CHUNGH 78
Mangso yahge Nyah Dius
 
Ngah dius jens eh, ngos jyauh yvlyis gyo geh,
ngah nhuot mas dang lyis kamp gyo geh.
Dangtoeuq yah ngah nhuot haq lasRef 78.2: Mat 13.35
gohlhain dah wishomp lyis taiq kyoh das.
Houka ngamoq dah phauh thyeih moq taiq kyoh zis
ngamoq xauhgyo las seq zis nghuot.
Hauh yvlyis ngamoq dah lo jens lyis ma zauh toh:
Yhensain lhyi chungh gis cho,
nyah yom yahge nyang kuot goeus dah mauhphoh muhzoh lyis
jweh los das caiq bang lyis taiq kyoh das.
 
Khasoeh ge lyis yah phauh thyeih moq gas nyamoq lo jens lyis seq nhang bas jungh ge,
nyang Yakop mas tyingtoh dang toh, Israel mas lyi toh dyei.
Housoeh jweh los das caiq mas bang hauh yvlyis yoeus las,
khoeu los das nyamoq lo jens lyis eq yoh doms taiq kyoh chah.
Housoeh nyamoq Mangso lhyi nghamhloms las
Mangso kuot khoq muhzoh lyis ma tohnyhik nyhik,
nyah tyingtoh dang lyis chank chah.
Housoeh lyis nyamoq gas nyamoq dah phauh thyeih moq teh ma nghuot das.
Nyamoq gas ehnyet than lha gomloeus toq bang, dang ma gyo bang nghuot,
Mangso lhyi loms cho mha khanhamp eq ma toenk, lom ma luk bang nghuot.
 
Ephraim lo jens lyei wuq bang
moengzan nyeih lyis tsain tauh los.
10 Mangso dah thanghchvp lyis ma chank,
nyah lyi chank das zis tsain ngoek.
11 Nyamoq gas nyah muhzoh yahge
nyang nyamoq lyis chixoeuq dah mauh loqmuh lyis tohnyhik.
12 Nyang Egutu mas, Zoan pa mha nyamoq phauh thyeih moqRef 78.12: Dyu 7.8—12.32
nyoqlvtjvng mas mauhphoh muh kuot khoq.
13 Nyang hauh thomh lyis kangh las nyamoq lyis lai los nhang.Ref 78.13: Dyu 14.21-22
Jeis lyis gas tyoyvm teh toeutsung toh.
14 Nyang nyamoq lyis nyeih lyis jyommauh yah,Ref 78.14: Dyu 13.21-22
nyens gonh nyiduk yah shwih los.
15 Nyang mhanhdyvp mas lukmuh lom lyis khwih lasRef 78.15-16: Dyu 17.1-7; Gyu 20.2-13
nyamoq lyis thomh mas jeis teh magons magoh gvmshuk.
16 Nyang luk-uk masyah jeis thuq nhang lha
jeismuh lvng teh jeis tsain yaus nhang.
 
17 Nghuot laus eq nyamoq yaunos tsain kuot shih las
mhanhdyvp mas Nyhang Thank Soeu lhyi gomloeus tsain toq.
18 Nyamoq omes dah zonoms sang zis yahRef 78.18-31: Dyu 16.2-15; Gyu 11.4-23, 31-35
nyamoq nhaiqlom mas Mangso lhyi shiyoeuh.
19 Nyamoq gas Mangso lhyi tyi lha,
Mhanhdyvp mas jus yoh khyoq das lah?
20 Yoeuh aq, nyang hau luk lyis lyuk lyis jeis buk thuq las jeislvng teh yaus loh.
Ohlhyoq eq yoh dyei das lhyeh?
Nyah dius jens xiklyis shoh yoh sont dyei das lhyeh, tsain ge.
 
