18
1 Saulo yahge Dawi dye jisgoh. Hauh thang lhyi Saulo dah lo Yonathan dah ehnyet gas Dawi lyis twih las Dawi lyis nyah gungs dyos yah dvyhangteh jyetdap.
2 Hauh nyeih lyis Saulo ka nyang lyis shwih toh las nyah uwus yhen pheh ma loh nhang lo.
3 Yonathan eq Dawi lyis nyah dyos yah dvyhangteh jyetdap yvmvyah nyah aiq yuk thanghchvp toh goh.
4 Housoeh nyang nyah dyi eq khyuot las nyah thunk jesdyi yahge sham, lyei, dyichih Dawi lyis dyei.
5 Dawi gas Saulo nhang ya nhang zis lyis joeui bos bos kuot las ung cho yoh yvmvyah Saulo nyang lyis jeszau kuot nhang. Dawi gas dius jens xikkhonh, Saulo dah zau jens xikkhonh mas nyoqnho yoh.
Saulo, Dawi lyis Noh los
6 Housoeh Dawi gas Philisti jens lyis sat masyah tauh los lyis Israel wus khanghmuh mas dah vmesbih jens hwankti lhyi zes das ge, janghau, khvlhank yah gaus gaus yis yis chunghthwe kat, goh las tsain thuq los.
7 Hauh vmesbih jens lvkhyank masyah dvyuk dvphuk taiq goh zis gas, Saulo sat zis khyoengh khyoengh, Dawi sat zis mons mons, ge.Ref 18.7: 1Sa 21.11, 29.5
8 Hauh dang gas Saulo lyis nhaiq ma tap nhang. Saulo ka, Nyamoq Dawi lyis mons mons, ngos lyis gas khyoengh khyoengh dvge: nyamoq gas Dawi lyis hwankti kuot nhang bah ge goeus, ge svsoh nhaiqyo.
9 Hauh nyeih masyah nyang gas Dawi lyis noh las lhaink nyeis.
10 Nungs nyeih hau Mangso jyank masyah ma gis dah dyos gas Saulo jyank mas jweh los. Housoeh nyang gas hauh yhen vgungs mas huonh soeu teh mus nyeis. Dawi gas xikpheh teh vgus toenk bat dyei. Saulo dah loq mas lham dvkhvt chi.
11 Nyang gas Dawi lyis tyoyvm mas guons tsuk toh das ge nghamh zis yah dvyhangteh, lham yah guons kat. Dawi gas nyah xik masyah aiq lhain jhank tyamp.
12 Housoeh Yhensain ka Saulo yah gang las Dawi yah dvgeh nghuot yvmvyah, Saulo ka Dawi lyis gyuk.
13 Housoeh las Saulo ka nyang lyis nyah jyank masyah kangh tyamp las, jes dvkhyoengh lyis guon soeu kuot nhang. Dawi eq nyah dius jens lyis moeng shwih zan las,
14 nyang kuot cho dvnganh mas ung cho yoh, khasoeh ge lyis Yhensain nyang yah nghuot.
15 Housoeh Saulo ka Dawi dah ung cho she nyvng she nyang lyis zes gyuk los.
16 Nghuot laus eq Israel dius jens dvnganh yahge Yuda jens gas Dawi lyis jyet. Khasoeh ge lyis nyang housoeh teh dah ung cho yoh uhshe soeu dvyuk nghuot.
Dawi Nyihwank
17 Saulo Dawi lyis taiq zis gas, Ngah lonyi lobes Merab lyis yoeus aq, ngos nvng lyis dyeizo das: nvng ngah nyhenshang womh womh Yhensain xiklyis jes dvzan dyei aq, ge. Khasoeh ge lyis Saulo nghamh zis gas, Ngah loq nyah thoq mas ma jweh bas jungh, Philisti dius jens nyang lyis dvsat bas jungh, ge.
18 Dawi Saulo lyis taiq zis gas, Ngos hwankti lomoq yoh bweh das zis gas ngos hank nghuot? Israel mas ngah uwus yhenbang yahge ngos gas cha nghuot, ge.
19 Nghuot laus eq Saulo dah lonyi Merab Dawi lyis dyeizo das shishenh jweh lyis Meholat dius Adriel lyis dyeizo tyamp.
20 Hauh thang lhyi Saulo dah lonyi Mikha ka Dawi lyis ngwis. Hauh cho Saulo lyis tsain taiq kyoh las nyang nhaiqtap nyeis.
21 Saulo nyang taiq zo zis gas, Ngah lonyi lyis Dawi dah lhyik duot nhang lha Philisti jens dah loq mas sat zis xauh bas jungh, ge. Housoeh las Saulo Dawi lyis, Nvng khvnyhik ngah lomoq duot goeus, ge aiq vlhain taiq.
22 Saulo nyah zau jens lyis tying toh zis gas, Dawi lyis heisoeh gauh taiq geh: yoeuh aq, hwankti nvng lyis nhaiqdoeus, nyah zau jens dvnganh eq nvng lyis o, housoeh las gvshih nvng hwankti dah lomoq duot gis oen aq, ge.
23 Nyamoq hauh dang Dawi no mas taiq kyoh. Dawi gas, Ngos teh nyoqnho ngelang ma bos, shohjyen soeu hwankti lomoq duot das zis gas lwis lwis nghuot das lah, ge.
24 Zau jens gas Saulo lyis Dawi taiq cho taiq kyoh.
25 Saulo ka, Dawi lyis heisoeh taiq aq: Hwankti ka nyah jeswus lyis nhaiqyo bi das xiklyis Philisti dah vthyoh dvxo mha lai las gohtoeu whot ma o, ge. Nghuot laus eq Saulo nghamh zis gas, Dawi gas Philisti jens sat zis xauh bas jungh, ge.
26 Saulo dah zau jens hauh dang Dawi lyis taiq kyoh lyis, Dawi hwankti lomoq duot mes nyeis. Nyihwank buisnyeis ma jweh shih lyis,
27 Dawi gas nyang eq nyah dius jens eq toq loh las Philisti dius aiq xo sat zis yah nyang hwankti lomoq duot das xiklyis, nyamoq dah vthyoh hwankti jyank jet jet chi los dyei. Housoeh las Saulo eq nyah lonyi Mikha Dawi lyis dyeizo tyamp chah.
28 Housoeh Yhensain ka Dawi yah nyeis zis Saulo nyvng las seq. Saulo dah lonyi Mikha eq Dawi lyis ngwis.
29 Housoeh Saulo ka Dawi lyis zes gyuk las nyah jeswus tsoq duot los.
30 Philisti thoenkgus jesdvp jeszan los, nghuot laus eq jeszan khyomp khanghmuh mas Dawi gas Saulo dah gohtoeu zau jens thoq lyis ung cho zes yoh. Housoeh las Dawi nyings svsoh hoeuh los.