29
Yuda Hwankti Hezekia
(2Hw 18:1-3)
1 Hezekia aiqci oeng zvn bos lyis hwankti bweh los las Yerusalem mas aiqci gau zvn guon khoq. Nyah ungwes gas Zekharia lonyi Abiya nghuot.
2 Nyang gas nyah phauh thyeih Hwankti Dawi kuot zis yah dvyhangteh Yhensain dah nhaiqdoeus cho kuot.
Hezekia Yhenmuh Shang
3 Nyang guon dah cangxeih vzvn cangxeih vkhyvp mas nyang Yhenmuh khomh phank las soq.
4 Nyang gas phudyei bang yahge Lewi jens lyis yhenmuh khyam buisthuq shot pheh khi tsainh toh las,
5 nyamoq lyis taiq zis gas, Lewi jens eh, ngah dang gyo geh: vsainnyang gungs lyis eq, Yhensain namoq phauh thyeih moq dah Mangso yhen lhyi eq cheihshang lha hau gyingshang joqyos lyis lhoeuh nhang zis dvnganh yoeus tyamp geh.
6 Yah phauh thyeih moq cu lha Yhensain, yah Mangso nyoqjeih mas ma gis ma shop muh kuot goeus. Yhensain lhyi tyamp las nyang nyeis dah joqyos masyah lhaiq loh goeus, nungs phuk khoq goeus.
7 Nyamoq gas Yhensain dah yhen ganthoq khomh nyheih goeus, nyitoengh eq sat las Yhenmuh mas Israel Mangso lhyi xangh ma ngheq dyei, ngheq phudyei eq ma kuot lo.
8 Housoeh las Yhensain dah nhaiqyo zis gas Yuda mau yahge Yerusalem wus thoq mas jweh las namoq nyvng nyeis zis yah dvyhangteh yang mas gyukphoh, dvnphoh, soeu yah jwangh nyhap joqyos bweh nyeis.
9 Jyoengh haih gvng mas, yah uwus moq gas sham jes mas gyoh. Yah loloeu lonyi jens, yah yhensain nyhiq jens gas thungdius khyvlyis jons loh zis xauh goeus.
10 Yhensain, Israel Mangso yah thanghchvp toh das oen gvshih ngos nghamh thyet toh goeus, housoeh lyis nyang gas yang lyis nhaiq ma yo lo das.
11 Ngah lo jens eh, vsheq nyeis lo goh. Yhensain xikkhonh mas yap las phuqsoe, nyah muh wons wuq geh, xangh ngheq dyei geh, ge. Yhensain nyah xikkhonh mas yap das xiklyis namoq lyis khyen goeus.
12 Housoeh Lewi vkoq mas toq bang gas,
Kohat vhuh mas Amasai lo Mahat, Azaria lo Yoel;
Merari vhuh mas Abdi lo Kish, Yehalela lo Azaria,
Gershon vhuh mas Zima lo Yoa, Yoa lo Eden;
13 Elizaphan lo Shimri yahge Yeruel;
Asap lo Zekharia yahge Matana;
14 Heman lo Yehuel yahge Shime;
Yeduthun lo Shemai yahge Uziel moq nghuot.
15 Nyamoq gas boekyis lyis tsainh las nyamoq gungs gyingshang nhang lha hwankti taiq toh zis yah dvyhangteh, Yhensain dah Lyi khyvlyis Yhenmuh cheihshang das xiklyis wvng loh.
16 Phudyei bang gas Yhenmuh lyis cheihshang das xiklyis vkhau yvp mas wvng las, ma gyingshang zis dvnganh shang lha Yhenmuh ganthoq mas yoeus thuq. Hauh yvlyis Lewi jens gas wus nghe, Kidron langhkhau pheh yoeus loh.
17 Cangxeih vkhyvp das vnyeih lyis thyauhlhyang muh xi lha xet vnyeih lyis Yhenmuh ganthoq mas jweh. Hauh thang lhyi xet nyeih top Yhenmuh lyis kyingh cheihshang lha cangxeih vkhyvp dvci khyuk vnyeih lyis dye.
Yhenmuh Doms Kyauh
18 Nyamoq hwankti Hezekia lyis loh taiq zis gas, Ngamoq Yhensain dah yhen dvnganh, nyi ngheq phon yahge nyah kyahsoe, chixoeuq ohlhyoq kih dah kihgus yahge vyhang dvnganh cheihshang goeus.
19 Hauh thoq lyis hwankti Ahaz gas nyah zaih lyis mvgon kuot tyamp dah vyhang dvnganh lyis ngamoq soq zis yah cheihshang lha Yhensain dah phon xik mas kih toh goeus, ge.
