24
Dawi Saulo lyis Lhuiq
Saulo Philisti jens lyis khat masyah tauh los lyis nyang lyis taiq langh zis gas, Yoeuh aq Dawi gas Engedi mhanhdyvp mas nyeis, ge. Housoeh Saulo ka Israel dvnganh masyah gis thank dius somh khyoengh khyen shwih las Beq Lamh Luk jens mas Dawi yahge nyah dius jens lyis xo das ge loh. Cho nvm yvng zungs jens yah ma we yvmas bos dah luk-uk dvkoeuq mas jweh lyis, Saulo ka nghe loh das ge hau luk-uk khau mha wvng loh. Dawi yahge nyah dius jens gas hauh luk-uk khau vtheh mas nyeis.Ref 24.3: Chd 57 (Dang jyung); Chd 142 (Dang jyung) Hauh uhlyis Dawi dah dius jens nyang lyis taiq zis gas, Yoeuh aq, nah jeswus lyis ngos nah loq mas kyauh das, nyang lyis nvng kuot mes khyvlyis yoh kuot das ge Yhensain nvng lyis taiq toh buisnyeis gvshih jweh los goeus, ge. Dawi gas xik pheh du loh las Saulo wuot dah dyithang lhyi tsoek yah lhyamh thyet yoeus. Housoeh Saulo dah dyithang lhyamh yoeus yvmvyah Dawi doms auhuiq. Nyang nyah dius jens lyis taiq zis gas, Yhensain coeu juot dyei zis xauh dah ngah yhensain ka Yhensain khyen dah hwankti nghuot yvmvyah, nyang lyis zangh das zis ngah loq lyis Yhensain tomp bas jungh, ge.Ref 24.6: 1Sa 26.11 Saulo lyis zangh das zis vmingh ma dyei, tung toh.
Saulo eq toq las luk-uk masyah thuq loh. Hauh thang lhyi Dawi eq luk-uk masyah thuq las Saulo lyis chank kaiq zis gas, Ngah yhensain hwankti eh, ge. Saulo lhain yoeuh lyis Dawi gas nyah nyoqnho nyeisjvng mas jweh shoq gop las paiq. Dawi Saulo lyis taiq zis gas, Yoeuh aq, Dawi nvng lyis nos nhang das ge taiq bang dah dang chamus gyo nyeis? 10 Khvnyhik thyih luk-uk mas Yhensain ka nah gungs lyis ngah loq mas kyauh goeus yvlyis nvng nyvng goeus. Nvng lyis sat das zis ngah dius dvyhamh jyonh goeus laus eq ngos nah kang lhyi yu las, Nyang gas Yhensain dah coeu juot kham soeu nghuot. Nyang lyis sat das zis ngah loq khanhamp eq ma yings das, oen ngos taiq goeus. 11 Hauh thoq lyis ngah uwus eh, ngah loq mas dah hai nah dyithang chuqh lyis yoeuh aq. Ngos nvng lyis yoh sat laus eq, ngos haih zis kyingh dvthyet yoeus. Ngos nvng lyis tyixo gomloeus toq nghuot ya ngah loq nah thoq mas jweh das oen ma nghamh cho lhyi haih zis yah nvng yoh seq. Nvng ngos lyis sat das ge khat xo nyeis laus eq ngos nvng lyis cha ma cu ku. 12 Nvng yahge ngah jo mas Yhensain nghamh thyet bas jungh. Nvng ngos lyis shuot dah yobos gas Yhensain joeng bas jungh. Ngah loq gas nah thoq mas ma jweh bas jungh. 13 Nvng seq zis yah dvyhangteh gohlhain dah sangkhyangh mas, Lhung soeu loq masyah lhung dah soe thuq los, ge. Nghuot laus eq ngah loq gas nah thoq mas ma jweh das. 14 Israel hwankti hank lyis chank nyhik yenh lah? Nyang cha lhyi chank khat yenh lah? Khuih shei mvng lyis lah! Khvlhaih lyis lah!Ref 24.14: 1Sa 26.20 15  Yhensain ka soetuon das las nvng yahge ngah jo mas hank shuot zis lyis thyet dyei das. Nyang bweh cho lhyi yoeuh las ngos lyis gomh las nah loq masyah khyuot yoeus bas jungh, ge.
16 Dawi Saulo lyis housoeh dye taiq lyis, Saulo ka, Haih zis ngah lo Dawi dah thwe vnghuot lah, ge taiq las kaiq ngaus. 17 Nyang Dawi lyis taiq zis gas, Nvng ngah thoq lyis dan. Ngos nvng lyis ma gis khyvlyis kuot laus eq, nvng ngos lyis gis zis tauh dyei. 18 Nvng ngos lyis gis khyvlyis khasoeh kuot zis gas khvnyhik nvng chixoeuq goeus: khasoeh ge lyis Yhensain ngos lyis nah loq mas kyauh laus eq nvng ngos lyis ma sat. 19 Hank gas, jeswus vsainnyang dah loq khau mha nghuot joq lyis ma joeng joeng, kat kat lah? Khvnyhik nvng ngos lyis kuot dah nhaiqnyen shohgyo cho gvng mas Yhensain nvng lyis gis zis tauh dyei bas jungh. 20 Gvshih yoeuh aq, nvng hwankti jyoengh duot das zis eq, Israel munghdan nvng guon yoq lyis kuhxing jelvm los das zis eq ngos vlhomuh seq goeus. 21 Housoeh las ngah nyings yahge ngah yhenbang nyings ma chithyuk bas jungh, ngah vkoq lyis ma thyuk tyamp das xiklyis Yhensain nyings mhayah ngos lyis maukhi dyei aq, ge. 22 Housoeh Dawi gas Saulo lyis dangthoengh toh.
Hauh thang lhyi Saulo ka yhen pheh loh. Dawi yahge nyah dius jens gas nyamoq dah goeng jesdvp pheh tauh loh.