25
Samuel Shei
Samuel shei lha Israel jens dvnganh zophuom zis yah nyah xiklyis ngaus las Rama wus nyah yhen nvm mha nyhop.
Dawi yahge Abigai
Hauh thang lhyi Dawi gas Paran mhanhdyvp pheh toq loh. 2-3 Hauh uhlyis Maon wus mas nyeis las Khamel wus nvm mas maunyeis yoh dah Khaleb vhuh mas Naba ge dah dius dvyuk nyeis. Nyang gas svsoh dis, yvng somh khyoengh, shvbeq dvkhyoengh yoh. Nyah yhensain nyhiq Abigai gas yik, yungh eq yungh soeu nghuot. Nghuot laus eq Naba gas nhaiqlom than lha ma gis zis seq kuot thuq.
Gvshih Naba gas Khamel mas nyah yvng lyis mauh gom nyeis. Mhanhdyvp mas nyeis dah Dawi gas Naba cho lhyi xauhgyo. Housoeh Dawi gas nyah loyvm jens dvci yuk lyis nhang lha taiq zis gas, Khamel mas loh las Naba lyis ngah nyings masyah jeshuh geh. Namoq hau yoh khuiq soeu lhyi heisoeh oen taiq geh: Nvng eq, nah yhenbang eq, nvng yoh zis dvnganh mas eq nyenstap bas jungh. Nvng yvng mauh gom nyeis cho ngos xauhgyo. Nah yvng yoeuh bang ngamoq yah Khamel nvm mas nyeis uhlyis, ngamoq nyamoq lyis cha ma nos nhang. Nyamoq zis dvja eq ma khauh dyuk. Nah loyvm jens lyis nyei lyis nyamoq jus cho taiq das. Ngamoq pwe buisnyeis jweh los las ngamoq lyis nhaiqnyen zis yah lhom yoeus aq, ge Dawi sang kat. Ngamoq nah jyeidwis jens yahge nah jyetdap dyenschangh Dawi lyis nvng yoh zis lyis jenh dyei kat aq, ge.
Dawi dah loyvm jens jweh las Naba lyis Dawi taiq kat dang dvnganh dye taiq las nyamoq houmha langh nyeis. 10 Naba toeuh zis gas, Dawi ge soeu hank nghuot? Yese dah lo, nyang hank nghuot ge? Gvshih uhlyis yhensain jyank masyah phang loh dah jyeidwis jens nyo! 11 Ngos ngah yvng mauh gom bang xiklyis sat toh ngah shoh ngah zos, ngah jeis yoeus las ngos ma seq bang lyis dyei das lah, ge.
12 Dawi dah loyvm jens tauh loh las hauh dang dvnganh Dawi lyis taiq kyoh. 13 Dawi nyah sham yoeus wons uhlyis yah nyah dius jens lyis taiq zis gas, Hank eq hank sham yoeus wons geh, ge lyis dvnganhmoq hank eq hank sham yoeus wons. Housoeh Dawi yah nyeixo yuk doq loh. Aiqxo ka kyahsoe joq yvmas nyeis.
14 Hauh gyo lyis loyvm dvyuk Naba dah yhensain nyhiq Abigai lyis loh taiq zis gas, Yoeuh aq, Dawi mhanhdyvp masyah, ngamoq dah yhensain lhyi jeshuh das xiklyis loeuskyoh bang nhang lhyi, ngamoq dah yhensain ka nyamoq lyis laihwangh. 15 Hauh bang gas ngamoq lyis cha ma nos nhang, nhaiq svsoh bos. Ngamoq mhanhdyvp mas nyamoq yah dvgeh nyeis yoq lyis, cha eq ma khauh thyuk loh. 16 Ngamoq yvng yoeuh las nyamoq yah dvgeh zomh nyeis yoq lyis nyeih nyenh vjangh yah ngamoq lyis gomh dyei. 17 Housoeh las gvshih nvng khasoeh kuot das zis nghamh yoeuh las nghamh thyet aq. Ngamoq dah yhensain yahge yhen mha bang dvnganh lyis thyoq das ge xam nyoq goeus. Nyang gas ehnyet than soeu nghuot las nyang lyis hank ma yoh taiq, ge.
