YOHAN DAH
NYOQNYVNG MAUSSAUH
(REVELATION)
Sauhbuk nyothyang mha tsoq tsoq nghuot dah phank xoeuq cho yahge Nyoqnyvng lyis vlho dang yhung lha taiq toh zis tsain bos. Hauh vlho dang jens hauh caiq mas bang seq gyo das nghuot laus eq gohtoeu dius jens dvnganh nyhenshang ka ma seq gyo dah mauh phoh dang tsain nghuot joq. Thwe jet chunghthwe zainsmuh dvkoeuq dah dang jyung ka hau chunghthwe kat uhlyis puk las puk las thuq los yhangteh, Nyoqnyvng maussauh mas yhaugyen dah dang jyung jens gas tsoq las tsoq las Nyoqnyvng mas bos los. Haih maussauh lyis svsoh shaih khyvlyis vjyuk tsain phant boms laus eq hauh Mangso Dang vgungs gas dvkoeuq dvnghuot. Houka: Mangso ka Yesu Khristu khyvlyis yah Satan yahge nyah jeswus jens lyis dvnganh thank shoq ung tyamp las haih ung cho dye uhlyis nyah dah wontang bang lyis nyang gas maukhung vsaiq yahge nyeisjvng vsaiq dah shvmanh jyehjuh lyis dyei das, ge zis nghuot.
1
Haih maussauh gas Yesu Khristu lyis Mangso dyei dah nyoqnyvng cho lhyi lhaih toh. Yesu lyis haih nyoqnyvng dyei zis gas ma nyangh lyis bweh los das cho Mangso dah jyeidwis jens yoh nyvng shoq Chixoeuq nhang das xiklyis nghuot. Khristu gas nyah jyeidwis Yohan jyank loeuswons soeu nhang las haih nyoqnyvng dang lyis seq nhang. Heika Yohan taiq kyoh, Mangso jyank masyah jweh los dang yahge Yesu Khristu Chixoeuq dah jyoeng dah cho nghuot. Haih maussauh nghap soeu yahge haih lvpe dang jens lyis gyo yoeus las, haih maussauh mas lhaih ya lhaih toh zis lyis chank kuot bang gas ngelhoq. Khasoeh ge lyis taiq kyoh dah muhzoh bweh das shishenh ni los goeus.
Phung jens lyis Jeshuh
Ngos Yohan gas Asia mau mas joq dah phung nyhet phung lhyi maussauh lhaih kat.Ref 1.4: Dyu 3.14; Nyoq 4.5
Haih caiq, gohlhain caiq, thang caiq mas nyeis dah Mangso jyank masyah eq, nyah hwankti tank xik mas nyeis dah dyos nyhet koeuq masyah eq, wontang dah kanghjyoeng phoq, shei bang masyah cangxeih dwis toq los soeu, nyeisjvng dah hwankti jens lyis guon dah Yhensain Yesu Khristu jyank masyah eq jyehjuh yahge nyenstap zis gas namoq mas joq bas jungh.Ref 1.5: Esa 55.4; Chd 89.27
Yang lyis jyetdap las, nyah gungs nyang phudyei shei kham zis yah, yang lyis yah yaunos masyah khyuot kat las, Nyah Uwus dah muhzoh lyis yoh wons wuq das xiklyis yang lyis munghdan vnyau yahge phudyei toeuh dyei soeu Yesu Khristu mas phunk nyoqnho yahge yomsoq vcaiq vto joq bas jungh! Amen.Ref 1.6: Dyu 19.6; Nyoq 5.10
Yoeuh aq, nyang gas jyommauh yah jweh lyih goeus.Yhensain lhyi lham yah thauh phank bang yah dvgeh dius jens dvnganh gas nyang lyis tsain nyvng das. Nyeisjvng mas dah dius nyau khanghmuh nyah gvng mas kuk nyingh shohthang thauh das. Houyah dvyhangteh bweh los bas jungh. Amen.Ref 1.7: Dan 7.13; Mat 24.30; Mak 13.26; Luk 21.27; 1Th 4.17; Zek 12.10; Yoh 19.34, 37
