CHUNGH 73
SOMH VBUK
Mangso dah Lyi jus Cho
1 Mangso ka nhaiqlom lhoqshang dah Israel jens
xiklyis jyoengh gis.
2 Nghuot laus eq ngos nghamhnywe cho vluk chithyuk,
ngah lomsjingh cho dyuk loh bah ge.
3 Khasoeh ge lyis ngos lhung bang dah nyeisgis yaplhoq yvlyis nyvng lyis khwank bang lyis noh nyeis.
4 Nyamoq nos cho ma xauh kham zo;
nyamoq yanghzan las yombos.
5 Nyamoq gas gohyhamh bang teh chiqjyen ma xauh;
gohyhamh bang teh yaukyenh zis ma xauh.
6 Housoeh nyamoq dah khwank zis gas ywi teh wuot toh;
lhuotzo cho eq dyimis teh wuot toh.
7 Nyamoq dah nhaiqlom ma yungh,
nyamoq ehnyet mas lhung cho nghamh muh nyo.
8 Nyamoq gohyuk lyis yis las ma gis zis taiq;
nyamoq khwank zis yah gohyuk lyis zaiq das cho tsain nghamh toeuq.
9 Nyamoq gas maukhung mha Mangso lhyi ma gis zis taiq,
nyeisjvng thoq mas, dius lyis lhoq lhoq teh vmingh dyei.
10 Housoeh las Mangso dah dius jens yangh nyamoq jyank pheh lhain loh zis yah
nyamoq taiq khyvlyis nhaiq wvng wvng lomsjingh.
11 Nyamoq gas, Mangso ma seq das.
Nyhang Thank Soeu ka ma yoh xo nyvng ge.
12 Houka lhung bang cha yah doeusgoh cho nghuot.
Nyamoq nyoshoq yoh, vjangh yah zes zes yoh los.
13 Houlhyi ka ngos ngah nhaiqlom lyis lhoqshang nhang lha
yaunos ma kuot zis gas vkom dvnghuot lhyeh?
14 Mangso eh, nvng ngos lyis dvnyeih yah shanghsenh nhang;
nvp khanghmuh nvng ngos lyis yobos dyei.
15 Ngos housoeh sang lhyi ka,
ngos gas nah dius dvyuk teh ma kuot nyeis.
16 Ngos haih soe lhyi vzoh yah nghamh yoeuh nyeis,
nghuot laus eq hauh zis ngah xiklyis sunk yau.
17 Hauh thang lhyi ngos nah Yhenmuh mas wvng thang lhyi,
lhung bang khasoeh bweh das cho seqgyo los.
18 Nvng nyamoq lyis jyuot dah joqyos mas toh las,
dyoqbis cho mha gyoh loh nhang.
19 Nyamoq dvsoq kyingh lyis dyoqbis tyamp goeus!
Nyamoq gyukphoh yvmas gyoh dyuk tyamp goeus.
20 Nyamoq gas nvpsangh lyis dyuk tyamp dah yhetmoq teh nghuot.
Yhensain eh, houka nvng soh los lyis nyamoq gas dyuk tyamp goeus.
21 Ngos nghamh cho nhaiq khoh lyis
hauh zis ngah nhaiqlom mas zangh.
22 Ngos gas gaunyhauq teh koh joq;
housoeh ngos nah cho ma seqgyo.
23 Nghuot laus eq ngos vjangh nvng yah ni nyeis las,
nvng nah loq yah ngos lyis zwi toh.
24 Nah joeui da zis yah nvng ngos lyis choshe.
Thang thank lyis nyoqnho ngelang yah nvng ngos lyis lhom yoeus das.
25 Ngos maukhung mha nvng mas lai las gohtoeu cha yoh shih das lah.
Ngos nvng lyis yoh toh goeus las, ngos nyeisjvng thoq mas cha chah shih das lah.
26 Ngah gungsshoh yahge nhaiqlom yomnhuk lyis eq
Mangso ka ngah yom nghuot;
nyang gas ngos chah zis dvnganh nghuot goeus.
27 Nvng lyis tyamp khoq bang dyoqbis das.
Nvng lyis lom ma luk bang lyis nvng dyoqbis nhang das.
28 Ngah xiklyis gas, Mangso yah xauh ni nyeis zis kha iq mauhphoh nghuot lah!
Yhensain Mangso yah gos dyei das xiklyis xo lha
nah muhzoh cho dvnganh taiq hoeuh das.