12
Nathan Dawi lyis Nyho
1 Housoeh las Yhensain ka Nathan lhyi haih mvnyei Dawi lyis taiq kyoh nhang kat: Wus dvwus mas dius aiq yuk nyeis. Dvyuk gas dis las dvyuk gas nyungs.Ref 12.1: Chd 51
2 Dis soeu ka yvng, noeu nyoshoq yoh.
3 Nyungs soeu ka cha eq ma yoh, nghuot laus eq nyang uhkung yomkat kung lha wis nyhoeu toh dah yvng lo dvdoeu yoh. Hauh yvng lo lyis nyhoeu lha hauh yvng lo eq nyah lo jens yah eq dvgeh nyeis kuh los. Hauh yvng lo gas nyah khuq mas wom zo, nyah kom mha jeis shuk las nyah sainhkhonh khau mha yhet las nyah lonyi teh nghuot.
4 Dis soeu jyank mas boenghwus dvyuk jweh los las nyang gas boengh daih das xiklyis nyah yvng phung mha dah yvng sat das gungsthaiq hau nyungs soeu dah yvng lo lyis yoeus sat las nyah boengh lyis tsoh, ge.
5 Dawi gas hauh soeu lhyi nhaiq gis yo las Nathan lhyi taiq zis gas, Yhensain nyang nyeis zis yah dvyhangteh, housoeh kuot soeu ka jyoengh shei chah.
6 Nyang nhaiqnyen zis ma bos gvng mas nyungs soeu dah yvng lo khauh yvmvyah hauh nyungs soeu lyis yvng lo nyei doeu doms dyei chah, ge.
7 Nathan Dawi lyis taiq zis gas, Hauh soeu ka nvng nghuot. Yhensain, Israel dah Mangso heisoeh ge: Ngos nvng lyis coeu juot las Israel thoq mas hwankti toh, Saulo dah yomsoq masyah khyuot kat.
8 Ngos nvng lyis nyah yhen, nyah yhensain nyhiq jens yahge Israel mau, Yuda mau dyei goeus. Hauh zis ma tham lhyi ngos gohtoeu nyoshoq zes dyei shih das.
9 Nvng gas Yhensain dah tyingtoh dang lyis chamus ma phauh ma nyang kuot las nyah xikkhonh mas yaunos kuot. Nvng gas Hiti dius Uria lyis Amon dius jens lyis yah sat las nyah yhensain nyhiq lyis khauh yoeus.
10 Gvshih nvng ngos lyis ma phauh ma danh kuot las Hiti dius Uria dah yhensain nyhiq lyis nah yhensain nyhiq kuot yvmvyah nah vnyau gas sham jes yah vjangh xauh das.
11 Yhensain heisoeh ge: Yoeuh aq, ngos nah yhen mhayah nvng lyis jes kuot das dius thuq los nhang das. Ngos nah yhensain nyhiq jens lyis yoeus las gohtoeu vbusbih lyis dyei das. Nyang gas haih buis dah nyoqlvtjvng mas nah yhensain nyhiq jens yah yhet das.Ref 12.11-12: 2Sa 16.22
12 Nvng haih cho tsoek yah gauh kuot laus eq, ngos Israel dvnganh xikkhonh, buis mas kuot das, ge.
Dawi Nyah Yaunos Rhen
13 Dawi gas Nathan lhyi, Ngos Yhensain lhyi cu goeus, ge.
Nathan Dawi lyis taiq zis gas, Yhensain eq nah yaunos lyis khyuot dyei goeus, nvng haih yaunos gvng mas ma shei das, ge.
14 Nghuot laus eq nvng housoeh shuot las Yhensain dah jes jens nyang lyis ma phauh ma nyang, loeusmus soqzo gus yoh nhang yvmvyah nah xiklyis khoeu los das lo gas jyoengh shei das, ge.
15 Nathan ka nyah yhen pheh tauh loh.
Dawi lo Shei
Hauh thang lhyi Yhensain yaudyei las Batsheba dah lo gas nos changh nyeis.
