32
Asiria, Yerusalem lyis Kyuk
(2Hw 18:13-37; 19:14-19, 35-37; Esa 36:1-22; 37:8-38)
Hwankti Hezekia haih muh lomluk luk dye kuot thang lhyi Asiria hwankti zainsmuh Senakherib gas Yuda mau lyis los zan. Nyang gas goengtoenk dah Yuda wus jens lyis lhaink toh las nyah thoenkgus jesdvp lyis wusciank bat khyop las wvng das xiklyis vmingh dyei. Senakherib gas Yerusalem lyis eq zan das ge sont cho Hezekia sohseq lyis, nyang gas nyah zau jens yahge jes muh wons bang lyis nyei gyo las nyamoq gas wus nghe pheh jeislo lvng yaus thuq loh cho lhyi cheiq tyamp das xiklyis xam thyet. Nyamoq gas dius phung zains dvphung lhyi shwih las pa mha yaus loh dah jeislo lvng, jeiskhyoh jens lyis cheiq tyamp. Nyamoq taiq, Chamus Asiria jens jeis nyoshoq los xo nyvng das lah, ge. Hauh thang lhyi nyang gas bangh joq dah wusciank deh khanghmuh lyis soq pho lha tyoeuqzvm jens lyis tsuk, hauh wusciank nghe pheh tsai wusciank dvpuk doms ci. Dawi dah wus mas Milo ge gvduk lyis zes goengtoenk shoq doms soq las jes kyonhkhyi yahge gos eq nyoshoq kuot toh. Nyang gas wus mas nyeis vbusbih dvnganh lyis jeszau jens dah vmingh o mha toeuq toh las wus khomh nvm mas dah pazoe nyah xikkhonh mas zain das xiklyis taiq toh. Nyamoq lyis nyang yomdyei zis gas, Yomhuont geh, womh womh kuot geh. Asiria hwankti zainsmuh nghuot ya nyah dah jesdvp zainsmuh lyis vgyuk goh. Yah shot pheh nyah thoq lyis loh thank dah yomsoq bos soeu Mangso nyeis. Nyang gas thoenkgus jesdvp zainsmuh yoh das, nghuot laus eq nyamoq gas dius dvnghuot. Yang gas yang lyis pangh las yah xiklyis jes bos zan dyei Yhensain, yah Mangso yoh, ge. Haih nyamoq hwankti dah dang khonh gas dius jens lyis svsoh yom nyhuk dyei.
Hauh thang, dvshishenh lyis Lakhish wus lyis lhaink nyeis dah Hwankti zainsmuh Senakherib gas Hezekia yahge Yerusalem wus dius jens dvnganh xiklyis haih loeusdang kyoh nhang kat: 10 Asiria Hwankti zainsmuh heisoeh ge, Namoq cha lhyi loms toh las ngos Yerusalem lyis lhaink toh masyah namoq yoh luiq das oen nghamh goh lah? 11 Hwankti Hezekia gas, Yhensain, yah Mangso ka Asiria Hwankti zainsmuh dah loq masyah yang lyis lhuiq kat das, ge taiq. Nghuot laus eq Hezekia gas namoq lyis phanghkhauq gyoh, yuot shet las shei das cho pheh dvshwih loh nyeis. 12 Jyoengh nyang namoq sohseq chah zis gas, Hezekia ka Yhensain dah paiq joqyos jens yahge phon dvnganh lyis thyoq tyamp soeu dvnghuot. Nyang gas Yuda yahge Yerusalem bang lyis Yhenmuh mas dah phon mha kyingh paiq las hauh thoq mas kyingh phudyei cho dvgis kuot, ge. 13 Jyoengh nyang namoq gas, ngos yahge ngah xik lyis nyeis dah Asiria hwankti jens gas nyeisjvng thoq mas dah cangsoeu dius dvnganh lyis cha kuot goeus zis lyis sohseq chah. Hauh dius nyau jens dah mangso jens mas ngah dah yomsoq masyah nyamoq dah dius nyau jens lyis yoh kyoeu kat dah mangso vbos lah? 14 Khah mangso ka khanhamp, khamha nyah dius jens lyis ngah jyank masyah yoh khyuot yoeus cho lhyi dvnyings kyingh taiq yoeuh aq. Lholha nah Mangso ka hauh thoq lyis zes las yoh kuot das oen nvng lyis cha yah housoeh nghamh nhang lah? 15 Hezekia yah namoq lyis vmhaushiq nhang goh. Heisoeh teh namoq lyis vmhuih zo nhang. Ngos doms taiq - khah dius nyau dah mangso eq nyah dius nyau lyis ngah jyank nghuot ya ngah phauh thyeih moq dah loq masyah ma yoh kyoeu kat ku shih. Namoq dah Mangso ka ngah yomsoq masyah namoq lyis yoh kyoeu kat das lah!
