CHUNGH 69
Pangh das xiklyis Kaiq
 
Mangso eh, ngos lyis khyuot yoeus aq,
jeis gas ngah lainzain mas jweh los nyeis.
Ngos nauh dah thomhbop mas nyop loh nyeis. Hauh yvmas khyei nang gus ma bos.
Ngos jeis nauh yvmas nghuot joq.
Jeisbaus yah ngos lyis she loh nyeis.
Ngos lyis pangh das xiklyis lui zis nyung goeus:
ngah khyunghkang eq nos goeus.
Ngos nah pangh cho lhyi xo zis ngah nyoq nyung goeus.
 
Ngos lyis shoh yos gungs mas hoeng bang gasRef 69.4: Chd 35.19; Yoh 15.25 ngah uhloms mas cam thoq lyis nyo.
Ngah jeswus jens gas ngos lyis tyi lha hwah.
Nyamoq gas yombos zis yah ngos lyis tsain sat mes.
Ngos ma khauh dah vyhang tauh dyei nhang.
Mangso eh, nvng lyis ngah yaunos ma yoh shung,
ngos kha iq koh zis nvng seq;
Yomzains Yhensain eh, ngah gvng mas nvng lyis loms bang lyis vxoq nhang;
Israel dah Mangso eh, ngah gvng mas nvng lyis paiq bang lyis xoq vphuh nhang.
Nah gvng mas ngos ma phauh gis kuot zis xauh las ngos xoq nyeis.
Ngos ngah vmang vnoeuh moq mas lvbaus teh,
ngah yhenbang mas mau we dius teh nghuot.
 
Nah Yhenmuh mas nhaiq wvng ehnyet gas ngos lyis nyi teh ngeh nhang,Ref 69.9: Yh 2.17; Rom 15.3
nvng lyis ma phauh gis kuot zis gas ngah jyank mas gyoh los.
10 Ngos gas womkyi zis yah ehnyet nyhen mha khyoq laus eq
dius jens ngos lyis ma phauh gis kuot.
11 Ngos kuk dah vlho dyi wuot laus eq
nyamoq ngos lyis yis.
12 Nyamoq talhoeu mha ngah cho taiq goh;
yhei yet soeu ka ngah cho lvkhyank kat.
 
13  Yhensain eh, ngos shvmanh dung zis gas nvng yoh lhom yoeus shishenh lyis jweh bas jungh.
Nah kuhxing jyetdap cho gvng mas eq, khyuot yoeus das ge nah dangthoengh gvng mas eq ngos lyis jenh gyo dyei aq.
14 Ngos thomhbop mas nyop loh yvmvyah khyuot kat aq;
ngah jeswus jens masyah jesluiq nhang aq.
Jeis noq masyah eq luiq nhang aq.
15 Jeisbaus yah ngos lyis vnghop nhang,
noq dah nvmukdra mas eq ngos lyis vnyop nhang,
lop mas eq vgyoh nhang.
 
16  Yhensain eh, nah mathank magons jyetdap dah gis cho mha ngos lyis gyo dyei aq.
Nah kuhxing nhaiqnyen zis yah gyo dyei aq.
17 Nah jyeidwis lyis vjenh tamh;
ngos chiqjyen zainsmuh xauh nyeis las gvshih jenh toeuh dyei aq.
18 Ngos lyis los jenh khyuot yoeus aq;
ngah jeswus jens masyah lhuiq kat dyei aq.
 
19 Ngos lyis ma phauh gis khasoeh kuot las xoqphuh nyeis zis nvng seq;
nvng ngah jeswus dvnganh lyis nyvng.
20 Housoeh ma phauh gis kuot zis gas ngos lyis ehnyet dyet nhang lha ngos nhaiqlom thank.
Ngos lyis nhaiqnyen das cho nghamhloms laus eq nhaiqnyen das zis hank ma bos.
Nhaiqtaink das soeu hank ma xo nyvng.
21 Ngos zos yuot lyis nyamoq ngos lyis nyonoq teh dah wom dyei;Ref 69.21: Mat 27.48; Mak 15.36; Luk 23.36; Yoh 19.28-29
ngos jeis shet lyis shihjyen jeis gvmshuk.
 
22 Nyamoq dah zo pwe ka nyamoq dyoqbis das cho bweh nhang aq;Ref 69.22-23: Rom 11.9-10
nyamoq dah gyingshang pwe ka nyamoq somh das cho bweh nhang aq.
23 Nyamoq lyis nyoqjet nhang aq;
nyamoq dah thyikdom vjangh nhuk gyoh nhang aq.
24 Nvng nyamoq lyis nhaiqyo aq.
Nah nhaiqlom dyis cho nyamoq lyis duons nhang aq.
25 Nyamoq dah thoenggus vkom joq bas jungh;Ref 69.25: Lgy 1.20
nyamoq zvng mas kang dwis soeu hank eq ma nyet lo bas jungh.
26 Nvng yobos dyei bang lyis nyamoq shoeuhshih,
nyamoq nvng dvmtap zis xauh kham cho taiq.
27 Nyamoq dah yaunos dvnganh comh toh aq;
nyamoq lyis nah khyuot yoeus cho mha vbos nhang.
28 Nyamoq dah nyings lyis kang buk masyah thyuk tyamp bas jungh.Ref 69.28: Dyu 32.32; Nyoq 3.5, 13.8, 17.8
Nyamoq nah dius jens dah nyings mas ma bos bas jungh.
 
29 Ngos gas nos las nhaiqlom thank nyeis:
Mangso eh, ngos lyis toeutoq las khyuot yoeus aq.
 
30 Ngos chunghthwe yah Mangso lhyi chungh das.
Ngos nyang lyis nhaiqshoqlang oen zis yah nyah kuhxing cho lhyi hoeuh das.
31 Haih zis gas Yhensain lhyi noeu jyungshuk,
zvn dyingh dah noeulu phudyei thoq lyis nhaiqdoeus nhang.
32 Zaiq zis xauh bang haih zis nyvng lyis gaus das;
Mangso lhyi paiq bang gas yom yoh das.
33  Yhensain ka chah nyeis bang lyis gyo yoeus dyei;
thung lungh nyeis, nyah dius jens lyis ma tohnyhik.
 
34 Maukhung yahge nyeisjvng, thomh yahge houmha bos,
kang dwis zis dvnganh Mangso lhyi chungh geh.
35 Nyang gas Yerusalem yahge doms kuot toh dah Yuda wus jens lyis khyuot yoeus das.
Nyah dius jens houmha nyeis las hauh mau lyis sain das.
36 Nyah jyeidwis jens dah diusjangh caiq vso kham yoeus das.
Nyang lyis jyet bang houmha nyeis das.