SAMUEL AIQ VBUK
(2 SAMUEL)
Dawi dah kang dwis cho yahge nyah ung cho gas Israel dius jens dah nhaiq mas goeng goeng zuk joq. Housoeh las Israel dius jens thang pheh dvmau gonh nhaiqngis nyoq yaus cho xauh los uhlyis Dawi dah lo, Dawi dah vnyau vshih, Dawi teh dah hwankti dvyuk doms yoh das xiklyis svsoh tsain o.
1
Saulo Shei cho Taiq
1 Saulo shei thang lhyi Dawi gas Amalek jens lyis sat masyah tauh los las Ziklag mas aiq nyeih nyeis goeus.
2 Somh vnyeih lyis dius dvyuk gas dyi langchuiq, nyah uhloms mas tsoh lhyauq las, Saulo dah dvp masyah los. Nyang Dawi jyank mas jweh las nyeisjvng mas dupaiq gop joq.
3 Dawi nyang lyis nyei zis gas, Nvng khalhye yah los, ge.
Nyang gas, Ngos Israel dvp masyah luiq los, ge.
4 Dawi nyang lyis taiq zis gas, Bweh goeus cho lhyi ngos lyis taiq kyoh aq, ge.
Nyang phuk taiq zis gas, Dius jens jeszan masyah phang, dius eq nyoshoq gyoh goeus: Saulo yahge Yonathan eq shei goeus, ge.
5 Dawi gas nyang lyis loeus los kyoh dah loyvm phoq lyis nyei zis gas, Saulo yahge nyah lo Yonathan shei goeus cho nvng khasoeh seq, ge.
6 Nyang lyis los taiq kyoh dah loyvm phoq taiq zis gas, Ngos Gilboa boms mas zangh jweh loh lyis , Saulo ka nyah lham mha nges toh, jes lhyingh yahge nyang ji bang gas nyang lyis gyen gyen chank khat los.Ref 1.6-10: 1Sa 31.1-6; 1Ss 10.1-6
7 Nyang nungs pheh lhain yoeuh las ngos lyis nyvng lyis nyang ngos lyis lui. Ngos eq, Ngos heimha nyeis oen toeuh goeus.
8 Nyang ngos lyis taiq zis gas, Nvng hank nghuot, ge. Ngos nyang lyis phuk taiq zis gas, Ngos Amalek dius nghuot, oen.
9 Nyang ngos lyis doms taiq zis gas, Ngos lyis los jenh sat aq, ngah kang ma dyet shih las shanghsenh nyeis, ge.
10 Lains thang lhyi ka kang ma yoh dwis lo yvlyis ngos seq yvmvyah ngos nyang lyis loh sat. Nyah uhloms mas dah buismuk yahge nyah loqyom mas dah thoengh phaiq las nvng yhensain jyank chi los, ge.
11 Housoeh Dawi gas kuk las nyah dyi dvp langchuiq, nyah dius jens dvnganh eq housoeh kuot.
12 Saulo yahge nyah lo Yonathan eq, Yhensain dah dius jens eq, Israel jens jeszan yvmas sat zis xauh yvmvyah nyamoq gas nyenhthang jweh shoq kuk, ngaus las wom eq tsain kyi.
13 Dawi gas hau loeus los kyoh soeu lhyi, Nvng khalhye yah los, ge.
Nyang eq, Ngos gas nah mau mas nyeis dah Amalek dius nghuot, ge.
14 Dawi nyang lyis taiq zis gas, Yhensain dah coeu juot zis xauh soeu lhyi sat das zis ma gyuk, nvng khasoeh nyang lyis womh sat lah, ge.
15 Dawi loyvm dvyuk lyis khi lha taiq zis gas, Haih soeu lhyi loh shung tyamp aq, ge. Hauh loyvm phoq nyah sham yah nyang lyis loh thauh sat.
16 Dawi nyang lyis taiq zis gas, Nah suih gas nah uhloms thoq mas joq bas jungh: khasoeh ge lyis Yhensain dah coeu juot zis xauh soeu lhyi ngos sat ge nah nhuot masyah kanghjyoeng kat goeus, ge.
Dawi dah Kuk nyingh
17 Dawi gas haih kukxi lvkhyank yah, Saulo yahge nyah lo Yonathan xiklyis kukxi.
18 Thang pheh nyang haih zis lyis Yuda jens dvnganh lyis jyauh das xiklyis taiq toh. Hauh zis lyis Lyei lvkhyank ge lui las Yasha maussauh mas lhaih toh.Ref 1.18: Yosh 10.13
19 Jing thoq mas, yah uhshe phvtang shei joq!
Jes thoeuqzoe jens gyoh tyamp goeus!
20 Philisti lonyi jens ma yoh gausyis bas jungh,
hauh loeus Gat wus mas vtaiq,
vthyoh ma tyomh dah lonyi jens ma yoh gauslaus bas jungh,
hauh loeus Ashkelon talhoeu mas vhoeuh.
21 Gilboa boms jens eh, namoq thoq mas jyweh ma gyoh bas jungh, mau eq ma wus goeus jungh,
houmha cha eq ma yuk bas jungh:
khasoeh ge lyis houmha thoeuqzoe dah gos ma lhoq lo;
Saulo dah gos gas khanhamp eq coeu yah buot zis ma xauh lo.
22 Saulo yahge Yonathan aiq yuk gonh
nyah phvtang dah yombos thank jeswus jens lyis sat.
Nyah phvtang ka jeszan masyah loq kom ma tauh los.
23 Saulo yahge Yonathan ka dwis nyeis lyis jyetdap, xamxonh,
shei loh lyis eq ma gang.
Nyah phvtang ka zonsmuh thoq lyis nyap, khangkhyi thoq lyis yombos.
24 Israel lonyi jens eh, Saulo xiklyis ngaus geh.
Nyang namoq lyis nes dah misseh yah huot las
namoq lyis xing yah shauq dyei goeus.
25 Jeszan yvmas thoeuqzoe jens gyoh goeus nyvng.
Yonathan eh, jing nyhang mha
26 Ngah vmang Yonathan eh, ngos nah gvng mas nhaiqngis nyoqyaus,
nvng gas ngah kangtwih nghuot.
Nvng ngos lyis jyet cho ka mauhphoh nghuot;
vmesbih jens dah jyetdap cho thoq lyis zes gis.
27 Thoeuqzoe jens gyoh tyamp goeus.
Nyamoq dah jeszan kyonhkhyi dyoqbis goeus.