10
Amon yahge Siria lyis Ung
(1Ss 19:1-19)
Hauh thang ma nyangh lyis Amon hwankti Nahash shei lha nyah joqyos mas nyah lo Hanun guon nyeis. Dawi taiq zis gas, Hanun dah uwus Nahash ka ngos lyis jyehjuh kuot goeus las ngos nyah lo Hanun lyis jyehjuh chixoeuq das, ge. Housoeh nyah uwus yah sen cho mha nhaiqtaink das xiklyis Dawi gas nyah jyeidwis jens lyis nhang kat.
Dawi dah jyeidwis jens gas Amon dius jens dah mau mas jweh e lhyi, Amon dius joeui dyei bang nyamoq dah hwankti lhyi taiq zis gas, Dawi gas nvng lyis nhaiqtaink bang nhang kat yvmvyah nyang nah uwus lyis jyoengh phauh nyang oen nghamh lhyeh? Dawi gas haih wus lyis yoeuh das, choq das, thyoq das ge nyah jyeidwis jens dvnhang kat ma nghuot lhyeh?
Housoeh yvmvyah Hanun gas Dawi dah jyeidwis jens lyis nyhik yoeus las nyamoq dah nhuotmi dvkhyamh khyamh yuk, dyi lyis eq chuknauh mas jweh shoq lhyamh phank las doms nhang kat. Hauh bweh goeus cho Dawi xauhgyo lyis nyang loeuskyoh bang nhang lha tying kat zis gas, Namoq svsoh xoq das las Yerikho wus mas namoq nhuotmi xing shoq loh nyeis las tauh los geh, ge.
Housoeh Amon dius jens gas nyamoq Dawi lyis nhaiq svsoh lhoq yo goeus yvlyis sohseq lyis, dius tsain nhang lha khyei cho jeslo lyis Bet Rehob mas dah Siria yahge Zoba mas dah Siria jens jyank masyah aiq mons yuk, Hwankti Makha jyank masyah dvkhyoengh yuk, Tob mau masyah dvmons aiq khyoengh yuk nghoh. Dawi hauh zis xauhgyo lyis nyang gas Yoab yahge Israel jesphung dvnganh hauh bang lyis zan das xiklyis nhang kat. Zoba, Rehob mas dah Siria dius, Tob yahge Makha mas dah dius jens gas jeszan das xiklyis pa mha joqyos yoeus nyeis lyis Amon dius jens gas jens thuq los las wus khomh mas yap.
Yoab gas xik pheh, nungs pheh jes bos zis nyvng lyis Israel jeslo mha gis thank bang lyis Siria bang yah zan das shot pheh khyen kat. 10 Nyet bang lyis gas Amon dius jens lyis zan das shot, nyah vnoeuh Abishai lyis kyauh kat. 11 Nyang taiq, Siria jens zan ung los nyeis lyis gas nvng ngos lyis los bos pangh aq. Amon jens zan ung los nyeis lyis gas ngos nvng lyis los bos pangh das. 12 Yomhuont aq, yah dius jens yahge yah Mangso dah wus jens lyis khyuot kat das xiklyis womh womh zan-goh. Yhensain nhaiqdoeus cho bweh bas jungh, ge.
13 Yoab gas nyah jesphung yah dvgeh Siria jesphung lhyi zan lyis Siria jens phang loh goeus. 14 Siria jens phang loh nyeis yvlyis Amon jens nyvng lyis, nyamoq eq Abishai xikkhonh masyah wus khau mha cangh wvng loh. Jeszan khyomp dye thang lhyi Yoab gas Yerusalem pheh tauh loh.
15 Gvshih Siria jens gas Israel jens lyis nyamoq somh zis sohseq. Housoeh las nyamoq doms huom uhlyis, 16 nyamoq gas Uphrat lvng thyitvp pheh nyeis Hadadezer uhshe dah Siria jesphung jens yah tsoq goh. Hauh jesphung jens gas Hadadezer dah jesphung dvnganh lyis uhshe dah jeszau Shobak uhshe zis yah Helam mas jweh los. 17 Dawi hauh bweh nyeis cho lhyi xauhgyo lyis, nyang Israel jens dvnganh lyis tsainh las Yodan lvng goeu khoq las Helam wus mas shwih jweh loh. Houmha Siria jens jeszan das joqyos yoeus las Dawi lyis jeszan. 18 Nghuot laus eq Siria jens gas Israel xikkhonh masyah doms tsain phang. Haih vlhain lhyi Dawi gas Siria nyang lhyingh nyhet xo komp bang, nyang ji bang jeslo nyei mons lyis sat. Siria jens dah jeszau Shobak lyis eq zangh las nyang houmha shei. 19 Hadadezer yahge nyang lyis pangh dah Siria hwankti jens dvnganh gas nyamoq lyis Israel jens yah ung yvlyis sohseq lyis, nyamoq Israel yah nyenstap cho kuot las jyeidwis mus. Hauh thang lhyi Siria jens Amon jens lyis ma womh pangh lo.