CHUNGH 44
Gos Dyei aq ge Dung
 
Mangso eh, gohlhain phauh thyeih moq zaih lyis nvng kuot ku dah muh,
nyamoq taiq kyoh zis lyis ngamoq no yah xauhgyo ku.
Nvng gohnyau jens lyis khasoeh khat tyamp las nah dius nyau lyis hauh mau mas nyeis nhang cho;
gohnyau bang lyis yobos dyei zis yah nah dius lyis bais los nhang cho nghuot.
Nyamoq dah moengsa yah nyamoq hauh mau lyis yoh sain zis ma nghuot,
nyamoq dah yomsoq yah nyamoq yoh ung zis ma nghuot.
Nvng nyamoq lyis jyetdap yvmvyah nah yom, nah yomsoq,
nah nyoqnho dah bvng zis yah nyamoq khyuot yoeus zis dvxauh.
 
Nvng gas ngah hwankti yahge ngah Mangso nghuot,
nvng nah dius jens lyis ung cho dyei.
Ngamoq nah yomsoq yah ngamoq jeswus lyis yoh ung.
Nah nyings gvng mas jeswus jens lyis yoh nhoeuh tyamp.
Ngos ngah lyei lyis ma loms,
ngah moengsa eq ngos lyis ma yoh khyuot yoeus.
Nghuot laus eq nvng ngamoq lyis ngamoq dah jeswus masyah khyuot yoeus las
ngamoq lyis hoeng bang lyis somh nhang.
Ngamoq vjangh nvng lyis chungh nyeis.
Ngamoq nah nyings lyis vcaiq vto chungh das. (Selah)
 
Nghuot laus eq nvng ngamoq lyis tyamp las, ngamoq lyis somh nhang.
Nvng ngamoq dah jesphung yah ma loh.
10 Nvng ngamoq lyis ngamoq dah jeswus jens masyah phang nhang lha,
hoeng bang ngamoq lyis thyoq loh.
11 Nvng ngamoq lyis sat zo das yvng lyis teh kyauh tyamp las,
ngamoq lyis dius nyau jens mas sanh tyo tyamp.
12 Nvng nah vnyau lyis phauh dvmhauh yah ungh,
ma phauh teh dv ung.
 
13 Nvng ngamoq lyis khasoeh kuot zis gohnyau bang nyvng las
ngamoq lyis jwangh, yis.
14 Nvng ngamoq lyis dius nyau jens mas jwangh gus kuot las,
nyamoq ngos lyis hoeng dah vlho lainkamh nocwih kuot.
15 Ngos vjangh nyoqnho ngelang gyoh nyeis.
Xoqphuh zis gas ngos lyis nghop toh.
16 Ngos ngah jeswus jens goessang, laihwangh zis xauhgyo las eq,
ngos lyis hoeng bang gvng mas eq nghuot.
 
17 Ngamoq hounyhoq xauh laus eq ngamoq nvng lyis ma tohnyhik.
Nvng ngamoq yah kuot toh dah thanghchvp lyis eq ma thyoq.
18 Ngamoq dah nhaiqlom ma phanh,
nah tyingtoh dang lyis domsyos ma gyo ma kuot.
19 Nvng ngamoq lyis yewus joqyos mas vshoh vjyen toh,
ngamoq lyis soeng soeng noq yvmas doeuh tyamp toh.
 
20 Ngamoq dah Mangso lhyi paiq cho no las,
lvbaus dah mangso lhyi paiq lyis,
21 nhaiqlom mas shung toh yvlyis seq
dah Mangso ka hauh yvlyis yoh xo thuq das nghuot.
22 Nah gvng mas ngamoq nyeih yau nyeih sat zis xauh.Ref 44.22: Rom 8.36
Ngamoq lyis sat das sont toh yvng lyis teh kuot zis xauh.
 
23  Yhensain eh toq aq, nvng chamus yhet joq?
Soh aq, ngamoq lyis vjangh vphe tyamp toh.
24 Nvng ngamoq lyis chamus tamh?
Ngamoq dah kham zo cho yahge yau cho lhyi vtohnyhik dyei.
 
25 Ngamoq gas nyeisjvng mas gyoh dyis goeus;
ngamoq somh las tsoh mas lains joq.
26 Ngamoq lyis los pangh aq,
nah nhaiqnyen cho gvng mas ngamoq lyis khyuot yoeus aq.