CHUNGH 42
AIQ VBUK
Jons Loh yvmas Dung
Toenk uhjyung xiklyis Kora lo jens dah joeui dang dvyang
1 Mangso eh, cvt gas jeislo lvng lyis nghamh o teh,
ngos nvng lyis nghamh o nyeis.
2 Ngah dyos Mangso lhyi, kang dwis Mangso lhyi jeis soeh shet nyeis.
Ngos Mangso xikkhonh mas khanhamp yoh jweh thuq xoeuq das lah?
3 Nah Mangso khalhye nyeis lah, ge tsoq taiq nyeis yvmvyah
ngos nyeih nyenh ngaus nyeis, ngah nyoqdyeis ngah wom duot nyeis.
4 Khasoeh ge lyis ngos moqjens yah doq loh las,
Pwe kuot huom lhyi gauslaus thwe yah chungh zoh lyis,
Mangso yhen mha shwih e e kuot zis ngos soh lyis ngah dyos mas nhaiqngis.
5 Ngah dyos eh, nvng chamus nhaiqngis lah? Ngos chamus ma nyens mus lah?
Ngos Mangso lhyi nghamhloms das. Ngos nyang lyis chungh shih das.
Nyang gas ngah khyuot yoeus soeu yahge ngah Mangso nghuot.
6 Ngah dyos nhaiqngis nyeis:
Housoeh yvmvyah Yodan lvng yvm, Hermon boms, Mizar jing masyah
ngos nvng lyis soh nyeis.
7 Nah jyvthyangh nyings lyis jeislhain dwang eq tsain nyings huomh toh.
Nah jeisphauq dvnganh yahge hau jeisphauq zainsmuh gas,
ngah thoq mas tsain mau toh laus eq,
8 Yhensain ka nyeih lyis nyah jyetdap sainhnos zis dyei,
nyenh lyis nyah chunghthwe ngos yah dvgeh nghuot.
Ngah kang dah Mangso lhyi shvmanh dung nyeis.
9 Ngos ngah luk-uk Mangso lhyi,
Nvng ngos lyis chamus tohnyhik toh lah?
Jeswus jens zaiq yvmvyah, ngos chamus kuk zoh lyis suh e nyeis lah, oen.
10 Nah Mangso ka khalhye gah, ge nyeih gonh taiq nyeis las
ngah shohyau lyis batchap teh, jeswus jens ngos lyis goes sang.
11 Ngah dyos eh, nvng chamus nhaiqngis lah?
Ngos chamus ma nyens mus lah?
Ngos Mangso lhyi nghamhloms das,
ngos nyang lyis chungh nyeis shih das.
Nyang gas ngah khyuot yoeus soeu yahge ngah Mangso nghuot.