2
Rutha Boaz dah Danh mas
Naomi dah yhensain phoq Elimelek dah vkoq mas Boaz ge dis las nhaiqbos nyings hoeuh dah soeu dvyuk nyeis. Rutha gas nyah nyimuh Naomi lyis, Ngos danh panote 2.2 Danh pa: Jeis ma bos dah pazoe nghuotmha e lha jyo nham gyoh kui nhang mes soeu dah thang mha jyo nham gyoh e chank kui das lheih, ge nyei.Ref 2.2: Lew 19.9-10; Lyi 24.19
Naomi eq, Gis goeus ngah lo e kui aq, ge toeuh.
Jyo yhomh bang thang mas Rutha jyo nham gyoh e chank kui. Nyang e chank kui yenh dah danh gas nyah nyimuh Elimelek vkoq mas Boaz ge soeu dah danh loh nghuot vvng.
Rutha jyo nham gyoh kui nyeis uhlyis Boaz gas Betlehem masyah jweh los las nyah muh zwi bang lyis, Mangso ka namoq yah dvgeh nghuot bas jungh, ge los jeshuh.
Nyah langjyank jens eq, Nvng lyis eq Mangso shvmanh dyei bas jungh, ge.
Boaz gas, Mhuh lonyi gas hank nghuot lah, ge lvgungh lyis nyei.
Nyang doms toeuh zis gas, Naomi yah dvgeh bos chank los dah Moab lonyi nghuot. Nyang jyo yhomh bang thang mas jyo gyoh chank kui das ge, ngos lyis sang las nvpsangh mas zis gvshih jweh shoq kui nyeis. Nyang zvng mas dvsoq kyingh dvno, ge.
Boaz gas Rutha lyis, Ngah lonyi eh, ngah danh mas kui aq, gohyos vloh, ngah uhkung nyhiq jens thang mas chank kui aq. Vbusbih jens khapheh yet loh zis yoeuh las uhkung nyhiq jens thang mas chank kui aq. Uhkung loyvm jens jeis dwang masyah kham kat toh jeisyam mas jeis khoeuh shuk aq.
10 Rutha gas Boaz lyis dupaiq las, Ngos gas gohnyau dius dvnghuot chamus ngos lyis hou iq nhaiqbos lah, ge sang.
11 Boaz doms taiq, Nvng gohnyau nghuot zis ngos seq, nghuot laus eq nvng gas nah yhensain phoq shei thang lyis eq, nah nyimuh Naomi lyis nhaiqbos jyetdap cho ngos seq. Nvng gas nah uwus ungwes yahge nah choq thyet mau lyis toh khoq las haih nvng ma jweh ku dah mau mas los. 12 Mangso ka nvng kuot muh dvnganh xiklyis tauh dyei bas jungh. Nvng Israel dah Mangso dungs khau mas los khau nyeis. Hauh Israel Mangso ka nvng lyis shvmanh dyingh shoq dyei bas jungh, ge.
13 Hou lyis Rutha gas, Nah xikkhonh mas tsoq las nyoqnho yoh bas jungh. Ngos gas nah uhkung dvyuk iq langh ma mon. Nghuot laus eq nvng ngos lyis nhaiqnyen dang taiq, nvng ngos lyis nghamhloms cho dyei, ge.
14 Nyeihzvng zo yoq lyis Boaz gas Rutha lyis, ngamoq yah dvgeh sunghso lhyoq los zo aq, haih shih jyen jeis mas nyhonh las zo aq, ge. Rutha eq uhkung nyhiq jens yah dvgeh nyeihzvng zo. Boaz gas Rutha lyis balishenh note 2.14 Balishenh gukshenh teh zis nghuot gvmtsoh. Rutha zo jo thang lyis nyet shoq nghuot shih. 15 Rutha gas jyo nham gyoh kui das ge thuq loh lyis, Boaz gas nyah uhkung jens lyis baliphu jo mas eq kui nhang aq, nyang lyis vtomp. 16 Nyang kui das zis bali tsop pa-i khyoq toh dyei aq. Nyang vlhomuh kui yoeus bas jungh.
17 Housoeh Rutha gas nyenhthang jweh shoq jyo nham gyoh kui, yoh kui toh zis lyis bat yoeus lyis bali 7 pannote 2.17 7 pan Hebre mas dv epha ge yoh. 18 Rutha gas nyang yoh kui dah bali wons las wus khau pheh loh. Nyang zo nyet los dah balishenh lyis eq nyah nyimuh lyis los dyei. 19 Housoeh nyah nyimuh gas Rutha lyis nyei, Khvnyhik nvng jyo nham gyoh khamha e kui, hank dah danh nghuot goeus lah? Nvng lyis bos pangh soeu lyis Mangso shvmanh dyei bas jungh, ge.
Rutha taiq zis gas, Ngos kui dah danh sain nyings gas Boaz ge soeu nghuot, ge.
20 Naomi gas nyah doeusmuh lyis, Hauh soeu lyis Mangso shvmanh dyei bas jungh. Mangso ka shei goeus bang yahge kang dwis nyeis bang lyis vjangh yah tsoq las shvmanh dyei nyeis, ge. Naomi nyah doeusmuh Rutha lyis doms taiq shih zis gas, Boaz gas yang lyis yoeuh gomh das, yah boek sain nghuot, ge.Ref 2.20: Lew 25.25
21 Moab lonyi Rutha gas, Boaz ngos lyis nyah danh mas lyih kui shih aq, jyo dye yhomh shoq nyah uhkung nyhiq jens thang mas jyo nham gyoh kui aq, ge.
22 Naomi nyah doeusmuh Rutha lyis taiq zis gas, Boaz dah uhkung jens thang mha chank kui zis svsoh gis. Nvng gohyuk dah danh mas loh kui lyis nvng lyis lhoeu thyoq das soeu toq bos mvbeh, ge. 23 Housoeh las Rutha gas bali yahge sunghso dye yet shoq Boaz dah uhkung nyhiq jens thang mha jyo nham gyoh chank kui las nyah nyimuh yah dvgeh nyeis.