21
Maukhung Nyeisjvng Vsaiq
1 Hauh thang lhyi maukhung vsaiq, nyeisjvng vsaiq lyis ngos nyvng. Cangxeih maukhung yahge nyeisjvng gas dyuk goeus, thomh eq ma joq lo.Ref 21.1: Esa 65.17, 66.22; 2Pt 3.13
2 Hauh uhlyis gyingshang wus ge dah Yerusalem wus vsaiq gas loloeu saiq xiklyis shunk dah lonyi saiq teh dye sont las, Mangso nyeis dah maukhung mhayah gyoh los yvlyis ngos nyvng.Ref 21.2: Esa 52.1, 61.10; Nyoq 3.12
3 Tsai, ngos gas hwankti tank masyah taiq thuq los dah thwe zainsmuh dvkoeuq xauhgyo. Houka, gvshih Mangso yhen ka dius yah dvgeh nghuot. Nyang nyamoq yah dvgeh huom nyeis das las nyamoq gas nyah vnyau duot das. Mangso ka nyah gungs nyang nyamoq yah dvgeh nyeis las, nyang gas nyamoq dah Mangso duot das.Ref 21.3: Ezk 37.27; Lew 26.11, 12
4 Nyang gas nyamoq nyoqjeih mas dah nyoqdyeis dvnganh lyis buot tyamp dyei das. Thang pheh shei ge zis ma bos lo das; kuk zis, ngaus zis, nos zis, xikpheh dah joq zis dvnganh dyuk goeus, ge.Ref 21.4: Esa 25.8, 35.10, 65.19
5 Hauh thang lhyi hwankti tank mas tsung toh soeu taiq zis gas, Yoeuh aq, gvshih shishenh lyis vyhang dvnganh lyis ngos vsaiq doms kuot toh, ge. Tsai, Yhensain taiq zis gas, Lhaih toh aq: khasoeh ge lyis haih dang gas jyoeng lha wontang, ge.
6 Hauh thang lhyi nyang taiq zis gas, Muh dye goeus. Ngos gas Alfa yahge Omega, cangxeih yahge thang thank nghuot: jeis shet soeu hank eq hau jeisthuq dwang mas dah jeis lyis phauh ma gyoh xauh shuk das toeuh ngos dyei das.Ref 21.6: Esa 55.1
7 Yoh ung soeu ka dang thoengh yah dvyhangteh xauh kham yoeus das las, ngos gas nyamoq dah Mangso duot las nyamoq eq ngah lo jens duot das.Ref 21.7: 2Sa 7.14; Chd 89.26-27
8 Nghuot laus eq gyuk ehnyet bos bang, ma lomsjingh las dang ma jings bang, vchoqh vjyot bang, dius sat bang, yauxi bang, hweq kat bang, silho paiq bang yahge hwah bang dvnganh gas nyi yahge hwank ngeh nyeis dah thomh mas xauh tsain joeng das. Houka aiq vlhain shei cho nghuot, ge.
Yerusalem Wus Saiq
9 Hauh uhlyis thang thank dah yomh yah dyingh joq dah kom nyhet lom chi dah loeuswons bang nyhet yuk mas dvyuk ngah jyank los las, Los aq hauh Yvnglo dah yhensain nyhiq ge dah lonyi saiq ngos nvng lyis chixoeuq bah, ge ngos lyis taiq.
10 Tsai, hauh dyos gas ngos lyis shwih las hauh loeuswons soeu ka ngos lyis svsoh nyhang dah boms thyoh mas shwih doq loh las, Mangso nyeis dah maukhung masyah gyoh los gyingshang dah Yerusalem wus ngos lyis chixoeuq.Ref 21.10: Ezk 40.2
11 Hauh wus gas Mangso dah phunk yah bvng joq. Hauh wus gas shang dah bvngtoenk, nvgvthweq luk yahge phauh dah luk teh bvng joq.
