CHUNGH 39
Shanghsenh Soeu Rhen
1 Ngos gas, Ngos cha kuot yvlyis zaih das; ngah lhyo yah ma shuot bas jungh,
ma gis soeu ngah xikkhonh mas nghuot shih lyis ngos ngah nhuot shung das, oen.
2 Ngos samlo nyeis; dang dvkhonh eq ma taiq, gis zis yangh cha ma taiq:
nghuot laus eq housoeh nyeis lyis ngah shanghsenh cho dvzes xungh los.
3 Chiq cho ka ngos lyis ung loh;
ngos she nghamh she zes yau los.
ngos ma nyei ma yoh kuot lo.
4 Yhensain eh, ngos khanyhank jweh shoq kang dwis das lah?
Ngos khanhamp shei das?
Ngah kang khanhamp thank das zis jenh taiq aq.
5 Nvng ngah kang dvsoq dvdwis nhang,
ngah dvcaiq gas nah xikkhonh mas cha eq ma nghuot.
Jyoengh dius gas soq dvnghuot. (Selah)
6 Jyoengh dius gas siyet teh suh nyeis,
nyamoq kuot zis dvnganh vkom dvnghuot.
Nyang xo yung toh laus eq hank xauh yoeus das zis ma seq.
7 Housoeh lyis, Yhensain eh, ngos cha lhyi nghamhloms das lah?
Ngos nvng lyis nghamhloms.
8 Ngah yaunos dvnganh masyah ngos lyis khyuot kat aq:
ngos lyis koh bang yah vjwangh nhang.
9 Nvng haih cho bweh nhang yvmvyah,
ngos dang ma taiq samlo nyeis das.
10 Ngos lyis yobos vdyei lo.
Nvng chwiq yvmvyah ngos shei loh nyeis.
11 Dius dah yaunos gvng mas nvng yaus zis yah yobos dyei,
nyang ngwis cho lhyi yuszo teh mhont tyamp dyei.
Jyoengh dius gas soq dvnghuot. (Selah)
12 Yhensain eh, ngah shvmanh dung dang lyis gyo dyei aq.
Ngos kaiq dung yvlyis gyo yoeus dyei aq. Ngos ngaus lyis los pangh aq.
Ngos gas ngah phauh thyeih moq teh nah boenghwus dvsoq dvnghuot.
13 Ngos ma nyangh lyis shei loh lo das.
Ngos yoh pyo das xiklyis ngos lyis kyingh nyeis nhang aq.