CHUNGH 33
Chungh dah Chunghthwe
1 Dan bang eh, Yhensain lhyi gaus gaus yis yis chungh geh.
Ehnyet zungh bang nyang lyis chungh das zis phi.
2 Toenk bat las Yhensain dah jyehjuh lyis chungh geh,
Twih bos dah toenk khvlhank yah nyang lyis chunghthwe kat geh.
3 Nyang lyis chunghthwe vsaiq kat geh,
toenk lyis lyes lyes bat las gauslaus zis yah kaiq geh!
4 Yhensain dah dang gas wontang.
Nyah muhzoh dvnganh eq jyoeng joq.
5 Nyang gas dan cho yahge soetuon cho lhyi ngwis.
Yhensain dah mathank magons jyet cho ka nyeisjvng mas dyingh joq.
6 Yhensain dah dang yah maukhung lhyi gvnkhanh toh,
Nyah dang yah buislom, lhamhmuh, kyi lhyi joq nhang.
7 Nyang gas thomh jeis lyis dvjoq mas boms toh las,
noq thank thomh jens lyis guk lyis jyi mha kat toh teh dvjoq mas lhunk toh.
8 Nyeisjvng gonh Yhensain lhyi gyukwoms nyeis bas jungh,
mungkvn mas nyeis bang dvnganh nyang lyis phauh nyang nyeis bas jungh.
9 Khasoeh ge lyis, nyang taiq lyis bweh joq.
Nyang taiq kat lyis dvnganh gas thuq los.
10 Dius nyau dah kuot mes cho lhyi Yhensain yah vkom bweh nhang.
Dius dah nghamh toeuq cho lhyi tomp toh.
11 Yhensain nghamh toeuq zis gas vcaiq vto goeng joq.
Nyang nghamh khyvlyis vcaiq vto goeng joq.
12 Mangso ge dah Yhensain lhyi paiq dah vnyau yahge,
vso xiklyis nyang khyen yoeus dah dius jens gas ngelhoq.
13 Yhensain ka maukhung mhayah tyoeuq las
cangsoeu lo jens dvnganh lyis yoeuh nyeis.
14 Nyang nyeis joqyos masyah
nyeisjvng thoq mas nyeis bang dvnganh lyis yoeuh nyeis.
15 Nyang gas nyamoq dah nhaiqlom dvnganh yvlyis kuot dyei las,
nyamoq kuot zis dvnganh lyis seq.
16 Hwankti ka nyah yomsoq bos jesphung gvng mas ma yoh ung:
Jeslo eq nyah yom yah ma yoh ung.
17 Ung cho mha jes nyang gas vnyet vkom dvnghuot:
Nyamoq dah yom zainsmuh yah ma yoh khyuot yoeus.
18 Yhensain lhyi gyukwoms bang yahge
nyah mathank magons jyetdap cho lhyi loms bang lyis nyang zungh nyeis.
19 Nyamoq lyis shei masyah khyuot yoeus;
phanghkhauq gyoh uhlyis eq kang dwis nhang.
20 Yang Yhensain lhyi nghamhloms toh;
Nyang gas yang lyis pangh soeu, yang lyis gos soeu nghuot.
21 Yang nyah gyingshang nyings lyis loms toh;
yang gas nyah gvng mas gaus nyeis.
22 Yhensain eh, ngamoq nvng lyis nghamhloms zis yah dvyhangteh,
nah mathank magons jyetdap zis gas ngamoq yah dvgeh joq bas jungh.