23
Athalia lyis Gomloeus toq
(2Hw 11:4-16)
1 Khyuk zvn langh thang lhyi phudyei soeu Yehoiada gas kuot loh chah goeus ge nghamh thyet. Nyang gas xosoe guon jeszau jens ge, Yeroham lo Azaria, Yehohanan lo Ishmael, Obed lo Azaria, Adaia lo Maseia yahge Zikhri lo Elishaphat moq yah xamxonh cho kuot.
2 Nyamoq gas Yuda mau gonh mas loh las Yuda wus jens masyah Lewi jens yahge Israel jens dah vhuh uhshe bang lyis tsainh las Yerusalem mas shwih los.
3 Nyamoq dvnganhmoq Yhenmuh mas zain las hwankti dah lo Yoash yah thanghchvp toh. Yehoiada nyamoq lyis taiq zis gas, Hei ka thang thank hwankti dah loloeu nghuot. Yhensain ka Dawi dah vnyau vshih jens lyis dangthoengh toh zis yah dvyhangteh, gvshih nyang hwankti bweh das.
4 Heika yamoq kuot das cho nghuot. Yuda no nyeih lyis muh wons das ge wvng los dah phudyei bang yahge Lewi jens somh boms dvboms Yhenmuh khomh zungh chah.
5 Somh boms dvboms gas hwankti yhen mha, somh boms dvboms gas Yhen-yos Khomh mas zungh chah. Dius dvnganhmoq gas Yhenmuh Khyam khau mha zain das.
6 Muh oen phudyei bang yahge Lewi jens masyah lai las hank eq Yhenmuh khau mha vwvng. Nyamoq lyis cheihshang las gyingshang goeus las yoh wvng loh. Nyet dah dius dvnganh gas Yhensain taiq toh dang lyis chank las nghe pheh langh nyeis das.
7 Lewi jens gas hank eq hank nyang sham lham chi lha hwankti lhyi lhaink toh las, yhenmuh khau mha wvng soeu hank lyis laus eq sat geh. Hwankti khalhye loh khalhye chank geh, ge toh.
8 Housoeh Lewi jens yahge Yuda jens dvnganh gas phudyei Yehoiada vmingh dyei zis yah dvyhangteh chank kuot. Phudyei Yehoiada khaphung lyis eq ma no nhang gvng mas yuk khanghmuh gas vsainnyang dah dius: Yuda no nyeih lyis muh vvng bang yahge muh no bang lyis shwih toh.
9 Phudyei Yehoiada gas Yhenmuh mas joq, Hwankti Dawi dah lham jens, gos kuh gos ngis lyis xosoe guon jeszau jens lyis kyauh.
10 Hank eq hank nyang loq mas kyonhkhyi chi dah bang lyis hwankti yvmlhaink - yhenmuh loqyos shot masyah loqwi shot jweh shoq, phon yahge yhenmuh yvmlhaink yah toh.
11 Yehoiada yahge nyah loloeu jens gas hwankti dah loloeu, Yoash lyis shwih thuq las, hwankti buismuk tsungh dyei; nyamoq gas Yoash lyis Mangso dah lyi dvbuk dyei las hwankti nghuot ge taiq hoeuh. Nyamoq gas, nyang lyis coeu juot dyei las kaiq zis gas, Hwankti kang xing bas jungh, ge.
12 Athalia gas, dius jens wuih sam yahge hwankti lhyi chungh dah thwe xauhgyo lyis, dius jens huom joq dah Yhenmuh pheh gyis jweh loh.
13 Houmha nyang yoeuh kat lyis, hwankti saiq ka Yhenmuh khomh, hwankti jens dah senhtyau zains nvm mas yap joq, jeszau jens yahge lvbuh muot bang gas nyah vyvm mas nyeis. Dius jens dvnganh gauslaus gausseq kaiq nyeis, lvbuh muot nyeis, yhenmuh chunghthwe kat bang nyamoq dah lvbuh janghau bat las pwe shwih uhshe nyeis. Housoeh las Athalia gas nhaiqngis las nyah dyimis lang chuiq zis yah kaiq zis gas, Gomloeus, gomloeus, ge.
14 Phudyei Yehoiada gas nyang lyis Yhenmuh khau mha vsat goh, nyang lyis nghe pheh shwih thuq las nyah thang chank bang dvnganh lyis eq sham yah sat geh, ge jesphung lhyi shwih dah xosoe guon jeszau jens lyis taiq.
15 Housoeh las nyamoq Athalia lyis nyhik las hwankti yhen pheh loh dah Nyang Khomh dwang mas sat.
Yehoiada Doms Soq
(2Hw 11:17-20)
16 Hauh thang lhyi Yehoiada gas nyang eq Hwankti Yoash yahge dius jens dvnganh eq Yhensain dah dius jens duot bas jungh ge, thanghchvp toh.
17 Hauh thang lhyi nyamoq dvnganh gas Bala yhen lhyi loh thyoq tyamp. Hau phon jens yahge gungslho jens lyis khyop tyamp. Bala phudyei soeu Matan lhyi phon jens xik mas sat.
18 Yehoiada gas phudyei bang yahge Lewi jens lyis Yhenmuh dah muh wons wuq das xiklyis toeuq toh. Nyamoq gas Hwankti Dawi nyamoq lyis toeuq toh dyei yvwons yahge Moshe dah Lyi mas lhaih toh, Yhensainlhyi ngheq phudyei cho kuot chah. Nyamoq gas thwe yunghnote 23.18 Thwe Yungh: ge zis Music lyis taiq yahge pwe kuot cho mha eq yvwons yoeus chah.
19 Yehoiada gas Yhenmuh mas ma lhoq ma shang soeu hank laus eq ma wvng bas jungh, Yhenmuh khyam khomh jens mas zungh bang eq toh.
20 Jeszau jens, nyoqnho ngelang bos bang, mungh zau jens yah hauh mau mas dah dius jens gas Yehoiada yah dvgeh, hwankti lhyi Yhenmuh masyah shwih thuq las vgungs khomh cho yah hwankti yhen pheh shwih loh. Hwankti ka nyah joqyos hwankti tank mas tsung.
21 Dius dvnganh tsain gaus. Athalia lyis sham yah sat goeus las hauh wus gas tam joq.