18 Housoeh las Abigai gas, Ohlhyoq aiqxo, zvbiq aiq tyvp, sat kank toh dah yvng oeng doeu, lvmih buk oeng pvn, zvbiq kyuk dvxo dyoms, maiphang lhyoq aiqxo lhyi mauhlyihzoe lyis lvnyap ba huon lha, 19 nyah jyeidwis jens lyis taiq zis gas, Namoq xik pheh loh langh geh, ngos chank los das, ge. Nyang nyah yhensain phoq Naba lyis gas ma taiq.
20 Housoeh nyang gas jing khyei guih mas mauhlyihzoe ji loh nyeis lyis Dawi yahge nyah dius jens gyoh los zis yah nyetlos nyettant loh xauhgoh. 21 Ma xauhgoh shih lyis Dawi taiq zis gas, Jyoengh hauh soeu dah zisyos dvkoeuq eq ma dyuk shoq mhanhdyvp mas nyang sain zis dvnganh lyis ngos vkom zungh tyamp goeus nyvng. Ngos gis kuot yvlyis nyang ngos lyis ma gis khyvlyis kuot goeus nyvng. 22 Nvpyo nyoq nyvng lyis Naba yah sen bang mas yukgis dvyuk yuk lyis nyhet toh lyis gas Mangso ngos lyis sat bas jungh, ge goeus.
23 Abigai Dawi lyis nyvng lyis mauhlyihzoe thoq masyah lvnyap gyoh las Dawi xikkhonh mas nyeisjvng jweh shoq dupaiq. 24 Nyang nyah khyeiyang mas gyoh las taiq zis gas, Ngah yhensain eh, hai shuot cho dvnganh ngah thoq mas toh aq. Ngah dang jenh gyo dyei aq. 25 Ngah yhensain eh, hai phyiqkhyi ma gis soeu Naba lyis vjenh nghamh, nyah nyings gas nyah ehnyet yah phi, nyah nyings gas Naba, nyah ehnyet eq vkoh vpaqnoteHebre Naba vjyuk vkoh vpaq ge. nghuot. Nah jyeidwis jens jweh los uhlyis ngos ma nyeis jus. 26 Housoeh las ngah yhensain eh, nvng nah jeswus lyis ma sat bas jungh, lvto ma phuk bas jungh ge Yhensain nvng lyis tung toh. Nah jeswus yahge nvng lyis ma gis khyvlyis kuot mes bang gas Naba teh joeng zis xauh bas jungh oen dwis nyeis Yhensain mha gvshih ngos maukhi. 27 Yhensain eh! Ngos chi los dah jyungshuk lyis jenh lhom yoeus las nah thang mha chank yenh dah loyvm jens lyis gvm dyei aq. 28 Ngos nvng lyis dvja ja cu goeus lyis eq ngos lyis yobos khyuot dyei aq. Nvng Yhensain shot jeszan goeus yvmvyah, nvng eq, nah vnyau vshih jens eq hwankti bweh das. Nah dvcaiq gonh nvng lyis yobosnoteNvng cha yobos eq kuot das zis ma nghuot. Nghuot ya Nvng lyis yobos huon dais eq ma bos das. huon dais eq ma bos das. 29 Nvng lyis sat das ge chank khat bang bos laus eq nvng gas Yhensain, nah Mangso dah yoeuh gomh khau mha gau joq, phauhdap zisyos koek lyis zungh teh Mangso ka nah kang lhyi zungh. Nah jeswus dah kang lhyi ka panh masyah panh doeuh kat dah luk lom teh dyuk tyamp das. 30 Housoeh Yhensain ka nah cho taiq toh dyei zis bos goeus zis yah dvyhangteh dvnganh yah tyink dyei las nvng Israel hwankti bweh los uhlyis, 31 nvng gas soe ma bos yvmas dius kang zangh khyoq, vsainnyang ehnyet chank las lvto phuk yvmvyah auhuiq nhaiqkuk las vsainnyang gungs lyis yobos huon chank bos nyeis das zis nvng mas ma bos bas jungh. Yhensain ka nvng lyis nyeisgis yaplhoq nhang uhlyis ngos lyis eq jenh soh dyei aq, ge.
