CHUNGH 72
Hwankti xiklyis Dung
1 Mangso eh, hwankti ka nah dan cho khyvlyis soe yoh tuon das zis nyang lyis jyauh aq.
Nah lyi jus nyang lyis gvm dyei aq.
2 Housoeh lyis nyang gas nah dius jens lyis lyi jus khyvlyis whop las
zaiq zis xauh bang lyis dan khyvlyis yoh guon das.
3 Dan cho gvng mas nyeisjvng gas
dius lyis gis dah jyo yoh los nhang das.
4 Hwankti ka shohjyen bang lyis lyi bos khyvlyis soe yoh tuon bas jungh;
Nyang chah nyeis bang lyis yoh pangh las nyamoq lyis zaiq bang lyis yoh ung bas jungh.
5 Nah dius jens gas buis bos dvchank nvng lyis yoh paiq bas jungh.
Lhamhmuh joq joq dvchank nyamoq nvng lyis vcaiq caiq paiq nyeis das.
6 Hwankti ka mhanhyos mas mau wus teh,
nyeisjvng lyis jyweq nhang dah mau gyoh teh nghuot bas jungh.
7 Nyah caiq mas dan cho ka bvng bvng nghuot bas jungh;
ung cho ka lhamhmuh tso dvchank doengs joq bas jungh.
8 Nyah munghdan gas thomh masyah thomh jweh shoq,Ref 72.8: Zek 9.10
jeismuh lvng masyah nyeisjvng goms shoq nghuot das.
9 Mhanhdyvp mas nyeis bang nyah xikkhonh mas gop das;
nyah jeswus jens gas tsoh mas lains loh das.
10 Spain hwankti jens yahge goeujo mas bang jyungshuk chi los das.
Arabia, Ethiopia hwankti jens gas jyungshuk dyei das.
11 Hwankti dvnganh nyah xikkhonh mas gop das,
dius nyau dvnganh nyang lyis phuqsoe das.
12 Nyang gas, nyang lyis lui dah nyungs bang lyis kyoeu kat das;
pangh soeu ma bos shohjyen bang lyis eq khyuot das.
13 Nyang shohjyen bang yahge nyungs bang lyis nhaiqnyen,
nyungs bang dah kang lhyi khyuot yoeus.
14 Nyang nyamoq lyis lhuotzo cho yahge zaiq cho mhayah khyuot las,
nyamoq dah kang ka nyah xikkhonh mas phauhdap.
15 Hwankti kang xing bas jungh,
nyang lyis Arabia masyah xing tsain dyei bas jungh:
nyah xiklyis vjangh shvmanh tsain dung dyei bas jungh;
Mangso dah shvmanh gas vjangh nyah thoq mas joq bas jungh.
16 Hauh mau mas jyo vbomsdom joq bas jungh;
jing jens mas wom yah nghop bas jungh.
Houka Lebanon mas dah vshih teh gis joq.
Pa mha mhanh dyingh teh
hauh wus mas dius dyingh bas jungh.
17 Hwankti nyings khanhamp eq ma dyuk bas jungh;
nyah nyings hoeuh cho buis joq teh goeng joq bas jungh.
Mangso ka hwankti lhyi shvmanh zis yah dvyhangteh
dius nyau jens dvnganh eq nyamoq lyis shvmanh das nyhenshang bos sang bas jungh.
18 Israel dah Mangso, Yhensain lhyi chungh geh;
nyang kyingh haih mauh loqmuh kuot.
19 Nyah phunk bos nyings lyis vcaiq caiq chungh geh;
nyah phunk gas mungkvn gonh mas dyingh joq bas jungh.
20 Heika Yese lo Dawi dah shvmanh dung dang dye goeus.