Ngos gas cangxeih soeu eq, thang thank soeu eq nghuot ge, haih caiq lyis eq, gohlhain caiq lyis eq, jweh los das caiq lyis eq nyeis dah Maukhung Jesphung Yhensain Mangso taiq.Ref 1.8: Nyoq 22.13; Dyu 3.14
Yesu Nyoqnyvng
Ngos gas namoq dah vmang vnoeuh Yohan nghuot. Yesu dah thang chank soeu dvyuk khyvlyis yah nyah munghdan yah sen dah dius jens xauh dah shanghsenh cho mha nhaiqlom xing zis yah namoq yah dvgeh jhen nyeis soeu nghuot. Ngos gas Mangso dah dang yahge Yesu dan cho lhyi taiq kyoh gvng mas Patmo goeujo pheh nhang kat zis xauh. 10 Hau Yhensain dah buisnyeis lyis ngos dyos mas nghuot loh las, ngah nungsthank mas lvbuh yhangteh dah thwe zainsmuh dvkoeuq lui zis ngos xauhgyo. 11 Hauh thwe ka, Nvng nyvng zis yah dvyhangteh maussauh mas lhaih las, hauh maussauh lyis phung nyhet koeuq nghuot dah Ephesu, Samirna, Pergamu, Thiatira, Sardi, Philadephia yahge Ladoki phung jens lyis huon kat aq, ge.
12 Housoeh ngos lyis jis nyeis soeu ka hank nghuot au, oen nyvng das xiklyis lhain yoeuh kat lyis ngos gas xing nyituonh gus nyhet koeuq yahge, 13 hauh vgungs mas dius teh soeu dvyuk nyah dyixing lhyi khyeiwu mas jweh shoq wuot chi. Nyah sainhkhonh mas xing dyichih chih toh zis ngos nyvng.Ref 1.13: Dan 7.13, 10.5 14 Nyah cam ka thyoeu dah yvng mauh teh, nghuot ya gyu teh thyoeu. Nyah nyoqjeih jens gas nyilhyam teh duk nyeis.Ref 1.14-15: Dan 7.9, 10.6 15 Nyah khyei ka nyi mas shuonh goeus dah thunk gyingh teh tsain bvng, nyah thwe ka nyings huomh toh dah jyvthyangh teh nyings nyeis.Ref 1.15: Ezk 1.24, 43.2 16 Nyah loq mas kyi nyhet lom chi toh: nyah nhuot masyah aiq shot zuk dah tyingh sham thuq nyeis, nyah nyoqnho ka nyeih gungs lyis tso dah buis teh bvng joq. 17 Hauh soeu lhyi nyvng lyis ngos nyah khyeiyang mas shei soeu teh lains loh. Nyang gas nyah loqyos loq ngah thoq mas kih las, Vgyuk, ngos gas cangxeih soeu eq, thang thank soeu eq nghuot.Ref 1.17: Esa 44.6, 48.12; Nyoq 2.8, 22.13 18 Ngos gas dwis nyeis soeu eq nghuot. Ngos shei goeus laus eq gvshih ngos vcaiq vto dwis nyeis. Ngos gas shei nos dah thoq mas eq, shei mau dah thoq mas eq guon das toeuh yoh. 19 Housoeh las nvng nyvng goeus zis lyis eq, gvshih joq zis lyis eq, thang pheh bweh los das cho lhyi eq lhaih toh aq. 20 Ngah loqyos loq mas nvng yoh nyvng dah kyi nyhet koeuq yahge xing nyituonh gus nyhet koeuq dah nghop toh cho ka haih zis nghuot. Kyi nyhet lom gas phung nyhet koeuq lyis zungh dah loeuswons nyhet yuk nghuot las nyi tuonh gus nyhet koeuq gas hauh phung nyhet phung nghuot, ge.