CHUNGH 48
Zion ka Mangso Wus
 
Yah Mangso dah wus yahge nyah gyingshang yhen mha
Yhensain ka kuhxing nyeis las svsoh chungh mon.
Nyhang yungh doq loh dah Zion boms gas,Ref 48.2: Mat 5.35
mungkvn gonh dah gauslaus joqyos, hwankti zainsmuh dah wus nghuot.
Mangso ka wus dah thoenkgus jesdvp vkhau mha nyang yah dvgeh nyeis zis gas
jesluiq cho nghuot yvlyis chixoeuq.
 
Hwankti jens dvgeh huom lha
nyamoq Zion boms lyis los zan.
Nyamoq hauh zis nyvng lyis mauh las
dvn zis yah phang loh.
Nyamoq hauh yvmas gyuk dvn las
lokhoeu nos nos dah vmesbih teh nos xauh nyeis;
than dah lyeis jyang yah toqh kat dah sangpho jens teh bweh nyeis.
 
Ngamoq Mangso cha kuot khoq zis xauhgyo,
gvshih Maukhung Jesphung Yhensain ngamoq Mangso dah wus lyis nyvng goeus.
Nyang hauh wus lyis jes ma bos shoq vcaiq vto gomh das. (Selah)
 
Mangso eh, nah Yhenmuh khau mha
ngamoq nah jyetdap sainhnos zis lyis soh nyeis.
10 Dvkhauyah dah dius jens nvng lyis chungh nyeis;
nah nyings nyeisjvng gonh hoeuh jyangh toh.
Nvng gas lyi jus khyvlyis guon nyeis.
11 Nah soetuon cho gvng mas, Zion boms gauslaus bas jungh.
Yuda wus gauslaus cho joq bas jungh.
 
12 Zion lhyi suh lhaink yoeuh geh,
nyah tyoeuqzvm lyis suon yoeuh geh.
13 Thang caiq bang lyis yoh taiq kyoh das xiklyis
hau ciank lyis comh geh,
nyah hwankti yhen jens lyis nghamh suon yoeuh geh.
14 Haih Mangso ka yah dah vcaiq vto Mangso nghuot:
Nyang yang lyis jweh los das shishenh dvnganh mas choshe das.