32 Dawi Abigai lyis taiq zis gas, Khvnyhik ngos yah xauhgoh bas jungh ge nvng lyis nhang dah Yhensain, Israel dah Mangso ka ngelhoq bas jungh. 33 Nvng dyei dah joeui xiklyis Mangso lhyi nhaiqshoqlang. Khvnyhik ngos dius kang khyoq das zis ma loh das cho, ngah ehnyet chank las lvto ma loh phuk das cho los taiq tung soeu nvng eq ngelhoq bas jungh. 34 Nvng ngos yah lvnyap ma los xauhgoh lyis gas, jyoengh nvpyo nyoq nyvng lyis gas, Naba yukgis lo dvyuk lyis eq ma nyhet toh lo oen, nvng lyis ma los thyoq das xiklyis tung toh dah Yhensain, Israel Mangso mha ngos maukhi toh. 35 Dawi gas nyang chi los dah jyungshuk lyis nyah loq masyah lhom yoeus las nyang lyis taiq zis gas, Nah yhen pheh nyenstap zis yah loh aq. Nah nyoqnho ngelang lyis yoeuh las nvng sang cho kuot das, ge.
36 Abigai eq Naba jyank mas jweh lyis, Yoeuh aq nyang gas hwankti dah pwe teh yhen mha pwe kuot las nyang yhei dvyet nyeis yvmvyah nyang svsoh pyo nyeis. Abigai eq nungsnvp nyoq nyvng shoq nyang lyis Dawi yah loh xauhgoh khoq cho cha ma taiq kyoh. 37 Nyoq nyvng los las Naba yhei yet bi lyis hauh cho nyang lyis taiq kyoh. Housoeh nyang sainh cauq lha gungsjen shei. 38 Hauh thang lhyi dvci nyeih ko lhyi Yhensain Naba lyis sat las nyang shei goeus.
39 Dawi Naba shei cho xauhgyo lyis nyang taiq zis gas, Ngos xauh dah jwangh cho lhyi yoeuh dyei las Naba loq masyah khyuot yoeus las nyah jyeidwis ngos lyis yaunos masyah lhuiq kat dah Yhensain lhyi chungh. Naba kuot dah yaunos lyis Yhensain ka nyah uhloms thoq mas tauh dyei, ge. Housoeh Dawi gas dius nhang lha Abigai lyis shoeuh das xiklyis xam. 40 Dawi dah jyeidwis jens Abigai nyeis Khamel mas jweh las taiq zis gas, Dawi gas nvng lyis shoeuh das xiklyis ngamoq lyis nhang, ge.
41 Housoeh nyang nyeisjvng mas toq dupaiq las taiq zis gas, Yoeuh aq, ngos gas ngah yhensain dah jyeidwis jens dah khyei cheih jyeidwis nghuot bas jungh, ge. 42 Housoeh Abigai lvnyap toq las, nyah phiqkya nyhiq jens oeng yuk yah mauhlyihzoe ji zis yah Dawi nhang bang yah loh las Dawi dah yhensain nyhiq duot los.
43 Dawi gas Yezrel wus mas dah Ahinoam lyis yoeus toh. Gvshih Abigai eq Dawi dah yhensain nyhiq bweh los. 44 Hauh uhlyis Saulo ka nyah lonyi, Dawi dah yhensain nyhiq Mikha lhyi Galim mas Laish dah lo Palati lyis dyeizo tyamp.Ref 24.14: 1Sa 26.20