13
Thanghchvp Kwi Yoeus los
(2Sa 6:1-11)
1 Hwankti Dawi gas jes khyoenghsoe guon, xosoe guon dah zau jens eq bos dah nyah zau jens dvnganh yah xamgoh.
2 Israel moqphung gonh lyis taiq zis gas, Namoq xiklyis eq gis teh nghuot las, Yhensain, yah Mangso gyo lyis gas, Israel mau dvkhau yah nyet joq shih dah vmang vnoeuh moq yahge vsainnyang wus, katjang mas nyeis dah phudyei bang yahge Lewi jens, yang yah dvgeh zophuom das zis khi nhang goh.
3 Yang yah Mangso dah thanghchvp Kwi mha ma xauh nyei yoeuh zis Saulo zaih lyis yah nghuot goeus las yang hauh yvlyis doms yoeus los goh, ge.
4 Moqphung dvnganh hauh joeui dyei dang lyis gyo o lha hauh zis lyis xihhonh.
5 Housoeh Dawi gas Mangso dah Thanghchvp Kwi lhyi Kiriat Yearimnote 13.5 Kiriat Yearim gas Yerusalem masyah 12 main we. masyah yoeus los das ge, mautyi pheh Egutu mau Shihor lvng masyah mautsung pheh Hamat maukyo jweh shoq dvmau gonh mas dah, Israel jens lyis zophuom nhang toh.Ref 13.5: 1Sa 7.1-2
6 Kherubim jo mas nyeis Yhensain, dah nyings yah sen, Mangso dah thanghchvp Kwi yoeus das xiklyis Dawi yahge Israel jens dvnganh gas, Yuda mau mas Kiriat Yearim ge Bala wus pheh loh.Ref 13.6: Dyu 25.22
7 Thanghchvp Kwi lhyi Abinadab yhen mhayah yoeus las lhyingh saiq mas tsain kih las Uza yahge Ahio gas lhyingh komp.
8 Hauh uhlyis Dawi yahge Israel jens dvnganh gas Mangso lhyi phauh nyang las nyamoq dah yomsoq dvnganh yah tsain goh. Nyamoq gas khvlhank, toenk, jyoeu, noeukhyau, lvbuh janghau muot las chunghthwe tsain kat.
9 Housoeh Khidon thanjang mas jweh lyis noeu jens khyeiuh thungh las Uza gas hauh Kwi lhyi nyah loq yhonh kat las zwi.
10 Hauh uhlyis nyang, Yhensain ka Uza Kwi lhyi zwi gvng mas nyang lyis nhaiqyo las sat. Nyang houmha, Mangso xikkhonh mas shei.
11 Yhensain nhaiqyo zis yah Uza lyis joeng yvmvyah Dawi nhaiqyo. Housoeh hauh joqyos lyis khvnyhik jweh shoq Pere Uzanote 13.11 Pere Uza ge zis gas Uza dah joeng cho ge nyhink.
12 Hauh nyeihyo Dawi gas Mangso lhyi gyuk las, ngos Thanghchvp Kwi khasoeh yoh yoeus loh das au, ge.
13 Dawi gas hauh Kwi lhyi Dawi dah wus Yerusalem pheh ma yoeus loh, Gat mau dius Obed Edom dah yhen mha toh khoq.
14 Housoeh Mangso dah Kwi ka Obed Edom yhenbang yah dvgeh lhamhmuh somh khyvp joq. Yhensain ka Obed Edom dah yhen yahge nyang yoh zis dvnganh lyis shvmanh dyei.Ref 13.14: 1Ss 26.4-5