CHUNGH 90
NYEI VBUK
Mangso dah dius
 
Yhensain eh, nvng gas vcaiq caiq ngamoq dah nyeis joqyos nghuot.
Nvng boms ma kuot thuq shih,
mungkvn lyis ma kuot thuq kat shih lyis yah
nvng gas vcaiq vto Mangso nghuot,
tsoq las eq vcaiq vto Mangso nghuot nyeis shih das.
 
Nvng Cangsoeu lyis nyang cha nghuot khoq yvmas tauh loh nhang.
Nvng nyamoq lyis tsoh pheh doms thaiq kat.
Nah xikkhonh mas dvkhyoengh zvn gas dvnyeih teh dvnghuot.Ref 90.4: 2Pt 3.8
Hauh zis gas lai loh dah nyinaq teh nghuot.
nyenh lyis dah shishenh dvdvm teh nghuot.
Nvng ngamoq lyis nyhoeuh kat,
ngamoq gas yhetmoq moq nyhank dvnyeis;
ngamoq gas nvpsangh lyis yuk joq dah mhanh nyaus teh nghuot.
Nvp lyis hauh zis cingh cingh buh joq,
nyenhthang lhyi ka shei lha nyhauh loh.
 
Nvng nhaiqyo zis yah ngamoq monh loh.
Nvng nhaiqgis yo zis yah gyuk nvn nyeis.
Nvng ngamoq dah yaunos lyis nah xikkhonh mas toh;
gauh kuot dah yaunos lyis nvng nyvng yvmas toh.
 
Nvng nhaiqyo gvng mas ngamoq dah kang lyung loh:
hauh zis gas soqmuh nyhank teh dye tyamp.
10 Ngamoq dah nyenhkyi nyhetci zvn nghuot; yombos lyis gas xetci zvn yoh nyeis.
Nghuot laus eq yau cho yahge kuk cho kyingh dvshe los.
Houka lvnyap lai loh las ngamoq gas dyuk loh.
 
11 Nah dah gyukphoh nhaiqyo dah yomsoq lyis hank yoh seq lah?
Nvng nhaiqyo cho ka kha iq gyuk chank bos zis hank yoh seq lah?
12 Ngamoq dah kang kha iq lyung yvlyis jyauh aq,
housoeh lyis ngamoq joeui bos los mvbeh.
 
13 Nvng khanyhank jweh shoq nhaiqyo nyeis shih das lah?
Yhensain eh, nah jyeidwis lyis nhaiq jenh nyen aq.
14 Ngamoq lyis dvnvp dvnvp nah mathank magons jyetdap zis yah tyink dyei aq.
Housoeh lyis ngamoq dvcaiq gonh gauslaus las chunghthwe kat das.
15 Nvng ngamoq lyis shanghsenh nhang zvn gyo lyis nhaiqkuk nyhoq
gvshih ngamoq lyis pyo nhang aq.
16 Ngamoq nah jyeidwis jens nah yomzains muhzoh lyis nyvng nhang aq;
ngamoq dah diusjangh caiq lyis nah phunk bos yomzains lyis nyvng nhang aq.
17  Yhensain, ngamoq dah Mangso eh,
nah shvmanh jyehjuh gas ngamoq mas joq bas jungh,
ngamoq kuot loh cho dvnganh mas ung nhang aq.