19
Lvpe,Yehoshaphat Cu Cho Taiq
Yuda Hwankti Yehoshaphat gas Yerusalem, nyah yhen pheh jesluiq shohluiq tauh los. Hanani dah lo lvpe Yehu ka Hwankti Yehoshaphat lyis zes das ge thuq loh. Nyang taiq zis gas, Yhensain lhyi hoeng soeu lhyi jyet das lhyeh? Yhensain lhyi lhung soeu lhyi pangh gis lhyeh? Haih gvng mas Yhensain dah nhaiqyo zis gas nah thoq mas jweh goeus. Nghuot laus eq nvng mau gonh mas saiq gungslho lhyi khyom tyamp, Mangso lhyi xo das ge sont cho, gis cho nvng mas bos, ge.
Yehoshaphat Soq Cho
Yehoshaphat gas Yerusalem mas nyeis. Tsai, nyang Besheba wus masyah Ephraim boms mau mas jweh shoq loh las, dius jens lyis, Yhensain, nyamoq phauh thyeih moq dah Mangso jyank pheh shwih tauh los. Nyang Yuda mau gonh mas dah ciankci wus jens dvwus dvwus mas soetuon bang toh las, soetuon bang lyis taiq toh zis gas, Namoq gas dius xiklyis phuqsoe zis ma nghuot, soetuon yvmas namoq yah nghuot dah Yhensain xiklyis dvnghuot las namoq cha kuot yvlyis zaih geh, ge. Housoeh yvmvyah Yhensain lhyi gyukwoms cho ka namoq mas bos bas jungh, zaih las kuot geh. Yhensain, yah Mangso ka lyi ma chi cho ma bos, nyoqnho lhyi ma yoeuh, khauwhot ma zo, ge.
Hauh thoq lyis Yehoshaphat gas Yerusalem mas Yhensain dah lyi eq, zaukauq goh cho lhyi eq soetuon dyei das xiklyis Lewi jens, phudyei bang yahge Israel vkoq uhjyung jens dvyhamh lyis toeuq toh. Nyang nyamoq lyis taiq toh zis gas, Namoq gas Yhensain lhyi gyukwoms las wontang dah ehnyet yah lomluk luk kuot geh. 10 Wus mas tsain nyeis, namoq boekyis jens gas, dius sat soe, nghuot ya Mangso dah tyingtoh dang lai las shuot cho bos las namoq jyank los kauq lyis, namoq yahge namoq boekyis mas Yhensain dah nhaiqyo cho ma jweh das xiklyis, nyamoq Yhensain lhyi ma cu bas jungh, taiq kyingh geh. Housoeh kuot lyis namoq yobos ma bos das. 11  Yhensain yah sen cho dvnganh mas phudyei uhjyung Amaria namoq thoq mas yoeuh das. Munghdan soe dvnganh mas Yuda vkoq mas guon soeu Ishmael lo Zebodia yoeuh das. Lewi jens gas lyi bos khyvlyis kuot cho mha namoq lyis pangh das. Namoq dah yvwons womh womh kuot geh, Yhensain ka gis bang shot pheh nghuot, ge.