22
Yuda Hwankti Ahazia
(2Hw 8:25-29; 9:21-28)
1 Arab dius jens dvyhamh los zan thyoq loh las Yehoram dah lothank Ahazia mas lai las lo jens dvnganh lyis sat. Housoeh las gvshih Yerusalem mas nyeis bang gas Ahazia lyis nyah uwus dah gungsthaiq hwankti kuot.
2 Ahazia hwankti bweh los lyis nyang aiqci aiq zvnnote 22.2 22 zvn ge yvmas, Hebre mas 42 zvn ge taiq toh. bos goeus. Nyang Yerusalem mas dvzvn guon khoq. Nyah ungwes gas Israel hwankti Omri dah nyeilo, Ahab dah lonyi Athalia nghuot.
3 Ahazia gas nyah ungwes joeui dyei yvmvyah, Ahab yhenbang dah cho chank las ma gis zis kuot.
4 Nyang gas Yhensain dah nyoqlvtjvng mas yaunos kuot, khasoeh ge lyis nyah uwus shei thang lhyi Hwankti Ahab yhenbang dvyhamh nyah dah joeui dyei bang bweh los las nyamoq gas nyang lyis dyoqbis cho pheh shwih loh.
5 Nyamoq dah joeui dyei thang chank las nyang gas Siria hwankti Hazael yah jeszan goh yvmas Israel Hwankti Yoram yah loh. Ramot Gilead mas jes jens zan goh las hauh jeszan khyomp mas Yoram lyis dvmtap kat.
6 Yoram gas nyah dvm yhoh gis das xiklyis Yezrel wus pheh tauh loh. Ahazia gas Yezrel mas nyang lyis nos loh komh.
7 Mangso ka haih Yoram lyis loh komh zis lyis nyah dah dyoqbis cho bweh nhang. Ahazia jweh lyis, nyang gas Yoram yah dvgeh Nimshi lo Yehu lhyi loh xauhgoh. Yehu lhyi Mangso ka Hwankti Ahab yhenbang lyis mhont das xiklyis coeu juot toh dyei.
8 Yehu ka Ahab dah yhenbang thoq mas Mangso dah joeng cho chank kuot yenh lyis, Ahazia thang chank dius phung nghuot dah Yuda zau jens yahge Ahazia dah vmang vnoeuh lo jens yah xauhgoh las nyang hauh dius phung lhyi sat.
9 Hauh thang lhyi nyang Ahazia lyis chank xo, Ahazia Samari mas tamh joq yvmas nyah dius jens loh nyhik los. Nyang lyis Yehu jyank shwih los las sat. Nghuot laus eq, nyah vphauh Hwankti Yehoshaphat lyis phauh nyang khyvlyis yah nyamoq nyang lyis nyhop. Yehoshaphat gas Mangso lhyi nyah ehnyet nhaiqlom dvnganh yah xo soeu nghuot. Yuda mau lyis guon das xiklyis Ahazia yhenbang masyah dvyuk eq ma bos lo.
Yuda Hwankti nyhiq Athalia
(2Hw 11:1-3)
10 Hwankti Ahazia dah ungwes Athalia gas nyah lo sat xauh zis nyvng seq yah dvyih, Yuda hwankti yhenbang dvnganh lyis sat das xiklyis vmingh dyei.
11 Nghuot laus eq Ahazia dah nhamhmuh (ungwes gohyuk), hwankti Yoram dah lonyi, phudyei Yehoiada dah yhensain nyhiq, Yehosheba gas Ahazia dah lo Yoash lyis sat das dah hwankti lo jens masyah khauh loh. Housoeh Athalia masyah luiq das xiklyis nyamoq gas nyang lyis lo yoeus soeu yah Yhenmuh yhet yvp mas shung toh, housoeh las nyang gas sat zis ma xauh.
12 Housoeh Athalia hwankti nyih hauh mau lyis guon yoq lyis hauh lo lyis Yehosheba yoeuh dyangh las Yhenmuh khau mha khyuk zvn shung toh.