CHUNGH 57
Pangh das xiklyis Dung
Mangso eh, ngos Jesluiq das nyhenshang nah jyank mas los yvmvyah ngos lyis nhaiqnyen aq, jenh nhaiqnyen aq.
Hau lyeismuh-jyang lai loh shoq ngos nah dungs buisshen mha khaugus xo nyvng.
 
Ngos chah nyeis cho dvnganh lyis dyei dah
Nyhang Thank Mangso lhyi lui.
Nyang ngos lyis maukhung mhayah toeuh zis yah khyuot yoeus das.
Nyang ngos lyis zaiq soeu lhyi ung tyamp dyei. (Selah)
Mangso ka nyah mathank magons jyet cho yahge wontang cho ngos lyis chixoeuq das.
 
Dius shoh zo dah khangkhyi teh dah jeswus jens ngos lyis tsain lhaink toh.
Nyamoq dah zwis gas lham yahge nyo teh, nyamoq dah lhyo ka zuk dah moengsa teh tsain nghuot.
 
Mangso eh, maukhung mha nah kuhxing cho,
nyeisjvng gonh mas nah phunk chixoeuq aq
 
Ngah jeswus jens ngos lyis twih khyoq toh las, ngos lyis chiqh cho yah zaiq toh.
Ngah cho mha dwang doeu toh las, houmha nyamoq nyang tsain gyoms. (Selah)
 
Mangso eh, ngos vlhomuh nghamhnywe nyeis,
ngos nvng lyis chunghthwe kat las chungh das.
Ngah dyos eh, soh los aq!
Toenk yahge khvlhank eq soh los aq,
ngos buis lyis nhauh toq das.
Yhensain eh, ngos dius nyau jens mas nvng lyis nhaiqshoqlang sang das.
Dius jens mas ngos nvng lyis chungh das.
10 Nah mathank magons jyetdap cho ka maukhung nyhang mha duons;
nah wontang cho eq maukhung mha duons.
11 Mangso eh, maukhung mha nah kuhxing cho chixoeuq aq,
nyeisjvng gonh mas nah phunk chixoeuq aq.