12
Samuel Taiq Kyingh
Samuel Israel dius dvnganh lyis taiq zis gas, Namoq taiq zis ngos gyo dyei las ngos namoq lyis guon das hwankti toh dyei goeus. Gvshih yoeuh aq, nyang namoq lyis uhshe das xiklyis namoq yoh toh goeus. Ngos gas nyenhkyi bos las uh thyoeu goeus. Yoeuh aq, ngah lo jens eq namoq yah nghuot. Ngos gas loshang lhyi yah khvnyhik jweh shoq namoq dah uhshe soeu nghuot goeus. Yoeuh aq, ngos gvshih heimha nyeis. Yhensain xikkhonh mas eq, nyang khyen toh dah Hwankti xikkhonh mas eq ngos lyis tyi lha kanghjyoeng kat geh, ngos hank noeu, hank mauhlyihzoe yoeus ku? Hank lyis mopzo nghuot ya zaiq ku? Hank jyank masyah khauwhot yoeus ku? Houmha zis ngos dvkoeuq koeuq kuot goeus lyis gas, ngos yoeus goeus zis ngos doms dyei das, ge.
Dius jens toeuh zis gas, Nvng ngamoq lyis ma mopzo, ma zaiq, hank loq masyah eq cha ma yoeus, ge.
Samuel phuk taiq zis gas, Namoq ngos yobos cha ma bos zis nyvng cho, Yhensain yahge nyang khyen toh hwankti ka khvnyhik kanghjyoeng nghuot bas jungh ge.
Nghuot, Yhensain ka ngamoq dah kanghjyoeng, ge nyamoq toeuh.
Samuel tsoq taiq zis gas, Yhensain ka Moshe yahge Aron lyis toeuq kat las nyah zomh gas namoq dah phauh thyeih moq lyis Egutu mau masyah shwih thuq los.Ref 12.6: Dyu 6.26 Housoeh las gvshih namoq samlo yap geh, Yhensain dah yomsoq zainsmuh yah namoq yahge phauh thyeih moq lyis khyuot yoeus cho lhyi namoq lyis taiq kyingh las, Yhensain xikkhonh mas ngos namoq lyis yobos huon bah. Yakop yahge nyah yhenbang Egutu mas jweh e lha Egutu bang gyvzaiq gyvnang kuot.noteSeptuagint mas Egutu bang gyvzaiq gyvnang kuot; Hebre mas hai dangkhonh ma bos. Namoq dah phauh thyeih moq Yhensain lhyi kaiq lyis, Yhensain ka Moshe yahge Aron lyis nhang lha, nyamoq lyis Egutu masyah shwih los las haih joqyos mas toh.Ref 12.8: Dyu 2.23 Nghuot laus eq dius jens gas Yhensain, nyamoq dah Mangso lhyi tohnyhik. Housoeh las nyang Philisti dius jens, Moab hwankti yahge Hazo wus mas dah jeszau Sisera yah namoq dah phauh thyeih moq lyis zan nhang.Ref 12.9: Soe 3.12, 4.2, 13.1 10 Hauh thang lhyi nyamoq Yhensain lhyi pangh aq ge kaiq zis gas, Ngamoq yaunos kuot goeus, khasoeh ge lyis nvng Yhensain lhyi toh tyamp las Bala yahge Ashtarot gungslho jens lhyi paiq. Gvshih ngamoq lyis ngamoq dah jeswus jens masyah jenh kyoeu kat aq, nvng lyis ngamoq paiq das, ge.Ref 12.10: Soe 10.10-15 11  Yhensain ka Gideon, Baraknotemaussauh dvkhamh mas Barak, Hebre mas Bedan.Yeptha, thang thank lyis ngos lyis nhang. Ngamoq yuk khanghmuh gas namoq lyis namoq dah jeswus masyah kyoeu kat las namoq jesluiq shohluiq nyeis.Ref 12.11: 1Sa 3.20; Soe 4.6, 7.1, 11.29 12 Nghuot laus eq, Amon hwankti Nahash namoq lyis los zan bah ge lyis, namoq gas Yhensain lhyi namoq dah hwankti nghuot nyeis zis lyis he tyamp las, Ngamoq lyis guon das hwankti namoq o, ge ngos lyis dung.Ref 12.12: 1Sa 8.19
13 Gvshih haih soeu ka namoq khyen toh dah hwankti nghuot; namoq nyang lyis sang lha Yhensain ka nyang lyis namoq lyis dyei goeus. 14 Namoq gas Yhensain, namoq dah Mangso lhyi phauh nyang las, nyang lyis phuqsoe, nyah dang gyo, Yhensain dah tyingtoh dang lyis domsyos gyo lyis gas namoq eq, namoq dah hwankti eq nyah thang chank nghuot lyis gas namoq mas dvnganh gis los das. 15 Nghuot laus eq namoq Yhensain dang ma gyo, nyah tyingtoh dang lyis domsyos ma gyo lhyi ka, Yhensain ka namoq lyis eq namoq dah hwankti lhyi eq tyixo das. 16 Housoeh las namoq nyeis yvmas yap geh, Yhensain kuot das muhzains lyis namoq nyvng das. 17 Khvnyhik sunghso yhomh nyos ma nghuot lhyeh? Ngos Yhensain lhyi shvmanh dung das las nyang gas maujau jau, mau wus nhang das. Housoeh bweh lyis namoq Yhensain lhyi hwankti sang uhlyis namoq nyang lyis tyi lha yaunos zainsmuh kuot goeus zis lyis namoq soh seq das.
18 Housoeh Samuel gas Yhensain lhyi shvmanh dung. Yhensain eq hauh nyeih lyis maujau jau las mau wus nhang yvmvyah, dius jens dvnganh gas Yhensain lhyi eq, Samuel lyis eq svsoh gyuk las, 19 nyamoq Samuel lyis taiq zis gas, Ngamoq ma shei bas jungh, Yhensain, nah Mangso lhyi ngamoq xiklyis jenh dung dyei aq: ngamoq hwankti sang zis yah xik lyis dah yaunos thoq mas tsank las yaunos kuot goeus, ge.
20 Samuel dius jens lyis taiq zis gas, Vgyuk goh, namoq hai yaunos kuot goeus laus eq, Yhensain jyank masyah vphanh loh goh, Yhensain lhyi ehnyet nhaiqlom dvnganh yah phuqsoe geh. 21 Vkyuh ma dyei, ma khyuot yoeus, vnyet vkom dvnghuot dah ma jyoeng mangso jens thang mha vchank whang loh goh, hauh zis gas vkom dvnghuot. 22  Yhensain ka yhaugyen dah dangthoengh toh goeus las namoq lyis ma tyamp. Khasoeh ge lyis Yhensain ka namoq lyis nyah dius kuot das xiklyis nghamh thyet goeus. 23 Ngos namoq xiklyis ma dung, no toh zis yah Yhensain lhyi ngos ma cu das. Hauh gungsthaiq hau gis las jyoeng cho namoq kuot das xiklyis ngos namoq lyis jyauh shih das. 24 Namoq ehnyet nhaiqlom dvnganh wontang zis yah Yhensain lhyi domsyos gyo las phuqsoe geh. Nyang namoq xiklyis muhzains kuot dyei goeus cho lhyi vtohnyhik. 25 Nghuot laus eq namoq yaunos tsoq kuot lyis, hwankti eq cheq namoq dyoqbis tyamp das, ge.