21 Hauh dang Yhensain xauhgyo yvmvyah
nyang nhaiqyo las Yakop mas nyi kat las,
Israel lyis eq nhaiqgis yo.
22 Khasoeh ge lyis nyamoq Mangso lhyi ma lomsjingh,
nyah khyuot yoeus cho lhyi ma loms.
23 Nghuot laus eq, nyang gas nyhang mha maukhung lyis tying toh las,
maukhung khomh lyis tsain phank kat.
24 Nyang, dius jens zo das xiklyis Mana wus khyoq dyei las,Ref 78.24: Yh 6.31
maukhung mha dah gukzos nyamoq lyis dyei.
25 Dius jens gas zauzos zo las
nyamoq lyis zonoms jo shoq dyei.
26 Nyang maukhung mha buisthuq lyeis muot nhang lha,
nyah yomsoq yah mautyi lyeis shwih los.
27 Nyang nyamoq lyis shoh gas tsohmop nyhoq,
nghoq gas thomh mas sihsho nyhoq wus khyoq dyei.
28 Nyang nyamoq lyis nyamoq thoenggus vkhau,
nyamoq zvng yvmlhaink yah khyoq dyei.
29 Nyang nyamoq lyis nyamoq omes nyhoq dyei yvmvyah
nyamoq jo shoq xauh zo.
30 Nghuot laus eq nyamoq omes zis ma nghoengh shih,
nyamoq nhuot mas zonoms bos shih lyis,
31 Mangso dah nhaiqyo zis gas nyamoq thoq mas jweh las yombos bang lyis sat.
Israel mas wotyamh jens lyis eq jap tyamp.
 
32 Heinyhoq tsain xauh lyis eq nyamoq yaunos dvkuot shih;
nyah mauhphoh muhzoh lyis eq ma lomsjingh.
33 Housoeh yvmvyah nyamoq dah buisnyeis lyis vjyuk ma bos shei loh,
zvn lyis eq gyukphoh yvmas thank nhang.
34 Mangso nyamoq lyis sat khanghmuh nyet bang gas nyang lyis xo zis yah
nyah jyank pheh yom zuk zuk doms lhain los.
35 Hauh uhlyis Mangso ka nyamoq dah luk-uk,
Nyhang Thank Mangso ka nyamoq dah Khyuot kat Soeu nghuot yvlyis tsain soh.
36 Nghuot laus eq nyamoq gas Yhensain lhyi nhuot yah mhuih chungh las
nyamoq dah lhyo yah nyang lyis tsain hwah.
37 Nyamoq nhaiqlom gas nyah xikkhonh mas ma wontang,
nyah thanghchvp lyis eq ma chank.
 
38 Nghuot laus eq nyang gas nhaiqnyen nyeis las, nyamoq yobos khyuot dyei yvmvyah nyamoq lyis ma mhont tyamp.
Nyah nhaiqyo zis nyoshoq lhain khyoq las nyah ehnyet gywes nyhoq nhaiq ma yo.
39 Nyamoq gas, muot loh lyeis gas ma tauh los teh,
suihshoh nghuot yvlyis nyang soh dyei.
 
40 Mhanhdyvp mas nyamoq gas nyang lyis khanyhoq lhain nhaiqyo nhang.
Khanyhoq lhaih nyeiskyuk yos mas nhaiq lhoq kuk lah!
41 Nyamoq Mangso lhyi vlhain lhain shiwu las
Israel dah Gyingshang Soeu lhyi kyoq toh lhyeh?
42 Nyang nyah yomsoq yah nyamoq lyis jeswus masyah
khyuot kat buisnyeis lyis nyamoq ma soh.
43 Nyang gas Egutu mas nyah vlho,
Zoan pa mha nyah mauh loqmuh lyis kuot khoq.
44 Nyamoq dah jeislvng mas dah jeis ma xauh shuk shoqRef 78.44: Dyu 7.17-21
nyamoq dah jeislvng jens lyis suih bweh nhang.
45 Nyamoq lyis nyhau dah yvngkhungh,Ref 78.45: Dyu 8.1-6, 20-24
nyamoq dah mau lyis mhont das puh lyis nhang kat.
46 Nyamoq dah guknyau shihnyau gas tungsangh lyis,Ref 78.46: Dyu 10.12-15
nyamoq zwi las yoh dah vyhang ka bau lyis dyei tyamp.
47 Nyamoq dah zvbiq nwis lyis gyu tomp yah,Ref 78.47-48: Dyu 9.22-25
maiphang saiq lyis nghan yah mhont dyei.
48 Nyamoq dah noeu lyis gyu tomp yah bat sat;
gaunyhauq phung lhyi mau yah guons sat.
49 Nyang nyamoq lyis gyukphoh nhaiqyo,
nhaiqlom dyis zis huot khyoq zis yah, chiqjyen nhang,
houka shei ge dah loeuswons bang teh los.
50 Nyang nhaiqyo zis lyis ma jhen lo,
nyamoq lyis ma lhuiq kat, yomh yah sat.
51 Egutu dius dah yukgis loxeih dvnganh yahgeRef 78.51: Dyu 12.29
Egutu bang dah zvng mas nyamoq dah yommonh lyis nyang tsain sat.
 
