CHUNGH 76
Vjangh Ung dah Mangso
 
Yuda mau mas Mangso lhyi tsain seq:
Israel vnyau mas, nyah nyings kuhxing joq.
Yerusalem mas eq nyah yhen joq;
Nyang Zion boms mas nyeis.
Nyang houmha jeswus jens dah nyo, gos yahge moengsa,
nyamoq dah kyonhkhyi dvnganh yvlyis khyauh tyamp. (Selah)
 
Mangso eh, Nvng kha iq phunk bos lah!
Nvng nah jeswus lyis ung dah boms masyah tauh los zis gas kha iq shoenkkhyi bos lah!
Womh dah jeslo jens yoh dah vyhang dvnganh lhuot loh las gvshih nyamoq shei joq.
Nyamoq dah yom yahge lyes cho dvnganh gas yhung pvjus lo.
Yakop dah Mangso eh, nvng nyamoq lyis kyuk lyis nyang jens yahge,
nyang ji bang gyoh shei tyamp.
 
Nghuot laus eq Yhensain eh, nvng lyis dvnganhmoq gyuk:
nvng nhaiqyo lyis nah xikkhonh mas hank ma yoh yap.
Nah soetuon cho ka maukhung mhayah thuq los las
mungkvn gas gyuk las samlo nyeis.
Mangso soetuon das ge toq los lyis nyeisjvng thoq mas dah
zaiq zis xauh bang dvnganh lyis khyuot das. (Selah)
 
10 Dius dah nhaiqyo zis gas nvng lyis zes chungh das cho bweh los.
Jes masyah doeng los bang gas nah pwe lyis kuot das.
 
11  Yhensain, nah Mangso lhyi nvng nyhen toh zis dyei aq,
ni nyeis dah dius nyau dvnganhmoq, nyah jyank mas jyungshuk chi los geh.
Mangso ka dius jens lyis gyuk nhang.
12 Nyang gas khwank dah hwankti lo jens lyis nyhen mha gyoh nhang,
hwankti zainsmuh jens lyis gyuk nhang.