25
Yuda Hwankti Amazia
(2Hw 14:2-6)
1 Amazia hwankti bweh los lyis aiqci oeng zvn nghuot las Yerusalem mas aiqci gau zvn guon khoq. Nyah ungwes gas Yerusalem mas dah Yehoadin nghuot.
2 Nyang gas Yhensain dah nyoqlvtjvng mas jus zis kuot laus eq nyah ehnyet dvnganh yah ma nghuot.
3 Hauh munghdan nyah loq mas doengs yah dvyih, nyah uwus hwankti lhyi sat dah zau jens lyis sat.
4 Lo jens gvng mas uwus moq lyis ma gis sat, nyhiphoq moq gvng mas lo jens lyis ma gis sat, hank eq hank nyang dah yaunos xiklyis sat zis dvxauh chah ge, Yhensain Moshe dah lyi maussauh mas lhaih toh zis yah dvyhangteh nyang gas hau dius sat bang dah lo jens lyis ma sat.Ref 25.4: Lyi 24.16
Edom lyis Tyi Jeskhyomp
(2Hw 14:7)
5 Hwankti Amazia gas Yuda yahge Benyamin vkoq jens lyis nyah vhuh yah vhuh jesmuh mas gvn toh lho lha, dvkhyoengh guon zau jens yahge dvxo guon zau jens lyis eq toeuq toh. Nyamoq dvnganh gas 300,000 yuk bos las nyenhkyi aiqci zvn thoq pheh nghuot. Nyamoq gas lham, gos chi lyes bang, jeszan khyomp xiklyis cicont jesphung nghuot.
6 Hauh thoq lyis nyang gas ngwis paung 6,800 dyei las jeszan lyes Israel jeslo 100,000 yuk lyis nghoh.
7 Nghuot laus eq lvpe dvyuk hwankti jyank loh las taiq zis gas, Nvng haih Israel jeslo jens lyis nvng yah dvgeh vshwih. Khasoeh ge lyis, Yhensainka haih mautsung bang yah dvgeh ma nghuot.
8 Nyamoq gas jeskhyomp mas nvng lyis yom zes bos nhang das ge nvng nghamh das, nghuot laus eq Mangso ka ung nhang das nghuot yah somh nhang das dah yomsoq bos soeu nghuot las nyang gas nah jeswus lyis nah thoq mas zan ung nhang das, ge.
9 Amazia hauh lvpe lyis nyei zis gas, Nghuot laus eq ngos nyamoq lyis phauh dye dyei goeus, hauh ngwis xiklyis ngos khasoeh kuot das lah, ge.
Lvpe doms toeuh zis gas, Yhensain ka hauh thoq lyis nvng lyis doms yoh dyei, ge.
10 Housoeh las Amazia gas nyang nghoh toh goeus jesphung lhyi nyamoq yhen pheh doms nhang kat. Haih gvng mas nyamoq gas Yuda dius jens lyis svsoh nhaiqyo.
11 Amazia gas yomhuont las nyah jesphung lhyi Coh Langhkhau pheh shwih loh. Houmha nyamoq jeszan las Edom jeslo dvmons lyis sat,
12 las gohtoeu dvmons lyis gas nyhik los. Nyamoq gas hauh nyhik los bang lyis Sela wus dah gammhung thoq mas shwih loh las hou mhayah duon thyet khyoq kat. Housoeh nyamoq gas o mha joq dah lukthe thoq mas gyoh shei tyamp.
13 Hauh uhlyis Amazia jeskhyomp pheh ma shwih loh dah Israel jeslo jens gas Samari yahge Bet Horon vjo wus jens mas nyeis dah Yuda vbusbih somh khyoengh lyis sat las lvnyhvp nyoshoq yoeus loh tyamp.
14 Amazia Edom bang lyis zan ung lha doms los lyis, nyang gas nyamoq dah silho jens lyis nyang yah dvgeh yoeus los, hauh zis lyis tsuk toh, hauh silho jens lyis paiq las xangh ngheq dyei.
