CHUNGH 32
Yaunos Rhen lha khyuot dyei
1 Lyi lhyweq zis lyis khyuot dyei lasRef 32.1-2: Rom 4.7-8
yaunos lyis nghop tyamp dyei zis xauh soeu ka ngelhoq.
2 Yhensain yah yobos huon zis ma xauh,
mhuihjyomh cho ma bos soeu ka ngelhoq.
3 Ngos ngah yobos ma rhen lhyi,
ngos dvbuis yah ngaus las nyungdaus nyeis.
4 Yhensain eh, nvng ngos lyis nyeih nyenh yobos dyei las,
ngah yom gas zvnwvng zoh dah jyweh teh kyuk tyamp goeus. (Selah)
5 Ngos kuot shuot zis ma zauh toh lo, ngah yaunos nvng lyis rhen,
ngos nvng lyis rhen das oen nghamh thyet las,
nvng ngah yaunos dvnganh khyuot tyamp dyei. (Selah)
6 Housoeh las nah dius jens gas chah nyeis uhlyis nvng lyis shvmanh dung chah.
Yaukyenh shanghsenh zainsmuh duon nhoenk los lyis hauh zis nyamoq lyis ma los yoh zangh.
7 Nvng gas ngah tamhgus nghuot; nvng ngos lyis chiqjyen mhayah khyuot kat.
Nvng ngos lyis gos dyei yvmvyah ngos nah khyuot yoeus cho lhyi kaiq chungh das. (Selah)
8 Ngos nvng loh chah cho lhyi tuonh shet las jyauh das,
ngos nvng lyis shet das, joeui dyei das, ge Yhensain taiq.
9 Nyang, nghuot ya mauhlyihzoe teh vkoh goh:
Hauh bang gas domsyos gyo das nyhenshang, lungthungh yahge uhkhyoq yah joeu chah.
10 Lhung soeu xiklyis chiqjyen nyoshoq xauh laus eq,
Yhensain lhyi loms bang lyis gas
nyah mathank magons jyetdap zis yah gos toh.
11 Dan bang eh, Yhensain mha gaus zis yah chungh geh;
ehnyet zungh bang eh, gauslaus zis yah chungh geh.