22
Phudyei bang Sat Xauh
1 Dawi gas Gat masyah phang luiq las Adulam lukkhyung mha jweh loh. Nyah boekyis yahge nyah uwus yhenbang dvnganh hauh zis xauhgyo lyis, nyamoq gas nyah jyank mas loh.Ref 22.1: Chd 57 (Dang jyung); Chd 142 (Dang jyung)
2 Nhaiqkuk bang, jyen shauh bang, nhaiq ma shei bang nyah jyank mas huom los las nyang gas nyamoq dah uhshe soeu bweh los. Nyang yah dvgeh dius nyeixo ko nghuot.
3 Dawi gas hou mhayah Moab mau Mizpa wus mas loh las Moab hwankti lhyi taiq zis gas, Mangso ngos lyis khasoeh kuot das zis seq dah shishenh jweh shoq ngah ungwes uwus lyis nah jyank mas jenh nyeis nhang aq, ge.
4 Housoeh Dawi gas nyah ungwes uwus lyis Moab hwankti jyank loh nyhei toh. Dawi lukkhyung mha nyeis yenh dvchank nyah zomh gas houmha nyeis.
5 Dvnyeih gas Lvpe Gad Dawi lyis taiq zis gas, Nvng heimha vnyeis, thuq las Yuda mau mas loh aq, ge. Dawi eq loh las Heret saiqkhyam mas nyeis.
6 Nyang Yuda mau mas jweh los cho lhyi ma nyangh lyis Saulo xauhgyo. Hauh uhlyis Saulo ka Gibea wus jing, tamarisk saiqzains khyei mha lham chi lha tsung toh. Nyah zau jens gas nyah nvm mas khyam nyang nyeis.
7 Saulo nyah nvm mas khyam nyang nyeis dah nyah zau jens lyis taiq zis gas, Benyamin jens eh, gyo geh, Yese lo gas namoq yuk khanghmuh lyis yos, zvbiq khyam yoh dyei das lhyeh? Namoq dvnganhmoq lyis dvkhyoengh guon zau, dvxo guon zau yoh kuot nhang lah?
8 Housoeh yoh kuot las namoq dvnganhmoq ngos lyis tyixo huom nyeis lhyeh? Ngah lo gas Yese dah lo yah buisnoms kuot zis ngos lyis hank ma taiq. Namoq dvyuk eq ngah xiklyis oh ma yom, nghuot ya ngah dius, Dawi gas khvnyhik ngos lyis lhom das zis ngah lo yah jyonh yvlyis hank eq ngos lyis ma taiq kyoh kuot, ge.
9 Hauh uhlyis Saulo dah zau jens yah dvgeh yap joq Edom dius Doeg taiq zis gas, Yese lo gas Nob wus mas Ahitub dah lo Ahimelek jyank mas los zis ngos nyvng.Ref 22.9-10: 1Sa 21.7-9; Chd 52 (Dang jyung)
10 Nyang gas Yese dah lo xiklyis Yhensain lhyi nyei dyei, zokho eq, Philisti phoq Goliat dah moengsa eq yoeus dyei kat, ge.
11 Housoeh las hwankti ka Ahitub lo phudyei Ahimelek yahge nyah yhenbang, Nob phudyei bang dvnganhmoq lyis khi lha, nyamoq eq hwankti jyank mas tsain los.
12 Saulo taiq zis gas, Ahitub lo eh gyo aq, ge.
Nyang phuk taiq zis gas, Ngah yhensain eh, gyo nyeis, ge.
13 Saulo nyang lyis taiq zis gas, Nvng yahge Yese lo ngos lyis chamus tyixo goh? Chamus las nyang lyis zokho yahge sham dyei las, nyah cho Yhensain lhyi nyei dyei? Nyang gas khvnyhik ngos lyis tyi lha ngos lyis sat das zis lhom nyeis, ge.
14 Ahimelek hwankti lhyi phuk taiq zis gas, Nah jyeidwis jens dvnganh mas Dawi teh lomluk zis hank bos? Nyang gas hwankti lomoq, nah gungszungh zaunoteHebre mas: Nvng nhang soeu hwankti yhenbang mas nyoqnho ngelang yoh soeu nghuot.
15 Nghuot, ngos nyah xiklyis Mangso lhyi nyeigyo dyei goeus. Hauh zis gas cangxeih vlhain ma nghuot. Nvng lyis lhom cho yah sen lha, nvng yhensain ka ngos lyis eq, ngah yhenbang lyis eq yobos ma huon noh. Ngos hauh cho cha eq ma seq, ge.
16 Hwankti taiq zis gas, Ahimelek eq, nah uwus yhenbang dvnganh eq shei nyang shei chah, ge.
17 Hwankti nyah vyvm mas zungh bang lyis taiq zis gas, Yhensain dah phudyei bang gas Dawi shot dap las, nyang phang yenh cho seq laus eq ngos lyis ma taiq kyoh yvmvyah, nyamoq lyis sat geh, ge. Hauh zungh bang gas Yhensain dah phudyei bang lyis ma sat.
18 Housoeh hwankti ka Doeg lyis, Nvng phudyei bang lyis sat aq, ge. Housoeh las Edom dius Doeg toq las ephod wuot mon dah phudyei bang xetci oeng yuk lyis hauh nyeih lyis sat.
19 Saulo hau phudyei bang yah sen dah Nob wus lyis eq moengsa yah thyoq nhang, vbusbih, vmesbih, loshang jens, nauh shuk bang, noeu, mauhlyihzoe, yvng lyis eq sham yah sat nhang.
20 Nghuot laus eq Ahitub dah lo Ahimelek dah lo jens mas Abiatha ge soeu luiq las Dawi jyank mas phang loh.
21 Saulo Yhensain dah phudyei bang lyis sat cho Abiatha Dawi lyis taiq kyoh.
22 Dawi Abiatha lhyi taiq zis gas, Edom dius Doeg hauh cho Saulo lyis taiq kyoh das oen, ngos nyang lyis nyvng nyeihyo soh goeus. Ngos nah uwus yhenbang dvnganh shei das cho zangh kuot goeus nyvng.
23 Vgyuk, nvng ngos yah nyeis goh. Nah kang lhyi xo soeu ka ngah kang lhyi eq xo: nvng ngos yah nyeis lyis luiq das, ge.