22
Yesu Doms Gyoh Lyih das
1 Tsai loeuswons soeu ka Mangso yahge Yvnglo dah hwankti tank masyah yaus thuq los las hauh wus chomuh gungs chank yaus loh, pvt teh cingh dah kang jeismuh lvng ngos lyis Chixoeuq.Ref 22.1: Ezk 47.1; Zek 14.8
2 Hauh jeismuh lvng thyitvp haqtvp jeis yvm chank yah shih dvci aiq ja shih dah, kang dwis nhang dah saiqzains tsain bos. Hauh yvmas lhamhmuh dvkhyvp dvlhain, dvzvn lyis dvci aiq lhain vshih shih joq. Hauh saiqzains dah vhuq eq dius nyau jens dah nos lhoq gis das xiklyis nghuot.Ref 22.2: Vpm 2.9; Ezk 47.12
3 Thang pheh hauh wus mas Mangso dah nhoengh xauh ge zis cha eq ma bos lo das.Ref 22.3: Zek 14.11
Mangso yahge Yvnglo dah hwankti tank gas hauh wus dah vkhau mha joq das las, nyah jyeidwis jens nyang lyis phuqsoe das.
4 Nyamoq gas nyah nyoqnho lhyi xauh nyvng nyeis das. Nyamoq dah ngelang mas nyah nyings lhaih tap toh das.
5 Houmha nyenhyo ma bos lo das. Nyamoq nyibung bvng zis eq, buis bvng zis eq ma chah lo. Khasoeh ge lyis Yhensain Mangso ka nyamoq dah bvng zis duot das. Hauh thoq lyis nyamoq gas hwankti duot las vcaiq vto guon nyeis das.Ref 22.5: Esa 60.19; Dan 7.18
Yesu Jweh das
6 Hauh thang lhyi loeuswons soeu ka, Haih dang jens gas dan las yoh loms. Lvpe jens lyis dyos dyei dah Yhensain Mangso ka shishenh ma nyangh lyis bweh los das cho, nyah jyeidwis jens jyank mas chixoeuq das xiklyis nyah loeuswons soeu lhyi nhang kat.
7 Yesu gas, Gyo yoeus aq, ngos lvnyap jweh los das! Haih maussauh mas bos lvpe jens dah dang lyis domsyos gyo las chank nyeis soeu ka ngelhoq, ge ngos lyis taiq.
8 Ngos Yohan gas haih cho jens lyis xauh eq xauhgyo, nyvng eq nyvng soeu nghuot. Heinyhoq dye xauhgyo zis yahge dye nyvng thang lhyi, ngos lyis haih cho chixoeuq dah loeuswons soeu khyeiyang mas, nyang lyis paiq das zis ngos phvluk zomhgyuis bah oen.
9 Nghuot laus eq nyang gas, Housoeh vkuot, ngos gas nvng, nah boekyis lvpe jens yahge haih maussauh mas dah dang lyis domsyos gyo zis yah chank nyeis bang dah loeuzomh changh jyeidwis dvnghuot. Mangso lhyi paiq aq, ge ngos lyis taiq.
10 Tsai, nyang gas haih cho dvnganh yah bweh das shishenh ni los goeus las, haih maussauh mas bos dah lvpe dang jens lyis vnghop shung toh.
11 Ma dan soeu ka ma dan khyvlyis chank nyeis shih bas jungh, ma lhoq ma shang soeu ka ma lhoq ma shang khyvlyis nghuot nyeis shih bas jungh, dan soeu ka dan khyvlyis nghuot nyeis shih bas jungh, gyingshang soeu ka gyingshang khyvlyis nghuot joq shih bas jungh.Ref 22.11: Dan 12.10
12 Gyo aq, ngos lvnyap jweh lyih das, dvyuk yah dvyuk vsainnyang kuot goeus dah muhzoh yah dvyhangteh shangh das phauh lyis ngos yah dvgeh chi lyih das.Ref 22.12: Esa 40.10, 62.11; Chd 28.4; Yer 17.10
13 Ngos gas Alpha yahge Omega, cangxeih yahge thang thank zis nghuot.Ref 22.13: Nyoq 1.8, 17, 2.8; Esa 44.6, 48.12
14 Kangdwis nhang dah saiqzains mas dah vshih xauh zo das zis yahge, wus khomh cho chank yah wus mas wvng das toeuh yoh shoq, vsainnyang dah dyimis lyis cheihshang tyamp bang gas ngelhoq.Ref 22.14: Vpm 2.9, 3.22
15 Nghuot laus eq dius teh yangh ma doeus lo shoq mulyanghsenh bang, hweq kat bang, nyetnau muh kuot bang, dius sat bang, silho paiq bang yahge hwah cho lhyi ngwis las chank kuot bang dvnganh gas wus nghe mha xauh nyeis das, ge ngos lyis taiq.
16 Ngos Yesu gas phung khau mha nyeis dah namoq lyis haih cho jeis taiq kyoh das nyhenshang ngah loeuswons lyis nhang kat. Ngos gas Dawi yhenbang masyah dyos lyih soeu nghuot. Ngos gas bvng dah buhnyhiq nghuot.Ref 22.17: Esa 55.1
17 Hauh dyos yahge lonyi saiq gas, Los aq, tsain ge.Ref 22.17: Esa 55.1
Hauh zis xauhgyo yoeus soeu hank laus eq, Lo aq, ge bas jungh.
Jeis shet soeu ka los bas jungh, kang jeis lyis omes soeu hank laus eq, phauh ma gyoh gyoh jyungshuk khyvlyis lhom yoeus bas jungh.
Dang thang Sau
18 Ngos Yohan gas haih maussauh mas bos dah lvpe dang xauhgyo bang dvnganh lyis, gvgis zaih nhang. Haih dang mas dvja ja lhungh soeu hank lyis laus eq, Mangso ka haih maussauh mas bos joeng dah yomh lung dyei das.Ref 22.18-19: Lyi 4.2, 12.32
19 Haih maussauh mas bos lvpe dang masyah dvja ja yoeus tyamp soeu hank lyis laus eq, hai mha lhaih toh kang dwis nhang saiqzains mas dah vshih xauh zo das toeuh yahge gyingshang wus mas wvng das toeuh lyis Mangso yoeus tyamp dyei das.
20 Haih cho lhyi kanghjyoeng kat dyei soeu ka, Jyoengh nghuot goeus. Ngos lvnyap jweh lyih das, ge.
Amen. Yhensain Yesu eh, jweh los aq!
21 Yhensain Yesu dah jyehjuh gas Mangso dah dius jens yah dvgeh nghuot bas jungh! Amen.