8
Dius jens Hwankti Sang
Samuel mang goeus ya, nyah lo jens lyis Israel jens lyis soetuon das bang kuot nhang. Nyah lomons yuk dah nyings gas Yoel, aiq vyuk nyings gas Abiya nghuot. Nyah zomh gas Besheba mas soetuon vzomh kuot. Nghuot laus eq nyah zomh gas nyah zomh dah uwus cho chank ma suh, nyah zomh ngwis yoh das cho mha kyingh nhaiq wvng. Housoeh nyah zomh khauwhot zo zis yah soe lhyi jus khyvlyis ma thyet dyei.
Housoeh las Israel logis jens dvnganh huom lha Rama wus, Samuel jyank mas loh. Nyamoq taiq zis gas, Yoeuh aq, nvng mang goeus, nah lotang ka nah cho ma chank suh: housoeh las gohtoeu dius nyau jens dvnganh yhangteh ngamoq lyis guon das hwankti toh dyei aq, ge.Ref 8.5: Lyi 17.14 Nyamoq hwankti dyei aq ge sang yvlyis Samuel nhaiq ma gyo tap. Housoeh las Samuel Yhensain lhyi shvmanh dung. Yhensain Samuel lyis taiq zis gas, dius jens nvng lyis taiq zis dvnganh gyo dyei aq: nyamoq nvng lyis ma tyamp, Ngos nyamoq dah hwankti nghuot yvlyis peq zis dvnghuot. Ngos nyamoq lyis Egutu masyah khyuot shwih los nyeih masyah khvnyhik jweh shoq nyamoq Ngos lyis tyamp las gohnyau bang dah mangso lyis phuqsoe. Nyamoq Ngos lyis kuot teh, gvshih nvng lyis kuot nyeis. Housoeh las gvshih nyamoq dah dang gyo dyei aq. Nghuot laus eq toptop taiq kyingh las nyamoq lyis guon das hwankti jens nyamoq lyis khasoeh kuot das cho phui kyoh aq, ge.
10 Samuel gas nyang lyis hwankti sang bang lyis Yhensain dah dang dvnganh taiq kyoh. 11 Samuel phui kyoh zis gas, Heika namoq lyis guon das hwankti namoq lyis kuot nhang das cho nghuot. Nyang namoq dah loloeu jens lyis nyah jeslo kuot nhang das; gohtoeu dvyhamh lyis gas nyah jes lhyingh xik pheh wuih nhang das. 12 Tsai, gohtoeu dvyhamh lyis gas dius dvkhyoengh lyis guon das zau, oengci lhyi guon das zis toeuq toh das. Namoq dah loloeu jens dvyhamh lyis nyah danh zwi, yos zwi, nyah jyo yhomh das zis yahge nyah jes kyonhkhyi, nyah jes lhyingh tsuk das xiklyis toeuq kat das. 13 Namoq dah lonyi jens lyis eq shwih yoeus las, xangh kuot cho, zo shuk ba sont cho, jyauq cho, ohlhyoq piq cho mha toeuq kat das. 14 Namoq dah gis thank danh, zvbiq khyam, tsanlun khyam mhayah gis thank zis yoeus las nyah zau jens lyis dyei das. 15 Namoq dah jyo yahge zvbiq ciboms dvboms yoeus las nyah hwankti yhen mha dah zau jens yahge gohtoeu zau jens lyis dyei das. 16 Namoq dah jyeidwis jens, gis thank dah noeunoteGreek noeu lyis, Hebre mas, loyvm ge toh. jens, mauhlyihzoe yoeus las nyah muh zwi nhang das. 17 Namoq dah yvng phung ciboms dvboms yoeus das. Namoq nyang eq nyah jons duot loh das. 18 Namoq khyen yoeus dah hwankti gvng mas hauh nyeih lyis namoq kaiq ngaus laus eq Yhensain ka ma gyo dyei, ge.
19 Nghuot laus eq dius jens gas Samuel dah dang ma gyo dyei. Ma nghuot, ngamoq lyis guon das hwankti o. 20 Ngamoq eq gohnyau bang hwankti yoh teh yoh las ngamoq dah hwankti ngamoq lyis guon las jesbos lyis shwih uhshe zan das, ge. 21 Housoeh Samuel gas dius jens dah dang dvnganh gyo yoeus las Yhensain lhyi loh taiq kyoh. 22  Yhensain Samuel lyis taiq zis gas, Nyamoq cha o cha kuot dyei aq. Nyamoq lyis hwankti toq dyei aq, ge. Hauh thang lhyi Samuel Israel jens lyis, Namoq hank eq hank nyang wus mas loh geh, ge.