CHUNGH 55
Phanhlyen Xauh Soeu Dung
1 Mangso eh, ngos dung dang gyo dyei aq.
Ngos shvmanh dung lyis vtamh joq.
2 Ngos lyis gyo yoeus las toeuh dyei aq.
Ngos chiqjyen lha ma nyens ma tap mus nyeis.
3 Jeswus jens dah thwe gvng mas eq,
lhung bang zaiq gvng mas eq nghuot.
Nyamoq ngos lyis chiqjyen she kat dyei.
Nyamoq ngos lyis nhaiqyo, hoeng eq hoeng.
4 Ngos gyuk dvn nyeis las
gyukphoh shei cho ngah jyank mas jweh los.
5 Ngos gyuk nvn zis xauh.
Gyuk dvn cho ngos lyis nghop toh.
6 Housoeh las ngos taiq zis gas,
Khotjyauh teh dungs dap phoh ya ngos dang las no nyeis das.
7 Ngos we we loh las
mhanhdyvp mas nyeis das. (Selah)
8 Ngos than dah lyeis yahge lyeismuh-jyang yah luiq shoq
khaugus mas lvnyap phang luiq loh das, oen.
9 Yhensain eh, lhuotzo zis yahge
zan goh zis ngos nyvng goeus yvmvyah,
nyamoq dah nyingh lhoq nhunk las
kang mhont tyamp dyei aq.
10 Nyamoq gas nyamoq wusciank thoq mas nyeih nyenh suh lhain lha,
houmha dius sat cho yahge yau cho bos.
11 Houmha dvkhauyah thyoqpi cho kyingh nghuot.
Hauh talhoeu mha mhuih cho yahge zaiq cho yah dyingh joq.
12 Ngos lyis ngah jeswus jwangh ya ngos yoh jhen.
Ngos yah tyi soeu ngos lyis whahkhoeuh los lyis ngos nyang lyis yoh tamh.
13 Nghuot laus eq hauh zis gas nvng, ngah shot pheh soeu,
ngah buisnoms, ni goh dyenschangh dvnghuot.
14 Ngamoq dang chau yah bvng bvng jisgoh,
Yhenmuh mas dvgeh paiq.
15 Ngah jeswus gas nyamoq shishenh ma jweh shih lyis shei bas jungh;
nyamoq shei mau mas vdwis gyoh loh bas jungh.
Ma gis cho ka nyamoq yhen mha joq. Nyamoq ehnyet mas eq bos.
16 Nghuot laus eq ngos gas Yhensain Mangso pangh das xiklyis lui las
nyang ngos lyis khyuot yoeus das.
17 Nvpsangh, nyeihgungs nyenh lyis ngos shvmanh kaiq dung das las
nyang ngah thwe lhyi gyo dyei das.
18 Ngos lyis tyi bang, ngah jeswus jens nyoshoq yah jeszan yvmvyah
nyang ngos lyis jesluiq shohluiq shwih tauh los das.
19 Nyamoq nhaiqlom ma thaiq zis yahge Mangso lhyi ma gyuk yvmvyah,
gohlhain yah nyeis dah Mangso ka nyamoq lyis gyo las yaukyenh nhang das. (Selah)
20 Gohlhain ngah shot pheh soeu ka nyah thanghchvp thyoq las
nyah dyenschangh jens lyis zan.
21 Nyah dang gas nauh coeu thoq lyis jyot laus eq
nyah nhaiqlom mas gas hoeng cho bos.
Nyah dang gas coeu thoq lyis nhamp laus eq
nyamoq gas shamshe nyeis.
22 Nah yau cho Yhensain lhyi toh dyei aq,
nyang nvng lyis gos dyei das.
Nyang dan bang lyis khanhamp eq ma somh loh nhang.
23 Mangso eh, nvng gas dius sat bang yahge hwah bang lyis
nyamoq dah kang dvgohyih ma nghuot shih lyis lop mas khyoq aq.
Nghuot laus eq ngos gas nvng lyis dvloms toh das.Ref 56 Dangjyung: 1Sa 21.13-15