3
Samuel lyis Thuq Xoeuq
Loshang Samuel gas Eli jyauhhuh dah o mha Yhensain dah muh wons wuq nyeis. Hauh zaih lyis Yhensain dah dang svsoh lo jweh nain loh, nyah jyank masyah nyoqnyvng eq wui loh nyeis. Dvnyens gas Eli nyah joqyos mas yhet joq: Nyah nyoq gos goeus las ma nyvng. Samuel gas Mangso dah Thanghchvp Kwi joq dah Yhensain yhenmuh mas yhet joq. Nyoq ma nyvng shih, nyibung duk nyeis shih lyis, Yhensain ka Samuel lyis lui las nyang gas, Ngos nyeis, ge toeuh. Nyang Eli jyank wuih loh las taiq zis gas, Nvng lui las los, ge.
Nghuot laus eq Eli gas, Ngos ma lui, loh doms yhet aq ge lyis, nyang loh yhet.
6-7  Yhensain ka, Samuel ge doms lui. Samuel gas Yhensain lhyi ma seq shih, Yhensain dah dang nyang lyis chixoeuq zis eq ma seq shih. Samuel eq toq las Eli jyank loh las, Nvng ngos lyis lui las los, ge.
Nghuot laus eq, Eli phuk taiq zis gas, Vlo eh, ngos ma lui, doms yhet aq, ge. Yhensain ka Samuel lyis somh vlhain doms lui. Hauh uhlyis nyang toq las Eli jyank loh taiq zis gas, Nvng ngos lyis lui las los, ge.
Housoeh Eli gas Yhensain ka hauh loshang lhyi lui ge zis soh. Housoeh las Eli Samuel lyis taiq zis gas, Loh yhet aq, Nyang nvng lyis lui lyis, Yhensain eh taiq aq, nah jyeidwis gyo nyeis oen taiq aq, ge. Housoeh Samuel eq nyah joqyos mas loh yhet.
10  Yhensain eq xikpheh vgus los yap las Samuel, Samuel ge lui. Hauh uhlyis Samuel taiq zis gas, Nah jyeidwis gyo nyeis, taiq aq, ge.
11  Yhensain Samuel lyis taiq zis gas, Ngos Israel mas dvn phoh muh dvja kuot das. 12 Eli yhenbang lyis tyi lha ngos taiq zis yah dvyhangteh hauh nyeih mas ngos kuot das, xi lho lha vthang sau das. 13 Nyah lo tang ka Mangso lhyi loeusmus soqzo nyeis zis lyis nyang seq laus eq, ma jyauh ma tomp nyeis yvmvyah, nyah yhenbang mas ngos vjangh yah yau dyei das oen taiq goeus. 14 Housoeh las Eli yhenbang dah yaunos gas phudyei yahge jyungshuk yah ma yoh gai, vjangh joq chah oen ngos maukhi goeus, ge.
15 Samuel gas nvpyo jweh shoq yhet lho lha Yhensain dah yhen khomh phank. Samuel gas hauh nyoqnyvng Eli lyis ma womh chixoeuq. 16 Housoeh Eli gas Samuel lyis khi lha taiq zis gas, Ngah lo Samuel eh, ge.
Nyang gas, Nyeis ge toeuh.
17 Eli gas, Yhensain nvng lyis cha taiq? Ngos lyis vzauh toh. Nyang nvng lyis taiq zis dvja ja zauh toh lyis gas Yhensain taiq zis thoq lyis nvng lyis zangh bas jungh, ge. 18 Samuel gas cha eq ma zauh toh lo, dvnganh taiq kyoh. Eli eq, Haih zis gas Yhensain nghuot, nyang bauh khyvlyis ngos lyis kuot bas jungh, ge rhen.
19 Samuel bes los teh, Yhensain eq nyang yah dvgeh nghuot las Samuel taiq dang dvnganh lyis jyoengh bweh los nhang. 20 Housoeh nyang gas Yhensain dah lvpe nghuot yvlyis Israel dvmau gonh seq. 21  Yhensain ka Shilo wus mas doms nyvng xoeuq: khasoeh ge lyis Yhensain ka nyah dang yah Shilo mas Samuel lyis nyah gungs chixoeuq. Samuel dang lyis Israel dvnganh seq loh.