CHUNGH 68
Dius Nyau jens dah Ung Cho Chunghthwe
 
Mangso toq las nyah jeswus jens lyis sanh tyamp.
Nyang lyis hoeng bang somh las phang loh.
Nyamoq lyis nyikhauh muot tangh tyamp teh khat tangh tyamp aq.
Mangso dah xikkhonh mas lhung bang,
nyi mas dyomanh yaus teh dyoqbis nhang aq.
Nghuot laus eq dan bang gas Mangso xikkhonh mas gauslaus bas jungh;
Nyamoq pyo zis yah gauslaus cho kaiq.
 
Mangso lhyi chunghthwe kat geh, nyah nyings lyis chunghthwe kat geh.
Jyommauh ji los soeu xiklyis cho sont geh, nyah nyings Yhensain nghuot.
Nyah xikkhonh mas svsoh gauslaus nyeis geh.
 
Nyah gyingshang yhenmuh mas nyeis dah Mangso ka,
chauhmuh chauhlo jens lyis gomh dyei, gos dyei.
Nyang gas dvyuk kyingh nghuot bang lyis yhenkhung yoskhyangh kuot dyei las,
thung lungh bang lyis pyo pyo luiq los nhang.
Gomloeus toq bang lyis gas jyamhjyuklhyuk yvmas toh.
 
Mangso eh, nvng nah dius jens lyis shwih las
hau mhanhdyvp mas suh lai los uhlyis, (Selah)
Israel dah Mangso, Sina boms dah Mangso gyoh los yvmvyahRef 68.8: Dyu 19.18
nyeisjvng dwis las maukhung eq mau huot khyoq.
Mangso eh, nvng mau gvgis wus nhang lha,
nyungdaus dah nah vso mau lyis doms huiq nhang.
10 Mangso eh, nah dius jens houmha yhen kuot las nyeis,
nvng yoh dah vbomsdom masyah shohjyen bang lyis dyei.
 
11  Yhensain vmingh dyei las,
hauh loeus lyis dius nyoshoq moq tsain taiq hoeuh.
12 Hwankti jens yahge nyamoq dah jesphung ka phang loh. Yhen mha gyoh nyeis dah vmesbih jens gas nyamoq yoh los dah lvnyhvp lyis tsain gvm.
13 Nyamoq yvng khom mas nyeis laus eq, xing teh xwi dah mauh yuk las
ngwis shauq teh thyoeu dah khotjyauh dungs teh yungh dah vyhang yoh.
14 Hauh uhlyis Maukhung Jesphung Mangso ka hauh hwankti jens lyis
Zalmon boms mas gyu teh sanh tyo tyamp.
 
15 Bashan boms gas kha iq kuh,
hauh Bashan boms mas boms tsenh nyoshoq bos.
16 Hau Mangso nyeis das ge khyen yoeus dah boms lyis
boms tsenh nyoshoq bos dah boms jens chamus yoeuh noh nyeis?
Yhensain ka hauh yvmas vcaiq vto nyeis das.
 
17  Yhensain ka Sina boms masyah nyah Gyingshang joqyos pheh los.
Nyah jeslhyingh vboms vbeq yah los.
18 Nyang nyhang thank joqyos mas doq loh,Ref 68.18: Eph 4.8 thung dius nyoshoq shwih loh:
Nyang gomloeus jens jyank masyah jyungshuk xauh yoeus.
Housoeh Yhensain Mangso houmha nyeis das.
 
19 Dvnyeih dvnyeih yah yvwons wons tyamp dyei dah
Yhensain lhyi chungh geh!
Nyang gas yang lyis khyuot yoeus Mangso nghuot. (Selah)
20 Ngamoq dah Mangso ka khyuot yoeus Mangso nghuot.
Nyang gas yang lyis shei masyah khyuot kat dah Yhensain nghuot.
 
21 Mangso ka nyamoq dah yaunos tsoq kuot loh nyeis bang
jeswus jens dah uhloms lyis jyoengh khyauh das.
22  Yhensain taiq zis gas, Ngos Bashan mhayah nah jeswus lyis shwih tauh los das,
noq dah nvmukdra masyah shwih tauh los das.
23 Housoeh las namoq gas nyamoq dah suih mas naiq las,
namoq dah lvkhuih jens eq nyamoq o nyhoq lyoq das, ge.
 
24 Mangso eh, nah ung cho jens los yvlyis dvnganhmoq nyvng,
ngah hwankti Mangso dah jens los zis gas gyingshang joqyos mas wvng loh.
25 Chunghthwe kat bang xik pheh loh, toenk khvlhank bat bang gas thang mha chank loh,
janghau bat dah lonyi jens vgungs mas nghuot.
26 Nyah moqphung mha Mangso lhyi chungh geh;
Yakop dah diusjangh caiq dvnganh eh, Mangso lhyi chungh geh.
27 Ngis thank dah Benyamin vkoq shih los,
Hauh thang mha Yuda uhshe bang yahge nyamoq dah phung,
hauh thang mha Zebulun yahge Napthali dah uhshe bang chank los.
 
28 Mangso eh, nah yomsoq chixoeuq aq.
Hauh zis ngamoq xiklyis yhung ku.
29 Hauh zis hwankti jens nvng lyis jyungshuk chi los dyei,
Yerusalem Yhenmuh masyah nghuot.
30 Egutu jvmbu gyomh mas dah yewus lyis kyuk aq;
dius nyau jens dah noeulo jens eq bos dah noeulu phung jens lyis kyuk aq.
Hauh bang gas ngwis chi lha los paiq shoq kyuk aq.
Jes lhoq thuq mes bang lyis sanh tyamp aq.
31 Egutu masyah lvgyo jens los das;
Ethiopia jens nyamoq loq toeu lha Mangso lhyi shvmanh dung das.
 
32 Nyeisjvng munghdan jens eh, Mangso lhyi chunghthwe kat geh;
Yhensain lhyi chunghthwe kat las chungh geh. (Selah)
33 Gohlhain dah maukhung ji soeu lhyi chungh geh.
Nyang thwe zainsmuh yah nyah thwe kat kat yvlyis gyo geh.
34 Mangso dah yomsoq lyis hoeuh geh.
Nyah shoenkkhyi ka Israel thoq mas, nyah yomzains gas maukhung mha joq.
35 Israel dah Mangso nyang nyah gyingshang joqyos mas los lyis kha iq gyukphoh Mangso nghuot lah!
Nyang nyah dius jens lyis yom eq, yomsoq eq dyei.
 
Mangso lhyi chungh geh.