CHUNGH 46
Mangso Yang yah Nyeis
1 Mangso ka ngamoq dah khaugus yahge yom nghuot.
Chiqjyen uhlyis pangh das zis cicont nghuot.
2 Housoeh yvmvyah nyeisjvng cheh loh las
boms jens gas thomh gungs mas tsain gyoh laus eq, ngamoq ma gyuk das.
3 Jeisphauq nyings las tsoeu nyeis zis yahge hauh zis toeukhuk los gvng mas
boms tsain nonh nyeis laus eq ma gyuk noh. (Selah)
4 Jeis dvlvng bos, hauh jeislo lvng gas Mangso dah wus ge,
Nyhang Thank Soeu dah zvng, gyingshang joqyos lyis tsain gaus nhang.
5 Mangso ka hauh vgungs mas nyeis. Hauh wus gas ma lop ma loeh.
Mangso ka nyoq nyvng los lyis yah pangh nyeis.
6 Dius nyau jens hoeu nyeis, munghdan tsain nonh nyeis;
nyang nyah thwe kat kat las nyeisjvng yaus tyamp.
7 Yomzains Yhensain yang yah dvgeh nyeis.
Yakop dah Mangso ka yah khaugus nghuot. (Selah)
8 Los geh Yhensain dah muhzoh lyis yoeuh geh,
nyeisjvng lyis jyamhjyuklhyuk kuot tyamp.
9 Nyeisjvng thank shoq mas moeng dyoq yvlyis dvm nhang.
Lyei lyis khyauh las lham lhyi aiq doeus khyoq tyamp.
Lhyingh lyis eq nyi yah ngheq tyamp.
10 Nyens nyens nyeis geh, ngos Mangso nghuot yvlyis seq geh.
Dius nyau mas ngos chunghtoq zis xauh las nyeisjvng mas ngos chunghtoq zis xauh das.
11 Yomzains Yhensain yang yah dvgeh nyeis:
Yakop dah Mangso ka yah khaugus nghuot. (Selah)