15 Housoeh kuot cho lhyi Yhensain nhaiqyo, las Amazia jyank lvpe dvyuk nhang kat. Hauh lvpe gas, Nah yomsoq masyah nyah dius jens lyis eq ma yoh khyuot yoeus dah gohnyau mangso jens lyis chamus paiq lah, ge nyho.
16 Amazia gas, Nvng lyis hwankti dah joeui dyei soeu khyvlyis ngamoq khanhamp lyis yah toeuq toh goeus lah? Tsoek no aq, ma nghuot lyis ngos nvng lyis sat das, ge danglat thyet.
Hauh lvpe tsoek no, nghuot laus eq heisoeh ge taiq shih, Mangso ka nvng lyis mhont das gvshih ngos seq khasoeh ge lyis nvng hei teh zis dvnganh kuot, ngos dyei dah joeui dang lyis gas pvlhyahlyoeus kuot goeus, ge.
Israel lyis Tyi Jeskhyomp
(2Hw 14:8-20)
17 Hwankti Amazia yahge nyah joeui dyei bang gas Israel lyis tyi das xiklyis sont. Hauh thang lhyi Amazia gas Israel Hwankti Yehoash jyank mas loeuskyoh bang nhang lha taiq kat zis gas, Yang dvyuk yah dvyuk jeszan goh goh, ge. Israel Hwankti Yehoash gas Yehoahaz dah lo, Yehu dah nyeilo nghuot.
18 Yehoash yah, Amazia lyis taiq kat zis gas, Dvnyeih lyis Lebanon zoeugyomh gas Lebanon Arit zains jyank mas, Nah lonyi ngah loloeu lyis dyeizo aq, ge. Yewus dvdoeu lai loh lyis zoeugyomh lyis nang pyeh tyamp.
19 Gvshih Amazia nvng Edom lyis yoh zan ung lha ehnyet nyhang joq. Nvng nah Ung cho mha nyeis aq. Nvng eq nah dius jens eq dyoqbis das xiklyis chamus soepan nyeis lah, ge.
20 Nghuot laus eq Amazia gas ma gyo. Amazia jes somh zis gas Mangso dah o cho nghuot, khasoeh ge lyis nyang Edom jens dah silho jens lyis paiq.
21 Housoeh las Israel Hwankti Yehoash ka nyang lyis Yuda mau Betshemesh mas jes loh zan.
22 Amazia dah jesphung ka Israel lyis somh las nyah jeslo dvnganh gas vsainnyang yhen pheh phang loh.
23 Yehoash gas Betshemesh mas Amazia lyis nyhik. Tsai, nyang Yerusalem mas loh las Yerusalem wusciank loqbon nyeixo lhyi Ephraim khomh masyah Vthunk Khomh jweh shoq thyoq khyoq.
24 Nyang gas Yhenmuh zisyos mas dah ngwis xing dvnganh yahge Obed Edom dah vnyau vshih jens tsomh dah yhenmuh kyahsoe yahge hwankti yhen mha dah zisyos lyis Samari pheh yoeus loh. Nyang gas nyah kang gos dyei das bang lyis eq shwih loh.
25 Hwankti Amazia gas Israel Hwankti Yehoash shei thang lhyi dvci oeng zvn nyeis shih.
26 Amazia guon yoq lyis vsaiq masyah thang thank jweh shoq bweh cho nyet shih goeu dvnganh lyis Yuda yahge Israel Hwankti jens dah mvnyei buk mas lhaih toh.
27 Amazia Yhensain thang chank cho mhayah nungs phuk loh dvnyeih masyah Yerusalem mas nyamoq nyang lyis sat das xiklyis kuot las nyang gas Lakhish pheh phang loh. Nghuot laus eq nyamoq Lakhish pheh nyah thang mha dius nhang lha nyang lyis houmha sat.
28 Nyah mvng lyis nyang masyah thuq los las Dawi dah wus Yerusalem mas hwankti lop mas nyhop.