14
Asa Ethiopia lyis Ung
Hwankti Abiya shei lha Dawi dah wus hwankti lop mas nyhop zis xauh. Nyah lo Asa ka nyah gungsthaiq hwankti bweh los las Asa zaih lyis Yuda mau dvci zvn nyenstap pyo. Asa ka jus cho, gis cho kuot las Yhensain nyah Mangso lhyi nhaiqdoeus nhang. Nyang gas gohnyau bang dah phon yahge ma jyoeng mangso jens lyis paiq dah joqyos lyis mhont tyamp, gyingshang lukzains jens lyis bat khyauh, gywes nyhiq Ashera dah gungslho lhyi bat khyop tyamp. Nyang gas Yuda dius jens lyis Yhensain nyamoq phauh thyeih moq Mangso dah o cho chank kuot das zis yahge nyah jyauh cho, nyah tyingtoh dang lyis domsyos gyo das xiklyis vmingh dyei. Nyah guon zaih lyis Yuda mau gas nyenstap joq, khasoeh ge lyis nyang gas Yuda mau gonh mas dah ma jyoeng mangso jens lyis paiq joqyos, xangh ngheq phon dvnganh lyis yoeus tyamp. Hauh yoq lyis nyang gas Yuda wus jens mas goengtoenk wusciank ci lha zvnlom nyoshoq jeszan cho ma bos, khasoeh oen lhyi Yhensain nyang lyis nyenstap cho dyei. Nyang Yuda dius jens lyis taiq zis gas, Yang wusciank, tyoeuqzvm, yoh nyheih yoh phank dah wus khomh kuot las wus jens lyis goengtoenk nhang goh. Haih mau gas yah zis nghuot, khasoeh ge lyis yang gas Yhensain, yah Mangso dah nhaiqdoeus cho xo lha nyang yang lyis gomh, shot khanghmuh mas jesluiq cho dyei, ge. Housoeh nyamoq gas toeuq toh zis lyis tsuk las kuot nyuk.
Hwankti Asa ka Yuda vkoq masyah gos, lham chi jeslo somh sen yahge Benyamin vkoq masyah gos, lyei chi jeslo aiq sen xet mons bos thoenkgus jesdvp yoh. Nyamoq gas womh las puot toh goeus bang nghuot.
Sudan dius Zera ge soeu ka dius dvwvn, jeslhyingh somh xo yah Yuda mau lyis Maresha jweh shoq los zan. 10 Asa nyang lyis loh zan lyis Maresha nvm Zephatha Langhkhau thyishot haqshot nyamoq joqyos yoeus toh goeus. 11 Asa ka Yhensain nyah Mangso jyank vkyuh dung zis gas, Yhensain eh, nvng gas yomnhuk bang lyis eq, yom bos bang lyis eq yoh zan das xiklyis nvng yoh pangh. Yhensain, ngamoq dah Mangso eh, ngamoq lyis gvshih pangh aq. Ngamoq nvng lyis khau nges las nah nyings mas ngamoq haih jesphung zainsmuh lyis zan das. Yhensain nvng gas ngamoq dah Mangso nghuot; hank eq nvng lyis zan ung das ge ma yoh nghamhloms.
12  Yhensain ka Asa yahge Yuda jesphung xikkhonh mas Sudan dius jens lyis zan ung lha jeswus jens gas phang loh tyamp. 13 Asa yahge nyah thoenkgus jesdvp nyamoq lyis Gerar jweh shoq chank khat las Sudan dius jens gas yomzains yah yoeus tyamp zis xauh gvng mas dvyuk eq kang ma luiq lo. Khasoeh ge lyis nyamoq gas Yhensain yahge nyah jesphung xikkhonh mas mhont tyamp zis xauh. Jesdvp gas lvnyhvp nyoshoq xauh yoeus. 14 Tsai, nyamoq gas Gerar vyvm vwi mas dah wus jens lyis yoh mhont tyamp, khasoeh ge lyis nyamoq gas Yhensain lhyi tsain gyuk boms. Thang thank lyis nyamoq lvnyhvp nyoshoq xauh yoeus. 15 Nyamoq gas hauh vyvm vwi mas nyeis dah yvng yoeuh bang dah thoenggus lyis eq zan las yvng, gola-u nyoshoq lyis yoeus las Yerusalem pheh tauh loh.