CHUNGH 60
Khyuot Kat das zis Dung
1 Mangso eh, nvng ngamoq lyis peq tyamp toh. Nvng ngamoq thoenkgus jesdvp thyoq tyamp;
nvng nhaiqyo nyeis; nghuot laus eq gvshih nvng ngamoq jyank pheh tauh los aq.
2 Nvng nyeisjvng lyis nonh nhang lha gwi loh nhang.
Hauh zis gwi loh goeus yvmvyah hauh vyos lyis tamp dyei aq.
3 Nvng nah dius jens lyis yhei shuk nhang lha,
ngamoq gas yhei yet bang teh vtyi vkamh loh.
4 Nvng gas nvng lyis gyukwoms bang lyis zaih nhang,
housoeh las nyamoq dyoqbis cho mhayah yoh luiq mvbeh. (Selah)
5 Nvng jyetdap dah dius jens yoh luiq bas jungh,
nah yomzains yah ngamoq lyis khyuot yoeus aq; ngos dung dang gyo dyei aq.
6 Mangso nyah gyingshang joqyos masyah taiq zis gas,
Ung zis yah ngos Shekhem wus lyis khwih das,
ngah dius jens lyis Sukhot langhkhau gvm dyei das.
7 Gilead gas ngah zis, Manase eq ngah zis nghuot, Ephraim ka mautsung pheh nyeis las ngah uhkyop teh nghuot.
Yuda gas guon soeu ngah hwankti lhamloq nghuot.
8 Nghuot laus eq Moab lyis gas ngah cheihlang khyvlyis yhung das.
Edom lyis ngos sain dah vlho khyvlyis ngos houmha ngah thyvkoq doeuh toh das.
Ngos Philisti lyis ung cho kaiq das.
9 Mangso eh, ngos lyis goeng thoenkgus jesdvp bos dah wus mas hank shwih wvng das lah?
Edom wus mas ngos lyis cho hank she loh das lah, ge.
10 Nvng ngamoq lyis jyoengh peq tyamp goeus lah?
Nvng ngamoq dah jesphung yah dvgeh ma jens loh das lah?
11 Jeswus lyis zan yvmas ngamoq lyis pangh aq,
dius pangh cho ka vkom dvnghuot.
12 Mangso ngamoq shot pheh nghuot lyis ngamoq ung das:
nyang ngamoq dah jeswus lyis ung das.