CHUNGH 35
Pangh das xiklyis Dung
 
Yhensain eh, ngos lyis phyen-goh los bang yah nvng phyen-goh aq,
ngos lyis zan los bang yah zan goh aq.
Gos yahge jesgungs chi lha
ngos lyis pangh das zis toq yap aq.
Ngos lyis chank khat los bang lyis
nah lham yahge jes wuzung yings aq.
Nvng ngos lyis khyuot das, oen dangthoengh toh aq.
 
Ngah kang lhyi xo bang xoqthuq las somh loh bas jungh,
ngos lyis gudwvng nhang das ge sont bang, nungsjik loh las uhnungh nungh bas jungh.
Nyamoq lyis lyeis mas dang dah phihsan teh mus nhang aq.
Yhensain dah loeuswons soeu eq nyamoq lyis khat bas jungh.
Nyamoq dah cho soeng soeng noq las jyuot bas jungh,
Yhensain dah loeuswons eq nyamoq lyis khat bas jungh.
 
Soe ma bos zis nyamoq ngos lyis twih khyoq las,
soe ma bos zis ngah kang xiklyis dwang tsain doeu.
Nyamoq masoh mathamh monh tyamp bas jungh;
nyang khyoq twih mas nyang nyih las nyang doeu dwang mas nyang gyoms bas jungh.
 
Ngos gas Yhensain mha gauslaus nyeis.
Nyah khyuot yoeus cho mha gauslaus nyeis das.
10  Yhensain eh, nvng teh hank nghuot lah?
Yomnhuk soeu lhyi nyah thoq lyis yom zes bos soeu jyank masyah,
shohjyen soeu yahge nyungs soeu lhyi shoeuhshih soeu jyank masyah
nvng gos toh dyei, oen ngos ngah ehnyet nhaiqlom dvnganh yah taiq das.
11 Ma ying kanghjyoeng jens toq las
nyamoq ngos ma seq yvlyis nyei.
12 Nyamoq gas gis zis kuot yvlyis ma gis zis yah tauh dyei.
Ngos gas nhaiqkuk yomgyau nyeis.
13 Nghuot laus eq ngos gas nyamoq nos nyeis lyis yanghthung dyi wuot, womkyi lha,
ngos gop zis yah shvmanh dung las nhaiqkuk zis chixoeuq.
14 Ngos ngah dyenschangh yahge vmang vnoeuh nyhenshang teh kuot.
Nyah ungwes xiklyis kuk soeu teh ngos gop las kuk nyeis.
 
15 Nghuot laus eq ngos lains lyis nyamoq gauslaus, tsain huom lha ngos lyis yis.
Lvbaus yah ngos lyis tsain lyuk, nyamoq ngos lyis ma no lo bat chingh.
16 Nyamoq ngos lyis jwangh goeus thang lhyi doms jwangh.
Nyamoq ngos lyis hoeng zis yah yoeuh.
 
17  Yhensain eh, nvng khanyhank jweh shoq yoeuh nyeis das lah?
Nyamoq ngos lyis mhont tyamp cho mhayah, ngah phauhdap kang lhyi khangkhyi jens masyah khyuot yoeus aq.
18 Ngos nvng lyis nah moqphung zainsmuh mas chungh das;
dius nyoshoq dah xikkhonh mas chungh das.
 
19 Ngah jeswus, hwah bang lyis ngos shoeuh cho mha vgaus nhang.Ref 35.19: Chd 69.4; Yoh 15.25
Soe ma bos yvmas ngos lyis hoeng bang lyis ngah nhaiqkuk cho mha vyis nhang.
 
20 Khasoeh ge lyis nyamoq nyenstap dang ma jis,
hauh mau mas samlo nyeis bang lyis mhuih jyomh cho tsain lhaink.
21 Nyamoq ngos lyis kaiq las kauq zis gas,
Nvng cha kuot zis ngamoq dah nyoqjeih yah nyvng goeus, ge.
22  Yhensain eh, haih zis nvng nyvng goeus, samlo vnyeis:
Yhensain eh, ngos yah we we vnyeis.
23 Ngah Yhensain Mangso eh, ngos lyis gos dyei das zis yahge
ngos lyis dang thang thyet das zis nah gungs lyis nhauh las toq aq.
24 Ngah Yhensain Mangso eh, nah dan cho khyvlyis ngos lyis yobos ma bos cho hoeuh dyei aq.
Nyamoq lyis ngah thoq mas vgaus nhang.
25 Ah, ngamoq o khyvlyis nghuot goeus, ge nyamoq nhaiqlom mas ma yoh taiq bas jungh:
Ngamoq nyang lyis yoh nyhau tyamp goeus, ge ma yoh taiq bas jungh.
 
26 Ngos gudwvng yvmvyah gaus bang xoqphuh las uhnungh nungh bas jungh;
nyamoq ngah thoq lyis zes, ge chunghzo bang xoqphuh zis yah nyoqnho shen bas jungh.
 
27 Ngos yobos ma bos cho lhyi nyvng mes bang gas gauslaus zis yah kaiq las doms chungh doms chungh kuot bas jungh.
Nyah jyeidwis dah ung cho lhyi nhaiqdoeus dyei dah Yhensain ka kha iq kuhxing!
28 Housoeh ngos nah dan cho hoeuh dyei das.
Ngos nvng lyis dvnyeih gonh chungh das.