CHUNGH 58
Lhung Bang lyis Joeng aq
1 Zau jens eh, namoq lyi jus khyvlyis thyet goh lhyeh?
Namoq dius dvnganh lyis lyi jus khyvlyis soetuon goh lhyeh?
2 Ma nghuot, namoq gas namoq yoh kuot dah ma gis cho lhyi dvnghamh nyeis.
Hauh mau mas lhuotzo dah dius sat cho lhyi kuot shuot.
3 Ma gis zis kuot bang gas dvcaiq gonh chah loh.
Nyamoq khoeu los lyis yah hwah dang taiq.
4 Nyamoq mas lhangnyis teh duk dyingh shoq bos.
Vsainnyang dah no lyis cauq tyamp las no ma gyo dah ywimuhtsanh teh nghuot.
5 Hauh lhangnyis gas lakleq svra dah thwe ma xauhgyo,
lyes soeu dah mandan dang yangh ma gyo.
6 Mangso eh, gyukphoh khangkhyi dah zwis lyis tsain khyauh tyamp dyei aq.
7 Yaus loh dah jeis teh dyuk tyamp bas jungh,
cho mha dah nyoq teh dyis tyamp bas jungh.
8 Nyamoq gas ywi las dyuk tyamp dah nvbap teh,
buis khanhamp eq ma nyvng ku dah loshuot teh mus bas jungh.
9 Nyamoq ma seq shih lyis mhanh teh thyet tyamp zis xauh bas jungh;
nyamoq kang dwis nyeis shih lyis Mangso ka nhaiq gis yo zis yah muot tyamp das.
10 Dan soeu ka housoeh teh dah yaunos yoh bang lyis yau dyei zis nyvng lyis gaus das;
nyamoq lhung bang dah suih mas nang lai loh das.
11 Housoeh dius jens gas, dan bang lyis phauh shang zis jyoengh bos.
Mungkvn lyis soetuon dah Mangso nyeis, ge das.Ref 59 Dangjyung: 1Sa 19.11