CHUNGH 91
Ngamoq lyis Gomh Soeu
1 Nyhang Thank Soeu dah khaugus mas nyeis soeu ka
Maukhung Jesphung buisshen mha xauh no das.
2 Ngos Yhensain lhyi,
Nvng ngah khaugus, ngah thoenkgus jesdvp,
ngah Mangso nghuot las ngos nvng lyis loms, oen das.
3 Nyang gas nvng lyis ma nyvng dah jes dvnganh masyah lhuiq kat das,
shei nhang yomh masyah eq lhuiq kat das.
4 Nyang nvng lyis nyah dungs yah nghop las,
nyah dungs khau mha xauh khau nyeis das:
Nyah wontang cho ka nvng lyis gos las khomp toh das.
5 Nyenh lyis dah jes cha lyis eq ma gyuk noh,
nyeih lyis zan los yvlyis eq ma gyuk noh.
6 Mauchuotdwang lyis twangh dah yomh yahge
nyeih lyis shei nhang dah ma gis cho lhyi ma gyuk noh.
7 Nah vyvm mas dius dvkhyoengh gyoh shei laus eq,
nah yvmlhaink mas dvmons gyoh laus eq,
hauh zis nvng lyis ma yoh zangh.
8 Nvng nah nyoq yah yoeuh lyis,
lhung bang lyis yobos khasoeh dyei zis nyvng das.
9 Nvng nah Yhensain lhyi nvng lyis khomp dyei soeu,
Nyhang Thank Soeu lhyi, nah gos kuot.
10 Housoeh las ma gis zis nah jyank mas ma jweh,
nvng nyeis yvmas chah thyoq zo cho ma yoh ni los.
11 Nvng loh yvmas nvng lyis gomh das xiklyisRef 91.11: Mat 4.6; Luk 4.10
Mangso ka nyah loeuswons bang lyis tying toh das.
12 Nah khyei lukzains mas ma thungh bas jungh,Ref 91.12: Mat 4.6; Luk 4.11
nyamoq loq yah nvng lyis po yoeus das.
13 Khangkhyi yahge lhangnyis lyis nvng yoh nang nheh das,Ref 91.13: Luk 10.19
gyukphoh khangkhyi yahge duk bos lhangnyis lyis yoh nang nheh das.
14 Mangso ka, Ngos lyis jyet bang lyis khyuot yoeus das.
Ngos lyis Yhensain nghuot ge seq bang lyis gos dyei das.
15 Nyamoq ngos lyis lui lyis ngos toeuh das,
nyamoq chiqjyen lhyi ngos nyamoq yah dvgeh nyeis das.
Ngos nyamoq lyis khyuot kat las nyoqnho ngelang dyei das.
16 Ngos nyamoq lyis kang xing nhang zis yah phauh shangh das.
Ngos nyamoq lyis khyuot yoeus das, ge.