14
Absalom Tauh los cho Kuot
1 Hwankti ka Absalom lhyi kha iq nyvng mes nyeis yvlyis Zeruia lo Yoab yoeuh seq.
2 Housoeh Yoab gas Tekoa wus masyah yik dah vmesbih dvyuk lyis shwih los nhang lha nyang lyis taiq zis gas, Kuk nyeis soeu teh vguons kuot aq; shoh soeu dah dyimis wuot las gungs vcheih nghuot ya cha coeu eq vjuot. Shishenh nyangh nyangh svsoh kuk nyeis dah vmesbih teh kuot aq.
3 Housoeh nvng hwankti jyank loh las haih ngos nvng lyis taiq kyoh das mvnyei, nyang lyis taiq kyoh aq ge. Hauh uhlyis Yoab gas hauh vmesbih cha taiq das zis taiq kyoh.
4 Hau vmesbih gas hwankti jyank jweh loh lyis nyah xikkhonh mas dupaiq zis yah, Hwankti eh, bos pangh aq, ge.
5 Hwankti nyang lyis taiq zis gas, Chah soe bos, ge.
Vmesbih gas, Ngos chauhmuh nghuot.
6 Ngah loloeu aiq yuk gas yos mas zan-goh. Houmha nyah zomh lyis khyon das soeu ma bos las, dvyuk gas gohtoeu dvyuk lyis sat.
7 Gvshih yhen dius nyet bang gas, Nah lo ngamoq lyis kyauh aq. Ngamoq nyah vnoeuh dah cangjau xiklyis nyang lyis sat das. Nyang nyah nyhiphoq yhenzis zom das zis ma mon ge gyen gyen sang nyeis. Nghuot laus eq ngos housoeh kuot lyis lo ma yoh lo las ngah yhensain phoq dah nyings yahge yhenbang dah nyings gas nyeisjvng thoq masyah dyuk loh lo das zis nghuot, ge.
8 Hwankti ka nyang lyis, Ngos lyis yvwons dyei aq. Nvng nah yhen pheh loh aq, nyang lyis hank ma yoh zangh das xiklyis ngos hauh zis lyis yoeuh das, ge.
9 Nyang toeuh zis gas, Yhensain eh, nhaiqshoqlang. Nvng ngos lyis pangh gvng mas yobos xo los lyis hauh yobos gas ngah thoq mas nghuot bas jungh, ge.
10 Hwankti ka, Hauh cho vchiq. Dvyuk yuk tyi lhyi nyamoq lyis ngah jyank shwih los aq. Nyamoq ma doms lop lo das oen ngos nvng lyis kanghjyoeng yoh kat, ge.
11 Nyang taiq zis gas, Nvng hank lyis eq ngah lo lyis lvto ma phuk nhang das xiklyis Yhensain, nah Mangso mha mau jenh khi toh aq. Ngos suih thuq cho ma o lo, ge. Hwankti taiq zis gas, Yhensain dwis nyeis zis yah dvyhangteh nah lo dah cam dvkhvt eq nyeisjvng mas yoh gyoh das zis ma nghuot, ge.
12 Vmesbih gas, Ngos nvng lyis nah cho dvja nyei das toeuh jens dyei aq, ge. Nyang gas, Taiq aq, ge yomdyei.
13 Hauh vmesbih toeuh zis gas, Nvng ngah xiklyis kuot das ge ngos lyis dangthoengh toh zis yah dvyhangteh Mangso dah dius dvnganh lyis yoh kuot nyhoq chamus ma kuot? Haih nghamh thyet cho kuot yvmas nvng gas nvnyang yobos yoh cho lhyi tuonh shet goeus: khasoeh ge lyis khat thuq xauh dah nah losain lhyi doms shwih yoeus das xiklyis nvng he goeus.
14 Thang thank lyis yang dvnganh gas shei chah. Yah kang ma doms yoh tsainh lo tsoh mas huot goeus dah jeis yah doeusgoh. Hauh gvng mas Mangso ka yang nyah jyank masyah gang loh lyis yang lyis tungh doms shwih yoeus. Nyang gas nyang yoeuh gomh bang dah kang lhyi we pheh ma shenh tyamp las nvng eq ma gis kuot!
15 Nghuot laus eq ngos ngah lo xiklyis nvng lyis los shangphu goeus: khasoeh ge lyis dius jens gas ngah kang yahge ngah lo dah kang lhyi kyuk tant. Ngos ngvnyang lyis taiq zo zis gas, Hwankti ngos lyis gyo dyei las
16 ngah metang lyis Mangso dah dius jens masyah thyuk tyamp das bang dah loq masyah toq kyoeu kat mvbeh.