12 Hauh wusciank zainsmuh gas kuhxing zis yah nyhang lha khomh dvci aiq khomh bos. Hauh khomh jens mas loeuswons bang dvci aiq yuk tsain zungh nyeis. Hauh khomh jens thoq mas Israel jens dvci aiq koq dah nyings tsain lhaih tap toh.Ref 21.12-13: Ezk 48.30-35
13 Buisthuq shot wus khomh somh koeuq, mautsung shot wus khomh somh koeuq, mautyi shot wus khomh somh koeuq, buiswvng shot pheh wus khomh somh koeuq nghuot.
14 Hauh wusciank lyis luk vpom dvci aiq koeuq dah thoq mas ci toh las, hauh khomh jens mas Yvnglo dah lvgyo jens dvci aiq yuk dah nyings lhaih toh.
15 Ngos yah jisgoh dah loeuswons soeu loq mas wus lyis eq, wus khomh jens lyis eq, wusciank lyis eq, keq das xiklyis xing keqseh dvkoeuq chi toh.Ref 21.15: Ezk 40.3
16 Hauh wus gas nyei thunk nghuot las, mau tsung yahge mautyi shot pheh dvyhangteh nghuot. Loeuswons soeu ka keqseh yah hauh wus lyis keq lyis lywas choeu, xing choeu, nyhang choeu main dvkhyoengh oengxo nghuot.
17 Tsai, hauh wusciank lyis eq keq yoeuh lyis dius keq zis yah dvyhangteh nghuot. Loeuswons soeu keq lyis pe 216 nyhang.
18 Hauh wusciank lyis nvgvthweq luk yah ci toh, hauh wus lyis gas lhoqshang dah bvngtoenk teh doeus dah xing gyingh yah kuot toh.Ref 21.18-21: Esa 54.11-12
19 Hauh wusciank vpom luk jens lyis phauhdap luk vja ja yah shunk toh. Cangxeih dah vpom luk gas nvgvthweq, aiq gas nila, somh gas mvhoya, nyei gas myaq,
20 oeng gas jyaung, khyuk gas patvmyah, nyhet gas sengmut, xet gas myet-yweh, gau gas uqtapvyah, dvci ka mvhoya nyaus, dvci das gas wakintu, dvci aiq gas thitun nila tsain nghuot.
21 Hauh wus khomh dvci aiq koeuq eq pvleh dvci aiq koeuq nghuot. Khomh khanghmuh pvleh dvkoeuq koeuq nghuot. Hauh wus dah talhoeu cho ka bvngtoenk teh bvng dah xing gyingh nghuot.
22 Hauh wus vkhau mha Yhenmuh lyis ngos ma nyvng. Khasoeh ge lyis Maukhung Jesphung Yhensain Mangso yahge Yvnglo gas hauh wus dah yhenmuh nghuot.
23 Hauh wus lyis pank dyei das zis buis yahge lhamhmuh ma chah. Khasoeh ge lyis Mangso dah phunk gas hauh wus lyis pank dyei las Yvnglo gas hauh nyibung nghuot.Ref 21.23: Esa 60.19-20
24 Nyeisjvng dius jens gas hauh wus dah bvng zis yah tsain suh e das. Nyeisjvng dah hwankti jens eq vsainnyang yoh dah yhenzis yoskhuih lyis hauh wus mas chi wvng los das.Ref 21.24: Esa 60.3
25 Hauh wus khomh jens lyis dvnyeih gonh phank hanh toh das. Nyamoq lyis khanhamp eq nyheih toh das zis ma nghuot, khasoeh ge lyis hauh wus mas nyenh ge zis ma bos.Ref 21.25-26: Esa 60.11
26 Dius nyau jens dah phunk nyoqnho ngelang yahge nyeisgis yaplhoq cho jens lyis hauh wus mas tsain chi wvng los das.
27 Nghuot laus eq vwot v-oeu cha eq hauh wus mas yoh wvng das zis ma nghuot. Vchoqh vjyot, vwot v-oeu kuot soeu, hwah cho chank soeu eq, hauh wus mas khanhamp eq xauh wvng das zis ma nghuot. Yvnglo dah kang maussauh mas nyings bos bang kyingh hauh wus mas xauh wvng das.Ref 21.27: Esa 52.1; Ezk 44.9