20 Housoeh las Hwankti Hezekia gas noq yah toq, wus guon bang lyis tsainh las Yhensain dah yhenmuh pheh doq loh.
21 Nyamoq gas munghdan xiklyis eq, hau gyingshang joqyos yahge Yuda mau xiklyis eq yobos khyuot phudyei nyhenshang noeulu nyhet doeu, yvnglus nyhet doeu, yvngluslo nyhet doeu, beqlus nyhet doeu chi los. Housoeh nyang gas, hauh zis Yhensain dah phon mha phudyei das xiklyis Aron vnyau vshih jens phudyei bang lyis taiq toh.
22 Nyamoq hau noeulu lyis sat las, phudyei bang gas suih lhom yoeus las phon thoq mas huot gyuon. Yvnglus jens lyis eq sat las suih lyis phon thoq mas huot gyuon. Yvnglo jens lyis eq sat las suih lyis phon thoq mas huot gyuon.
23 Hauh thoq lyis nyamoq gas yobos khyuot phudyei nyhenshang beqlus jens lyis hwankti yahge moqphung xikkhonh mas she los las hauh beqlus jens thoq mas nyamoq dah loq tsain kih toh.
24 Phudyei bang gas hauh yvlyis tsain sat las Israel dvnyau gonh nyhenshang mehoq tamp phudyei kuot las hauh suih phon thoq mas huot gyuon. Khasoeh ge lyis ngheq phudyei eq, yobos khyuot phudyei eq Israel dvnyau gonh nyhenshang nghuot bas jungh ge, hwankti tying toh.
25 Tsai nyang gas Yhensain nyah lvpe jens lyis taiq toh las Dawi yahge nyah lvpe Gad yahge Nathan doms taiq toh zis yah dvyhangteh, janghau, twih bos toenk bat dah Lewi jens lyis Yhensain Yhenmuh mas toeuq toh.
26 Lewi jens gas Dawi dah bat ja chi lha, phudyei bang gas lvbuh chi lha yap joq.
27 Hezekia gas hau phon thoq mas ngheq phudyei das zis taiq toh. Ngheq jyungshuk phudyei xi lhyi lvbuh muot bang yahge Israel Hwankti Dawi toeuq toh dah bat ja chi bang gas bat zis yah Yhensain lhyi chunghthwe kat xi.
28 Housoeh ngheq dyei jyungshuk dye ngheq phudyei shoq moq dvphung gonh paiq las, chunghthwe kat bang kat, lvbuh muot bang eq tsoq muot nyeis.
29 Dye phudyei lyis hwankti yahge houmha huom nyeis bang dvnganh gas paiq gop joq.
30 Hauh thoq lyis Dawi yahge lvpe Asap moq dah lvkhyank dang yah Yhensain lhyi chungh geh ge, hwankti Hezekia yahge uhshe bang gas Lewi jens lyis taiq toh. Nyamoq eq gausyis zis yah chunghthwe kat las paiq gop joq.
31 Hezekia phuk taiq zis gas, Gvshih namoq nyang gungs Yhensain xiklyis cheihshang goeus. Los geh, Yhensain yhen khau mha lomhxangh yahge nhaiqshoqlang jyungshuk chi los geh, ge. Housoeh moqphung ka lomhxangh yahge nhaiqshoqlang jyungshuk chi los las ngheq phudyei jyungshuk lyis nyamoq xihhonh nyhoq nyoshoq tsain chi los.
32 Moqphung ka Yhensain lhyi ngheq phudyei das xiklyis tsain chi los dah jyungshuk dvnganh lyis noeulu nyhetci, yvnglus dvxo, yvnglus lo aiqxo nghuot.
33 Dyei toh goeus dah phudyei dvnganh gas noeulu khyukxo, yvng somh khyoengh nghuot.
34 Phudyei bang ma nyo las ngheq jyungshuk lyis yeis ma tsain thoq cwe. Housoeh las nyamoq dah vmang vnoeuh Lewi jens muh dye las phudyei bang gas nyamoq gungs lyis yoh cheihshang shoq bos pangh. (Lewi jens gas nyamoq gungs shangkyei das nyhenshang phudyei bang thoq lyis zes lomluk.)
35 Ngheq phudyei, nyenstap jyungshuk coeu yah dvgeh ngheq phudyei jyungshuk khanghmuh xiklyis shukphoh jyungshuk bos zis vbomsdom nghuot. Housoeh Yhensain dah Yhenmuh mas paiq cho doms xi goeus.
36 Mangso ka hauh muh lyis eq dius jens xiklyis nyap nyap bweh nhang lha, Hezekia eq dius jens dvnganh eq gauslaus.