CHUNGH 97
Guon Soeu Mangso
1 Yhensain ka hwankti nghuot; nyeisjvng dius jens eh, gauslaus geh!
Thomh yahge goeujo mas nyeis bang eh, gauslaus nyeis geh.
2 Jyommauh yahge mauchuotdwang nyang lyis lhaink toh.
Nyang gas dan cho yahge lyi jus cho yah guon nyeis.
3 Nyah xik pheh nyi loh las
nyah vyvm vwi mas dah jeswus jens lyis ngheq tyamp.
4 Nyah maunyoq mungkvn lyis pank dyei;
hauh yvlyis nyeisjvng nyvng las gyuk nvn nyeis.
5 Yhensain xikkhonh, nyeisjvng gonh dah Yhensain xikkhonh mas
boms jens gas dyomanh teh ngeh yaus tyamp.
6 Maukhung ka nyah dan cho lhyi kyoh las,
dius nyau jens dvnganh nyah phunk lyis nyvng.
7 Phvra lho lhyi paiq soeu khanghmuh xoqphuh das;
mangso jens dvnganh gas Yhensain xikkhonh mas dupaiq.
8 Yhensain eh nah soetuon cho gvng mas
Zion mas bang gausyis nyeis.
Yuda wus jens mas bang eq gauslaus nyeis.
9 Maukhung Jesphung Yhensain eh, nvng gas nyeisjvng dvnganh lyis guon soeu nghuot.
Nvng gas mangso jens dvnganh thoq lyis zes kuhxing soeu nghuot.
10 Ma gis yvlyis hoeng bang lyis Yhensain jyetdap;
Nyang gas nyah dius jens dah kang lhyi gos toh dyei;
nyamoq lyis lhung bang dah yomsoq masyah khyuot kat.
11 Dan bang thoq mas bvng zis bvng joq,
dius gis jens mas gaus cho bos.
12 Dan bang dvnganh eh, Yhensain mha gauslaus geh,
nyah gyingshang nyings lyis chungh geh.
Gyingshang Mangso kuot dyei goeus zis lyis nghamh soh las
Nyang lyis nhaiqshoqlang oen geh!