CHUNGH 71
Lokhoq Shvmanh Dung
1 Yhensain eh, nvng ngos lyis gomh dyei das nyhenshang ngos nah jyank mas los;
ngos lyis khanhamp eq vsomh loh nhang.
2 Nvng gas dan yvmvyah ngos lyis pangh aq, khyuot lhuiq kat aq.
Ngos lyis gyo dyei las khyuot yoeus aq.
3 Ngos lyis gos das zis ngah gau khaugus yahge gau dah thoenkgus jesdvp duot dyei aq.
Nvng gas ngah khaugus yahge ngos lyis khomp dyei soeu nghuot.
4 Ngah Mangso eh, lhung bang masyah ngos lyis khyuot kat aq.
Ma gis bang yahge lhoeng bang yomsoq masyah khyuot kat aq.
5 Yomzains Yhensain eh, ngos nvng lyis nghamhloms;
ngos loyvm yoq lyis yah nvng lyis loms.
6 Ngos ngah dvcaiq gonh nvng lyis nges toh:
ngos khoeu los lyis yah nvng ngos lyis gos toh dyei.
Ngos nvng lyis vjangh chungh das.
7 Nvng gas ngah xiklyis yombos dah khomp duot dyei yvmvyah
ngah kang dwis cho ka dius nyoshoq xiklyis yikhyoh bweh goeus.
8 Ngos dvnyeih gonh nvng lyis chungh zis yah
nah phunk lyis hoeuh dyei.
9 Gvshih ngos mang goeus las ngos lyis vphe toh;
gvshih ngos nvn goeus las ngos lyis vtyamp toh.
10 Ngah jeswus jens gas ngos lyis sat mes;
ngah cho taiq, ngos lyis tsain lhaink.
11 Nyamoq gas, Mangso nyang lyis tyamp toh goeus;
nyang lyis tohnyhik toh;
nyang lyis hank ma kyoeu, tsain ge.
12 Mangso eh, ngos yah we we vnyeis;
ngah Mangso eh, ngos lyis lvnyap los pangh aq.
13 Ngos lyis jes sont bang somh las dyoqbis bas jungh;
ngos lyis nos bas jungh ge yomkat bang xoqphuh las vxoq vcaiq mus bas jungh.
14 Ngos nvng lyis vjangh nghamhloms nyeis;
ngos nvng lyis zes zes chungh das.
15 Ngos nah gis cho lhyi taiq das,
nah khyuot yoeus cho ka ngos seqgyo thoq lyis zes laus eq
ngos hauh yvlyis dvnyeih gonh taiq das.
16 Yomzains Yhensain eh, ngos nah yomsoq lyis chungh das;
nah zis kyingh dvnghuot dah gis cho lhyi ngos hoeuh das.
17 Nvng ngos lyis ngis shih lyis yah jyauh goeus las,
ngos nah mauhphoh muh lyis taiq nyeis shih.
18 Mangso eh, gvshih ngos mang las cam thyoeu goeus, ngos lyis vtyamp toh.
Jweh los das dius caiq dvnganh mas ngos nah yomsoq yahge yomzains lyis hoeuh uhlyis nvng ngos yah jenh nyeis dyei aq.
19 Mangso eh, nah dan cho ka maukhung lhyi duons,
nvng gas kuhxing cho kuot goeus, nvng teh zis hank ma bos.
20 Nvng ngah thoq mas yaukyenh cho yahge khamzo cho nhang kat,
nghuot laus eq nvng ngos lyis yom doms huiq nhang;
nvng ngos lyis lop masyah doms shwih los.
21 Nvng ngos lyis vkhang thoq lyis kuhxing nhang das;
nvng ngos lyis nhaiq doms taink dyei.
22 Ngos nvng lyis jyoengh toenk yah chungh das;
Mangso eh, ngos nah wontang cho lhyi chungh das.
Israel dah Gyingshang Soeu lhyi ngah toenk yah chunghthwe kat das.
23 Nvng ngos lyis khyuot yoeus goeus yvmvyah ngos nvng lyis toenk bat las kaiq chungh das.
Ngos kang dwis nyeis shih lyis chungh das.
24 Ngos lyis nos nhang das ge bang somh las xoqphuh goeus yvmvyah
ngos nah dan cho lhyi dvnyeih gonh taiq das.