xiklyis lukzains dvkoeuq cuk toh. Khasoeh ge lyis nyang taiq zis gas, Ngah nyings lyis soh das xiklyis kuot dyei das lo ma bos, ge. Hauh lukzains mas nyah nyings tap toh. Khvnyhik jweh shoq hauh zis lyis Absalom dah nyoqnyhank ge lui.
Absalom Shei cho Xauhgyo
19 Zadok lo Ahima taiq zis gas, Yhensain ka hwankti lhyi nyah jes Absalom dah loq masyah khyuot yoeus goeus dah gausyis loeus lyis hwankti lhyi ngos loh wuih taiq bah, ge.
20 Yoab nyang lyis taiq zis gas, Hwankti xiklyis haih zis gausyis loeus ma nghuot das, khasoeh ge lyis nyah lo shei goeus. Nvng ngah loeuskyoh soeu goh shishenh lyis yoh duot das, nghuot laus eq khvnyhik ma nghuot.
21 Hauh uhlyis Yoab Khush mas dah dius dvyuk lyis, Nvng cha nyvng zis hwankti lhyi loh taiq aq, ge. Khush dius yuk gas Yoab lyis paiq khoq las wuih loh.
22 Nghuot laus eq Ahima Yoab lyis tsoq las dung zis gas, Cha mus lyis eq, ngos lyis Khush thang mha jenh loh nhang aq, ge. Yoab toeuh zis gas,
Ngah lo eh, nvng cha kuot loh das? Nah xiklyis jyungshuk yoh das zis ma nghuot, ge.
23 Nyang dung zis gas, Cha nghuot laus eq ngos lyis dvloh nhang aq, ge. Thang thank lyis Yoab gas, Gis goeus, loh aq, ge. Housoeh Ahima gas Yodan pa lhyi lai dah chokyank chank wuih las Mahanaim mas Khush dius dah xik lyis jweh loh.
24 Dawi gas wus khomh mas tsung toh uhlyis, zungh soeu ka wusciank chank yah wus khomh thoq mas dah yhenkhung mha doq loh. Nyang tyoeuq kat lyis nyamoq jyank pheh dius dvyuk nyang bauh wuih los zis nyvng.
25 Zungh soeu ka Dawi lhyi kaiq taiq. Hwankti taiq zis gas, Dvyuk kyingh los lyis gas nyah loeus wons los, ge. Loeuskyoh soeu jweh ni los lyis,
26 zungh soeu ka gohtoeu dvyuk nyamoq jyank pheh wuih los zis nyvng. Zungh soeu lui taiq zis gas, Gohtoeu eq dvyuk wuih los, ge.
Hwankti ka, Nyang eq loeus dih los, ge.
27 Zungh soeu taiq zis gas, Cangxeih wuih los soeu ka Zadok dah lo Ahima wuih teh nghuot, oen ngos nghamh, ge.
Hwankti ka, Nyang dius gis nghuot, loeus gis yah los, ge.
28 Ahima hwankti lhyi kaiq taiq zis gas, Dvnganh gis, ge. Hauh thang lhyi nyang hwankti xikkhonh mas dupaiq las taiq zis gas, Ngah yhensain hwankti lhyi gomloeus toq bang lyis kyauh los dah Yhensain, nah Mangso ka ngelhoq, ge.
29 Hwankti nyei zis gas, Loyvm phoq Absalom vluiq lah, ge.
Ahima phuk taiq zis gas, Yoab ngos lyis heimha los nhang uhlyis, thyimha svsoh lo nhunk nyeis. Nghuot laus eq cha bweh nyeis zis lyis ngos ma seq, ge.
30 Hwankti ka, Nvng heipheh ywi yap aq, ge. Housoeh las Ahima eq ywi yap joq.
31 Housoeh Khush dius yuk jweh las taiq zis gas, Ngah yhensain hwankti eh, loeus gis bos. Yhensain ka nvng lyis gomloeus toq bang dvnganh dah loq masyah khvnyhik lhuiq kat goeus, ge.
32 Hwankti nyei zis gas, Loyvm phoq Absalom vluiq lah, ge.
Khush dius phuk taiq zis gas, Nah jeswus dvnganh gas, gvshih eq, thang pheh eq, hauh loyvm phoq teh mus bas jungh, ge.
Dawi Absalom Xiklyis Shoh
33 Hwankti ka sainhguk thungh zis yah wus khomh thoq mas dah nyah yvp mas loh las ngaus. Nyang suh loh uhlyis yah, Ngah lo Absalom eh! Ngah lo, ngah lo Absalom eh! Nvng shei das gungsthaiq ngos dvshei das zis. Ngah lo, ngah lo Absalom eh, ge.