5
1 Hwankti Solomon gas Yhenmuh xiklyis kuot zis dvnganh dye lyis, nyang gas nyah uwus Dawi Mangso lhyi dyei toh dah ngwis xing, yahge vyhang dvnganh chi los las yhenmuh ziskwi mha kat toh.Ref 5.1: 2Sa 8.11; 1Ss 18.11
Thanghchvp Kwi Dvng los
(1Hw 8:1-9)
2 Hauh thang lhyi Hwankti Solomon gas Yhensain dah Thanghchvp Kwi lhyi Zion ge Dawi dah wus masyah Yhenmuh pheh yoeus los das xiklyis Israel mas vkoq uhshe bang, vhuh uhjyung jens dvnganh lyis Yerusalem mas huom nhang.Ref 5.2: 2Sa 6.12-15; 1Ss 15.25-28
3 Nyamoq dvnganh gas lhamhmuh nyhet vkhyvp lyis kuot dah Zvng pwe mha hwankti jyank los huom toh.
4 Uhshe bang dvnganh zain los uhlyis, Lewi jens gas hauh Thanghchvp Kwi lhyi dvng toq,
5 las Yhenmuh mas los toh. Phudyei bang yahge Lewi jens gas moq zvng eq, hau zvng mas dah gyingshang kyahsoe dvnganh eq Yhenmuh mas los tsain tyungh toh.
6 Hwankti Solomon yahge Israel dius dvnganh gas Thanghchvp Kwi xikkhonh mas ma yoh suon lo shoq nyo dah yvng, noeu jens sat las lomhxangh lainh.
7 Hauh thang lhyi phudyei bang gas Yhensain dah Thanghchvp Kwi lhyi Yhenmuh khau mha hwank las Gyingshang Thank Joqyos, Kherubim dah dungs o, nyah joqyos mas toh.
8 Kherubim dah dungs jens gas Kwi yahge dvng-tanzoe lyis lhywa nghop toh.
9 Jauh toh las tanzoe thang lhyi Gyingshang Thank Joqyos dah khomh twi twi mhayah yoh nyvng, nghuot laus eq gohyos masyah gas ma yoh nyvng. Hauh tanzoe houmha khvnyhik jweh shoq joq.
10 Hauh Thanghchvp Kwi khau mha Israel jens Egutu masyah thuq las Yhensain Horeb boms mas nyamoq yah thanghchvp toh uhlyis, Moshe kat toh dah luk lhywaq aiq koeuq mas lai las gohtoeu cha ma bos.Ref 5.10: Lyi 10.5
Yhensain dah Phunk
11 Hauh thang lhyi phudyei bang Gyingshang Joqyos masyah thuq los. Hauh nyeih lyis yvwons vvng laus ma vvng laus houmha jweh nyeis dah phudyei bang dvnganh nyamoq gungs cheihshang goeus.
12 Chunghthwe kat dah Lewi jens Asap, Heman, Yeduthun moq yahge nyamoq loloeu jens, nyamoq boekyis jens yah dyithyoeu yhwiq wuot, janghau, twih bos dah toenk, khvlhank chi lha phon buisthuq shot pheh tsain yap joq. Lvbuh muot dah phudyei bang 120 yuk bos.
13 Lvbuh muot bang yahge chunghthwe kat bang gas dvgeh Yhensain lhyi nhaiqshoqlang ge, lvbuh janghau, turiya yah Yhensain lhyi dvthwe teh kaiq chungh zis gas;
Nyang gas gis,
Nyah lomluk jyetdap cho vcaiq vto goeng joq, ge.Ref 5.13: 1Ss 16.34; 2Ss 7.3; Ezr 3.11; Chd 100.5, 106.1, 107.1, 116.1, 136.1; Yer 33.11
Hauh uhlyis jyommauh gas Yhensain dah Yhenmuh mas dyingh toh.
14 Yhensain dah phunk gas Mangso dah Yhenmuh mas dyingh joq yvmvyah phudyei bang nyamoq dah phudyei muh ma yoh kuot. Nyamoq Yhenmuh masyah thuq loh chah.Ref 5.13-14: Dyu 40.34-35