23
Dawi Keila Wus lyis Khyuot
1 Hauh thang lhyi nyamoq Dawi lyis taiq kyoh zis gas, Philisti jens gas Keila wus lyis los zan nyeis, jyo saiq yhomh toh zis lyis khauh yoeus nyeis, ge.
2 Housoeh las Dawi Yhensain lhyi nyei zis gas, Ngos hai Philisti jens lyis vloh zan das lah, ge.
Yhensain Dawi lyis taiq zis gas, Loh aq, Philisti jens lyis sat las Keila lyis khyuot yoeus aq, ge.
3 Dawi dah dius jens nyang lyis taiq zis gas, Yoeuh aq, yang Yuda mau mas gyuk. Hauh thoq lyis yang Keila wus, Philisti jens yah zan-goh lyis kha iq zes gyuk chah das lah, ge.
4 Dawi gas Yhensain lhyi doms nyei. Yhensain nyang lyis phuk taiq zis gas, Toq las Keila mas gyoh loh aq: khasoeh ge lyis ngos Philisti lyis nah loq mas kyauh das, ge.
5 Housoeh las Dawi gas nyah dius jens yah Keila mas loh las Philisti lyis zan. Nyamoq dah gaunyhauq yoeus, nyamoq lyis vbomsdom sat. Housoeh Dawi gas Keila dius jens lyis khyuot yoeus.
6 Ahimelek dah lo Abiatha ka Keila wus Dawi jyank mas phang los uhlyis, nyang ephod chi los.
7 Dawi Keila mas jweh cho Saulo lyis taiq kyoh los. Saulo taiq zis gas, Mangso ka Dawi lyis ngah loq mas kyauh los. Nyang gas khomh eq khomhkyank eq bos dah wus mas wvng las lhunk toh zis xauh nyeis, ge.
8 Keila wus mas jes toq las Dawi yahge nyah dius jens lyis lhaink das xiklyis Saulo ka nyah dius dvnganh lyis khi huom.
9 Saulo ka nyang lyis zan das ge gauh lhaink nyeis zis Dawi seq las, nyang phudyei Abiatha lhyi taiq zis gas, Hauh ephod heimha chi los aq. Mangso lhyi nyei yoeuh goh, ge.
10 Dawi gas, Yhensain, Israel dah Mangso eh, ngah gvng mas Saulo ka Keila mas los mhont das ge zis nah jyeidwis xauhgyo goeus.
11 Keila bang ngos lyis nyah loq mas vkyauh das lah? Nah jyeidwis xauhgyo zis yah dvyhangteh Saulo vgyoh los das lah? Yhensain, Israel dah Mangso eh, nah jyeidwis lyis jenh taiq kyoh aq, ge.
Yhensain taiq zis gas, Nyang gyoh los das, ge.
12 Dawi gas, Keila bang ngos yahge ngah dius jens lyis Saulo loq mas vkyauh das lah, ge.
Yhensain ka, Nyamoq nvng lyis kyauh tyamp das, ge.
13 Housoeh Dawi gas nyah dius khyukxo ko yah lvnyap Keila masyah thuq loh zis yah yoh phang jweh nyhoq tsain loh. Dawi Keila masyah phang luiq cho Saulo xauhgyo lyis, nyang ma chank khat lo.
Dawi Boms Mau mas
14 Dawi gas Zip boms mau, gau joqyos mas nyeis. Saulo nyeih yau nyeih xo laus eq Mangso ka Dawi lyis nyah loq mas ma kyauh.
15 Saulo ka Dawi lyis sat das xiklyis thuq los zis Dawi seq.
Dawi gas Zip mhanhdyvp Horesh mha nyeis.
16 Yonathan ka Dawi nyeis yvmas loh las Mangso dah gomh cho goeng toenk ge yomdyei.
17 Nyang lyis taiq zis gas, Vgyuk, ngah uwus Saulo dah loq nvng mas yoh jweh das zis ma nghuot. Nvng Israel hwankti xauh duot das. Ngos eq nah o mha dah zau nghuot das. Housoeh bweh los das zis gas ngah uwus Saulo seq toh, ge.
18 Housoeh nyah aiq yuk gas dvyuk yah dvyuk dyenschangh kau nghuot das ge gyingshang dangthoengh toh. Housoeh Dawi gas Horesh mas nyeis las Yonathan eq yhen pheh tauh loh.Ref 22.9-10: 1Sa 21.7-9; Chd 52 (Dang jyung)
19 Hauh uhlyis Zip bang gas Gibea wus Saulo jyank mas loh taiq zis gas, Dawi gas ngamoq dah mau Yeshimon dah mautyi shot, Hakhila jing goengtoenk dah Horesh mas tamh joq.Ref 23.19: Chd 54 (Dang jyung)
20 Housoeh las hwankti eh, nvng nyang lyis nyhik mes zis yah dvyhangteh gyoh los aq, nyang lyis nah loq mas kyauh das muh gas ngamoq yvwons nghuot bas jungh, ge.
21 Saulo ka, Namoq ngos lyis nhaiqnyen goeus yvmvyah Yhensain ka namoq lyis shvmanh dyei bas jungh.
22 Namoq loh las, nyang tamh joqyos khathaq nghuot, nyang lyis houmha hank nyvng cho, vlhomuh loh doms choq yoeuh geh. Nyang svsoh yik zis ngos xauhgyo.
23 Housoeh las nyang tamh joqyos dvnganh lyis jyuk jyuk seq shoq comh las ngah jyank mas doms los geh. Hauh uhlyis ngos namoq yah dvgeh loh das. Nyang hauh mau mas nyeis lyis, Yuda dvmau gonh mas nyang chank xo chah lyis laus eq ngos nyang lyis chank xo das, ge.
24 Housoeh nyamoq toq las Zip wus mas Saulo dah xik pheh loh. Nghuot laus eq Dawi yahge nyah dius jens gas Yeshimon dah mautyi pa, Maon mhanhdyvp mas nyeis.
25 Saulo yahge nyah dius jens gas nyang lyis loh tsain xo. Hauh cho Dawi lyis taiq kyoh los las, nyang hau luk muh boms pheh gyoh loh las Maon mhanhdyvp mas nyeis. Hauh zis Saulo doms xauhgyo lyis Maon mhanhdyvp mas Dawi lyis tsain chank xo loh.
26 Saulo haq jing chank, Dawi thyih vjing chank loh. Dawi gas Saulo lyis gyuk las yoh luiq shoq tungh phang: khasoeh ge lyis Saulo yahge nyah dius jens gas Dawi yahge nyah dius jens lyis zuilhaink yah los las vluk xauh nyhik.
27 Nghuot laus eq Saulo jyank mas loeus jweh los zis gas, Lvnyap los aq, Philisti jens, yah mau mas zan wvng los, ge.
28 Housoeh las Saulo Dawi lyis khat masyah tauh las Philisti jens jyank pheh loh. Housoeh las hauh joqyos lyis Phang luiq Luk ge nyhink.
29 Dawi eq hou mhayah doq las Engedi wuxom, sam joqyos mas nyeis.