17 Nghuot, hwankti ka ngah metang lhyi nyenstap dah ehnyet doms dyei das, oen taiq zo. Nvng gas Mangso dah loeuswons soeu teh nghuot las gis gang yoh gvn cho lhyi ngos seq. Yhensain, nah Mangso ka nvng yah dvgeh nghuot bas jungh.Ref 14.17: 2Sa 19.27
18 Hwankti toeuh zis gas, Ngos dvja seq mes, ge. Hauh vmesbih gas, Cha gah yhensain eh, ge nyei.
19 Hwankti ka, Nvng lyis Yoab heimha nhang kat vnghuot lah, ge. Vmesbih phuk taiq zis gas, Ngah yhensain hwankti, ngos khasoeh yoh he das lah? Nah jyank masyah hank eq cha ma yoh shung toh. Nghuot, Yoab ngos lyis nhang kat, ngos cha taiq das zis taiq kyoh kat.
20 Nah xikkhonh mas joq dah soe lhyi goh cho khyvlyis yah nyvng das xiklyis nyang housoeh kuot zis nghuot. Nghuot laus eq nvng gas Mangso dah loeuswons soeu teh joeui bos las, ngamoq mas bweh cho dvnganh lyis seqgyo, ge.
21 Housoeh hwankti ka Yoab lyis khi yoeus las taiq zis gas, Gis goeus, hauh loyvm phoq Absalom lyis loh shwih los aq, ge.
22 Yoab gas nyeisjvng mas dupaiq las hwankti lhyi nhaiqshoqlang sang. Nyang taiq zis gas, Ngah yhensain hwankti eh, nah jyeidwis dung zis kuot dyei yvmvyah nah jyeidwis gas nah nyoqlvtjvng mas nyoqnho yoh cho ngos seq, ge.
23 Housoeh Yoab gas Geshu pheh loh las Absalom lyis Yerusalem pheh shwih los.
24 Nghuot laus eq hwankti vmingh khyoq zis gas, Nyang nyah yhen mha loh tauh nyeis bas jungh, nghuot laus eq nyang ngah xikkhonh mas khanhamp eq ma gis los, ge. Housoeh las Absalom gas hwankti lhyi ma xauh nyvng.
Absalom lyis Yobos Khyuot
25 Israel dvnganh mas Absalom teh yungh las chungh chank bos soeu dvyuk eq ma nyeis: Nyang mas uhloms mas zis khyeiwu jweh shoq chah nos ma bos.
26 Nyah uhloms mas cam lyei yvmvyah zvn yau zvn, zvn thang pheh nyang cam thyet las laiq lyis hwankti jvng yah dvyhangteh 5 paung bos.
27 Absalom mas loloeu somh yuk, lonyi dvyuk bos. Nyah lonyi nyings gas Tamar ge. Nyang svsoh yungh.
28 Absalom gas Yerusalem mas aiq zvn dyingh shoq nyeis goeus laus eq hwankti nyoqnho lhyi ma nyvng.
29 Housoeh las Absalom gas nyah xiklyis Yoab lyis yah nyah vbah lyis shangphu nhang das xiklyis Yoab lyis khi kat, nghuot laus eq Yoab ma los. Absalom ka Yoab lyis aiq vlhain doms khi lyis eq nyang ma los.
30 Housoeh las nyang nyah jyeidwis lyis taiq zis gas, Yoab dah yos gas ngah yos nvm mas joq: bali kat toh, e ngheq kat geh, ge. Housoeh nyamoq gas Absalom vmingh dyei zis yah dvyhangteh nyah yos e ngheq kat.
31 Housoeh las Yoab gas Absalom jyank loh las, Nah jyeidwis jens chamus ngah yos ngheq kat, ge nyei.
32 Absalom phuk taiq zis gas, Hwankti ngos yah xauhgoh das zis ma toeuq lyis gas chamus ngos lyis Geshu mhayah doms shwih yoeus lah, oen ngos nvng lyis yah hwankti lhyi nyei nhang mes. Housoeh las ngos lyis hwankti yah xauhgoh nhang aq; ngos mas yobos bos lyis eq nyang ngos lyis sat bas jungh, ge.
33 Housoeh las Yoab gas hwankti lhyi Absalom taiq zis lyis loh taiq kyoh. Housoeh thang thank lyis Dawi gas doeuh tyamp toh dah nyah lo lyis khi lha Absalom hwankti xikkhonh mas loh dupaiq las Dawi eq Absalom lyis bvlot tanh.