16 Dawi gas lo doeng das xiklyis Mangso lhyi dung. Nyang womkyi lha nyens gonh tsoh mas lhain toh.
17 Mau mas dah uhshe bang nyang lyis toq las wom zo das xiklyis khyoeuq, nghuot laus eq nyang he.
18 Hauh thang lhyi nyhet vnyeih lyis loshang shei tyamp. Nghuot laus eq Dawi dah joeui dyei bang gas nyang lyis loshang shei cho ma womh taiq kyoh. Nyamoq taiq zis gas, Loshang nos nyeis lyis nyang svsoh nhaiq ngis. Yang loshang shei cho nyang lyis taiq kyoh lyis nyang nyah gungs nyang cha toq kuot das, ge.
19 Nghuot laus eq Dawi gas nyamoq tsoek tsoek taiq goh zis nyvng las loshang shei goeus cho seq yoeuh. Housoeh las Dawi gas nyamoq lyis, Loshang shei goeus lah, ge nyei.
Nyamoq gas, Shei goeus, ge.
20 Housoeh Dawi gas tsoh masyah toq las gungs cheih, coeu juot, dyimis thaiq lholha Yhensain dah yhen mha wvng las paiq. Hauh thang lhyi nyang hwankti yhen pheh tauh los las wom zo.
21 Nyah joeui dyei bang gas mauh. Nyamoq gas nyang lyis, Ngamoq nvng lyis ma daq yoeuh, ge. Loshang kang dwis shih lyis gas nvng ngaus las wom zo das zis he. Nghuot laus eq gvshih loshang shei goeus, nvng kukxi cho no tyamp las wom doms zo nyeis, ge.
22 Nyang taiq zis gas, Loshang dwis nyeis shih lyis ngos womkyi lha ngaus: khasoeh ge lyis Yhensain ngos lyis nhaiqnyen las loshang lhyi kang dyei das, ma dyei das zis hank yoh taiq oen nghamh.
23 Gvshih gas loshang shei goeus, ngos chamus womkyi chah lah? Loshang lhyi yoh shwih tauh los das lah? Ngos nyah jyank mas loh das, nghuot laus eq nyang ngah jyank mas ma tauh los, ge.
Solomon Khoeu los
24 Housoeh Dawi gas nyah yhensain nyhiq Batsheba lyis nhaiqtaink zis yah nyang yah wvng yhet las nyang loloeu dvyuk bos. Nyang nyah nyings lyis Solomon ge nyhink. Yhensain eq nyang lyis jyet las,
25 lvpe Nathan lyis yah nyang lyis Yedidia Yhensain dah jyetdap soeu, ge nyhik. Khasoeh ge lyis Yhensain nyang lyis jyetdap.
Raba Wus Yoh
(1Ss 20:1-3)
26 Hauh uhlyis Yoab yahge Israel jesphung ka nyamoq Amon dius jens dah wumuh Raba lyis lhaink nyeis yvmas ung cho yoh.
27 Yoab Dawi jyank mas loeuskyoh bang nhang lha taiq zis gas, Ngos Raba wus lyis zan las hauh wus dah jeis dyei joqyos lyis xauh yoeus goeus.
28 Housoeh las gvshih nvng nyet shih dah jesphung lhyi tsom lha hauh wus lyis tyeh zan yoeus aq. Housoeh lyis hauh wus lyis zan ung ge dah nyings ngah gungsthaiq nvng yoh das.
29 Housoeh las Dawi gas nyet dah nyah jesphung lhyi Raba wus pheh shwih loh las hauh wus lyis zan yoeus.
30 Nyang gas hwankti uhloms masyah buismuk lyis yoeus. Hauh zis gas nyhetci oeng paung lyei las xing yahge phauhdap luk yah kuot toh. Hauh zis lyis Dawi dah uhloms mas tsungh dyei. Nyang hauh wus masyah lvnyhvp eq vbomsdom xauh yoeus.
31 Houmha dah dius jens lyis shwih yoeus las kywizoe kywi muh, thyeq shonh, thyeq wuzung kuot yvmas, mu phuot yvmas tsain toh. Houka Dawi Amon wus dvnganh lyis joeu cho nghuot. Hauh thang lhyi Dawi yahge nyah jesphung Yerusalem pheh tauh los.