16 Senakherib dah zau jens eq Yhensain Mangso yahge nyah jyeidwis Hezekia lyis zes zes jwangh. 17 Hwankti zainsmuh gas Yhensain, Israel Mangso lhyi goessang maussauh eq lhaih. Hauh maussauh mas, Gohnyau bang dah mangso jens gas nyamoq dah dius nyau jens lyis ngah yomsoq masyah ma yoh lhuiq kat teh, Hezekia dah Mangso eq vgus nghuot, ge bos. 18 Maussauh wons los zau jens gas hauh lhaih toh zis lyis Hebre nyingh pheh yah wusciank thoq mas zain joq dah dius phung lhyi kaiq kat. Housoeh kaiq zis gas hauh dius phung lyis kyuk, yomshon nhang lha Yerusalem lyis lwis lwis yoh yoeus das xiklyis nghuot. 19 Hauh zau jens gas Yerusalem dah Mangso lhyi dius dah loq yah kuot toh ma jyoeng mangso jens mas dvso lhyi teh sang.
20 Hauh thang lhyi Hwankti Hezekia yahge Amoz dah loloeu lvpe Esaia gas maukhung mha nyeis Mangso lhyi vkyuh kaiq dung. 21 Housoeh lyis Yhensain ka loeuswons soeu lhyi nhang kat las Asiria thoenkgus jesdvp yahge jeszau jens ngislo kuhlo dvnganh lyis mhont tyamp. Housoeh las Senakherib gas nyah yhen, nyah mau pheh xoqphuh zis yah tauh loh lo. Dvnyeih nyang nyah mangso dah yhenmuh mas nyeis nyeis uhlyis, nyah loloeu jens mas dvyhamh gas nyang lyis hauh yhenmuh mha sham yah sat.
22 Haih zis gas Yhensain ka Hezekia yahge Yerusalem bang lyis Asiria Hwankti Zainsmuh Senakherib yahge nyamoq lyis kyuk dah gohyhamh bang dvnganhmoq dah loq masyah kyoeu kat cho nghuot. Housoeh thang thank lyis dvmau gonh nyenstap cho yoh loh. 23 Hauh shishenh lyis yah, Hwankti Hezekia gas vyvm vwi mau jens dah phauh nyang cho gvgis xauh lhom yoeus las Yhensain xiklyis jyungshuk nyoshoq Yerusalem mas jweh los, Hwankti Hezekia xiklyis eq phauhdap jyungshuk bos los.
Hezekia Noslom, Khwank Cho
(2Hw 20:1-3, 12-19; Esa 38:1-3; 39:1-8)
24 Hauh yoq lyis Hezekia gas shei bah ge shoq svsoh nos los. Nyang Yhensain jyank vkyuh dung las Yhensain nyah vkyuh dung dang gyo dyei las comh phoh vlho chixoeuq. 25 Nghuot laus eq Hezekia ka svsoh khwank los las, nyang lyis chixoeuq dah nhaiqnyen shohgyo cho lhyi jus khyvlyis ma yhung. Housoeh las Yhensain dah nhaiqyo cho ka nyah thoq mas, Yuda jens yahge Yerusalem lyis tyi lha jweh los. 26 Thang lhyi Hezekia nyah khwank cho mhayah nhaiqlom thaiq los, Yerusalem wus dius jens nyamoq nhaiqlom nyhen mha khyoq. Housoeh lyis Yhensain dah nhaiqyo cho ka Hezekia kang dwis yoq lyis nyamoq thoq mas ma jweh los.
Hezekia Dis Cho, Khoek Cho
27 Hwankti Hezekia gas svsoh dis gvng mas phauh nyang cho yoh. Nyang gas nyah ngwis, xing, phauhdap luk, yahge xangh, yahge nyah gos jens xiklyis, yahge gohtoeu phauhdap kyahsoe dvnganh lyis toh das xiklyis senhtyau jyi kuot toh chah. 28 Nyang gas nyah jyo yhomh kat das xiklyis, zvbiq saiq yahge tsanlun coeu xiklyis eq jyi nyoshoq kuot. Nyang gas noeu zungs nyang zungs nyoshoq yahge yvng khom shvbeq khom nyoshoq kuot. 29 Hauh thoq lyis yvng, noeu nyang nyhei toh das xiklyis nyang gas wus nyoshoq kuot, khasoeh ge lyis Mangso ka nyang lyis svsoh dis nhang. 30 Nyang gas Gihon thoq pheh dah jeislo lvng lyis caink las Dawi dah wus buiswvng shot, tvp khyoh yah yaus wvng loh nhang. Hezekia ka housoeh cha kuot cha ung. 31 Nghuot laus eq Yuda mau mas bweh goeus dah mauh loqmuh vlho lhyi nyei gyo das xiklyis Babilon mau guon bang nhang kat dah zau jens jweh los uhlyis Mangso ka Hezekia dah ehnyet mas bos zis dvnganh seq das xiklyis shiwu zis xauh nhang.
Hezekia Guon Cho Vthang
(2Hw 20:20-21)
32 Hwankti Hezekia guon cho nyet shih goeu yahge Yhensain xiklyis nyang kyauh toh cho dvnganh lyis Yuda yahge Israel Hwankti jens dah mvnyei buk mas bos dah Amoz lo lvpe Esaia dah nyoqnyvng mas lhaih toh. 33 Hezekia shei lha hwankti jens dah lop mas nyhop toh. Nyang shei uhlyis Yuda yahge Yerusalem bang dvnganh phauh nyang cho kuot. Nyah joqyos mas nyah lo Manase guon.