52 Nyang nyah dius jens lyis gas yvng lyis teh shwih las,Ref 78.52: Dyu 13.17-22
mhanhdyvp mas yvng phung lhyi teh choshe los.
53 Nyang nyamoq lyis wontang shwih los las nyamoq ma gyuk.Ref 78.53: Dyu 14.26-28
Jeswus lyis gas hau thomh yah nghop tyamp.
54 Nyang nyamoq lyis nyah gyingshang maukyo yahgeRef 78.54: Dyu 15.17; Yosh 3.14-17
nyah loqyos loq yah hauh boms mau mas shwih los.
55 Nyang gas dius nyau jens lyis nyamoq xikkhonh masyah khat tyamp las,Ref 78.55: Yosh 11.16-23
nyamoq dah vso lhyi gvm dyei.
Nyamoq dah zvng mas Israel jens lyis nyeis nhang.
 
56 Nghuot laus eq nyamoq Nyhang Thank Mangso lhyiRef 78.56: Soe 2.11-15
shiyoeuh zis yah gomloeus toq.
Nyah kanghjyoeng dang lyis ma tsain chank.
57 Nyamoq gas nyamoq phauh thyeih moq teh phanh las lom ma luk kuot;
nyamoq gas mhuih dah nyo teh tauh loh.
58 Nyhang dah joqyos jens yah nyang lyis nhaiq lhoq yo,
thwang dah gungslho yah eq noh nhang.
59 Mangso haih zis nyvng lyis,
nyang nhaiqlom tsoeu lha nyah dius jens lyis ngoek tyamp.
60 Housoeh las nyang dius jens mas nyeis khoq dahRef 78.60: Josh 18.1; Jer 7.12-14, 26.6
Shilo zvng lyis she tyamp.
61 Nyang nyamoq dah jeswus lyis nyah yomsoq yahgeRef 78.61: 1Sa 4.4-22
phunk vlho nghuot dah Thanghchvp Kwi jons loh nhang.
62 Nyah dius jens lyis nhaiqgis yo las
nyamoq lyis nyamoq dah jeswus lyis yah sat nhang.
63 Nyamoq dah loloeu jens jes mas gyoh tyamp las
nyamoq dah lonyi jens lyis yoeus das bang hank ma bos lo.
64 Nyamoq dah phudyei bang sham mha tsain gyoh laus eq
nyamoq dah chauhmuh jens kuk ngaus das toeuh ma bos.
 
65 Thang thank lyis Yhensain ka yhet pyo soeu teh soh los;
nyang gas zvbiq byan dah yombos soeu teh nghuot.
66 Nyang gas nyah jeswus jens lyis khat tangh las
vcaiq vto somh zis yah xoqphuh nhang.
67 Nyang Yosep dah diusjangh caiq lyis peq tyamp laus eq,
Ephraim vkoq lyis eq ma khyen.
68 Yuda vkoq yahge nyang jyetdap dah
Zion boms lyis dvkhyen yoeus.
69 Nyang houmha nyah yhenmuh lyis nyah maukhung yhen teh tsuk toh;
nyang hauh yvlyis nyeisjvng teh goeng joq nhang, vjangh gau joq.
 
70 Nyang nyah jons Dawi lyis khyen toh;Ref 78.70-71: 1Sa 16.11-12; 2Sa 7.8; 1Hw 17.7
nyang lyis katjang masyah shwih yoeus.
71 Nyang yvng yoeuh nyeis yvmvyah Israel jens dah hwankti kuot nhang,
Mangso dah dius jens lyis yoeuh gomh nhang.
72 Dawi gas koptoq ehnyet bos zis yah dvyhangteh
nyamoq lyis lyes zis yah shwih gomh los.